ءداستۇرلى بايقاۋ مارەسىنە جەتتى

وتباسى – بەرەكە-بىرلىگى, ءتالىم-تاربيەسى قالىپتاسقان قاعيداسىمەن, اسىل قاسيەتتەرى ارقىلى وزگەلەرگە ونەگە بولار شاعىن مەملەكەت. ادامزات بالاسىنىڭ تاربيە الىپ, تىرشىلىكپەن تانىسار العاشقى باستاۋ بۇلاعى ول ءوزىنىڭ وتباسى ەكەنى ايدان انىق. وتانىمىزدىڭ وركەندەپ دامۋىنا ءوزىنىڭ ۇلەسىن قوساتىن بىردەن-ءبىر كۇش دەسەك بولادى. «وتان وتباسىنان باستالاتىنىن» ەسكەرسەك, الدىمەن وتاندى قۇرايتىن وتباسى مىقتى بولۋى شارت. ول ءۇشىن وتباسىلىق قۇندىلىقتاردى مەملەكەتتىك دەڭگەيدە جانداندىرۋ, ۇلگىلى وتباسىلاردى ناسيحاتتاۋ جۇمىستارى جولعا قويىلۋى قاجەت. وسى ماقساتتا, 2013 جىلدان باس­تاپ ەلباسى نۇرسۇلتان ءابىش ۇلى نازارباەۆتىڭ جارلىعىمەن قىركۇيەك ايىنىڭ ەكىنشى جەكسەنبىسى «وتباسى كۇنى» بولىپ جاريالانىپ, كەلەسى جىلى «مەرەيلى وتباسى» ۇلتتىق بايقاۋىنىڭ تۇساۋى كەسىلدى. بايقاۋعا العاشقى جىلى 1298 وتباسى قاتىسسا, وتكەن جىلى بۇل كورسەتكىش 2285-كە ءوستى. ال بيىل 2501 وتباسىنان ۇسىنىس ءتۇسىپتى. ولاردىڭ قاتارىندا جەتىم-جەسىرگە قورعان بولا بىلگەن قايىرىمدى جاندار مەن كوپبالالى وتباسىلار, ءبىر شاڭىراق استىندا بىرلىگى جاراسقان كوپۇلتتىلار مەن اتا-ءداستۇردى جالعاستىرعان ءتۇرلى ديناستيا وكىلدەرى بار. بۇل بايقاۋدىڭ العاشقى جەڭىمپازدارى – بيماحامبەتوۆتەر وتباسى. ەلتاي بيماحامبەت ۇلى مەن ونىڭ زايىبى 8 بالا, 33 نەمەرە, 10 شوبەرە تاربيەلەپ وسىرگەن. بالالارىنا جوعارى ءبىلىم بەرىپ, مادەنيەت سالاسىنىڭ دامۋىنا ۇلكەن ۇلەس قوستى. وڭتۇستىك قازاقستان وبلىسىنىڭ مەرەيىن اسىرعان بيماحامبەتوۆتەر 2014 جىلى پرەزيدەنت نۇرسۇلتان نازارباەۆتىڭ قولىنان ارنايى ديپلوم مەن قازاقستاندىق شاعىن اۆتوبۋستىڭ كىلتىن الدى. داستۇرگە اينالعان بۇل شارا وتكەن جىلى دا جالعاسىن تاۋىپ, ماڭعىستاۋلىق قۇلساريەۆتەر وتباسى جەڭىمپاز اتاندى. اۋلەتتىڭ باسشىسى ورىن قۇلساريەۆ ۇزاق جىلدار بويى ۇستازدىق ەتىپ, قازاق ونەرىنىڭ دامۋىنا ەلەۋلى ۇلەس قوسقان دومبىراشى. جۇبايى ەكەۋى 12 بالادان, 43 نەمەرە, 41 شوبەرە ءسۇيىپ وتىرعان باقىتتى جاندار. ۇلتتىق بايقاۋدا ۇزدىك دەپ تانىلعان وتباسى «مەرەيلى وتباسى» ۇلتتىق بايقاۋىنىڭ ارنايى ديپلومىمەن قازاقستاندا شىعارىلعان شاعىن اۆتوبۋستىڭ كىلتىن الدى. بيىل دا ءۇشىنشى مارتە ۇيىمداستىرىلىپ وتىرعان ۇلتتىق بايقاۋدىڭ اقتىق سايىسىنا استانا مەن الماتى قالالارىن قوسقاندا 16 ايماقتىڭ جەڭىمپازدارى جيىلىپ وتىر. ولاردىڭ بارلىعى دا «مەرەيلى وتباسى» دەگەن اتقا لايىق. الايدا, بايقاۋدىڭ شارتى بويىنشا تالعام مەن تالاپ ءبىر عانا جەڭىمپازدى تاڭدايدى. جەڭىمپازداردى ىرىكتەۋگە sms حابارلامالار جانە ينتەرنەت-رەسۋرس ارقىلى, ينتەراكتيۆتى داۋىس بەرۋ جولىمەن ەلدىڭ بارلىق تۇرعىندارى بەلسەندى تۇردە قاتىستى. بيىلعى جەڭىمپازداردى ماراپاتتاۋ راسىمىنە مەملەكەتتىك حاتشى گۇلشارا ابدىقالىقوۆا قاتىسىپ, ەلباسىنىڭ قۇتتىقتاۋ حاتىن وقىپ بەردى. ء«اربىر