مەديا كەڭىستىكتەگى جۇمىستى جەتىلدىرۋگە ارنالعان سەمينار

اقپارات جانە كوممۋنيكاتسيالار مينيسترلىگى مەملەكەت باسشىسىنىڭ مەملەكەتتىك ورگانداردىڭ اشىقتىعىن قامتاماسىز ەتۋ جونىندەگى تاپسىرماسىن ىسكە اسىرۋ اياسىندا مەملەكەتتىك ورگانداردىڭ, ءباسپاسوز قىزمەتتەرىنىڭ باسشىلىعى, سونىمەن قاتار, بۇقارالىق اقپارات قۇرالدارىنىڭ شەف رەداكتورلارى مەن شىعارۋشى رەداكتورلارى ءۇشىن سەمينار ۇيىمداستىردى. «كوممۋنيكاتسيالىق مەديا-مەنەدجمەنت جانە قارجىلىق ساۋاتتىلىق» تاقى­رىبىنداعى سەميناردى مينيستر داۋرەن اباەۆ اشتى. مينيستر ءوز سوزىندە زاماناۋي تەح­نولوگيالاردىڭ دامۋى ناتيجەسىندە الەم­دەگى جاعداي جەدەل وزگەرىپ جاتقانىنا توقتالدى. «نيۋسمەيكەرلەردىڭ سانى ەداۋىر ءوستى. الەۋمەتتىك جەلىلەر مەن قولجەتىمدى گاد­جەت­تەردىڭ ارقا­سىن­دا ينتەرنەتتىڭ كەز كەلگەن قول­دا­­نۋشىسى ەلدى ەلەڭ ەتكىزە الاتىن بولدى. مەم­لەكەتتەر مەن ءىرى ترانسۇلتتىق كومپا­نيا­لاردىڭ اقپاراتتى ءبىر قولدا شوعىرلان­دىرۋ بويىنشا ىق­پالى ازايۋدا», – دەدى د.اباەۆ. وسىعان وراي ول ارىپتەستەرىن ءاردايىم حالىقپەن ءتيىمدى كوممۋنيكاتسيا ورناتۋدىڭ تەتىكتەرىن جەتىلدىرۋگە شاقىردى. اتالعان سەمينارعا كوممۋ­ني­كاتسيالىق مەنەد­جمەنت سالاسىنداعى شەتەلدىك جانە قا­زاق­ستاندىق مامان­دار مەن PR-ماماندار كەلدى. سەمينار استانا قالاسىندا  قىركۇيەكتىڭ 13 مەن 17 ارالىعىندا وتەدى. سەمينار ءجا­نە شەبەرلىك ساباعى باعدارلاماسىنا كەلەسى با­عىتتار كىرەدى: شەشەندىك ونەر, ەكونومي­كا جانە قارجى جۋرناليستيكاسىنىڭ ەرەك­شەلىكتەرى, كوممۋنيكاتسيالىق تەحنولوگيا­لار, قازىرگى ساياسي جاعدايداعى باق-تىڭ ءرولى, ين­تەرنەت جانە الەۋمەتتىك جەلىلەر, كوم­مۋ­ني­كاتسيالىق مەنەدجمەنت, قوعاممەن بايلانىس. «ەگەمەن-اقپارات»