وتباسى ءبىزدىڭ باستى ماقساتىمىز – بولاشاعى ءبىرتۇتاس ماڭگىلىك ەل بولۋ جولىندا مەملەكەتىمىزدى نىعايتا تۇسۋگە باعا جەتپەس ۇلەس قوسادى. وتباسىلىق قۇندىلىقتارى بەكەم ورنىققان ەل عانا مىزعىماس مەملەكەت بولا الادى. بۇگىنگى مەرەيلى كۇندە شاڭىراعىندا ىزگى قارىم-قاتىناس, يگى داستۇرلەر ساقتالىپ, ءوزارا سىيلاستىق سالتانات قۇرعان بارلىق وتباسىنا ريزاشىلىعىمدى بىلدىرەمىن», – دەلىنگەن قۇتتىقتاۋدا. سالتاناتتى ءىس-شارا اياسىندا مەم­لەكەتتىك حاتشى مارەگە جەتكەن ءار وتباسىنا گراموتا مەن ديپلوم جانە تۇرمىستىق تەحنيكا ساتىپ الۋعا ارنالعان 300 مىڭ تەڭگەلىك سەرتيفيكات تاپسىردى. قىركۇيەكتىڭ 2-ءسى مەن 9-ى ارالىعىن­دا ينتەرنەت ارقىلى sms داۋىس بەرۋ بويىن­شا وتكىزىلگەن كونكۋرستىڭ فينال­دىق تۋرىندا جەڭىمپاز وتباسى انىق­تال­دى. اقتوبە وبلىسىنان قاتىسقان نۇسقاباەۆتار وتباسى «مەرەيلى وتباسى» ۇلتتىق بايقاۋىنىڭ 2016 جىلعى لاۋرەاتى اتاندى. وتاعاسى – ۇلى وتان سوعىسىنىڭ ارداگەرى, ول 46 جىل بويى اۋىل مەكتەبىندە ۇستازدىق ەتكەن. ەرلى-زايىپتى نۇسقاباەۆتاردىڭ شاڭىراق كوتەرگەنىنە 72 جىل تولىپ, 10 بالا, 31 نەمەرە, 22 شوبەرە ءسۇيىپ وتىر. بالالارى مەن نەمەرەلەرى ەل ەكونوميكاسىنىڭ ءتۇرلى سالاسىندا تابىستى ەڭبەك ەتىپ ءجۇر. ۇلتتىق بايقاۋدىڭ جەڭىمپازى بولعان وتباسىنا مەملەكەتتىك حاتشى ەستەلىك سىيلىق پەن شاعىن اۆتوبۋستىڭ كىلتىن سالتاناتتى تۇردە تابىس ەتتى. – «ەلدىڭ تىنىشتىعى مەن تاتۋ­لىعىنا ەرەكشە ءمان بەرىپ, وتباسىلىق قۇن­دىلىقتاردىڭ قۇلدىراماۋىن قاداعالاپ, وسىنداي ۇرپاققا قاجەتتى ۇلتتىق باي­قاۋ­لاردىڭ وتۋىنە باس-كوز بولىپ, بىزگە قۇرمەت كورسەتىپ جاتقان ەلباسىنا ەڭ ءبىرىن­شى العىسىمدى ايتامىن. بالا­لارىم­­نىڭ ىشىندە, نەمەرەلەرىمنىڭ ىشىن­دە جوعارى وقۋ ورنىن ءبىتىرىپ, ءتۇرلى قىز­مەت اتقارىپ جۇرگەندەرى جەتەرلىك. ونىڭ بار­لىعى تاۋەلسىزدىگىمىزدىڭ ارقاسى دەسەم, ارتىق ايتقاندىق بولماس. ەلىمىز قازىر تاۋەلسىزدىگىمىزدىڭ 25 جىلدىعىن توي­لاۋ­دى باستاپ كەتتى. بۇل كىرپىك قاق­قان­­داي ۋاقىت. وسى جىلدار ىشىندە قازاق­­ستان­دى دۇنيە ءجۇزى تانىپ-ءبىلدى. وتان­نىڭ مىقتى, مىعىم بولۋىندا وتبا­سى­نىڭ ورنى ايرىقشا. سوندىقتان ءاربىر ادام وسى جاۋاپكەرشىلىككە ادال­دىق­­پەن قارا­عان­دارى ابزال», دەدى جەڭىم­پاز وت­باسى­نىڭ اقساقالى ابدۋللا نۇسقاباەۆ. حالقىمىز اكەنى اسقار تاۋعا بالا­عان, «جۇماق – انانىڭ تابانىنىڭ استىندا» دەپ ساناعان, «بالا – باۋىر ەتىڭ», دەپ ۇرپاعىنا ايرىقشا قامقور­لىقپەن قاراعان. اتالعان بايقاۋ وسى سال­تىمىز­عا سالعىرت قاراماۋعا جەتەلەيدى. سون­دىق­تان دا ۇزدىك شىققان ۇلگىلى وتباسىلار­دى ناسيحاتتاۋعا اتسالىسىپ كەلە جاتقان جوبانىڭ جەلىسى ۇزىلمەسىن دەپ تىلەيمىز. ماراپاتتاۋ ءراسىمى قازاقستاننىڭ ەسترادا ارتىستەرىنىڭ قاتىسۋىمەن مەرەكەلىك كونتسەرتكە ۇلاستى. راۋان قايدار, «ەگەمەن قازاقستان» استانا سۋرەتتى تۇسىرگەن ەرلان وماروۆ, «ەگەمەن قازاقستان»