1993
* 13 اقپاندا «قازاقستان رەسپۋبليكاسىنىڭ شەكارا اسكەرلەرى تۋرالى» زاڭى باسپاسوزدە جاريالاندى.
* 14 اقپاندا ەلباسى نۇرسۇلتان نازارباەۆ ەگيپەت اراب رەسپۋبليكاسىنا العاشقى رەسمي ساپارى كەزىندە ەل پرەزيدەنتى حوسني مۇباراكپەن كەلىسسوز جۇرگىزدى. كەلىسسوز اياقتالعاننان كەيىن پرەزيدەنتتەر قازاقستان رەسپۋبليكاسى مەن ەگيپەت اراب رەسپۋبليكاسى اراسىنداعى ءوزارا قارىم-قاتىناس نەگىزدەرى تۋرالى شارتقا قول قويدى.
بۇل ساپار جونىندە «ەگەمەن قازاقستان» گازەتىنىڭ 18 اقپانداعى نومىرىنە «افريكا اشسا قۇشاعىن, قازاقستان قاراپ قالمايدى. ول دا ىنتىماقتاستىق قولىن سوزادى» تاقىرىبىمەن ماقالا شىقتى.
* 18 اقپاندا پرەزيدەنت نۇرسۇلتان نازارباەۆ اقش-تىڭ قازاقستانداعى توتەنشە جانە وكىلەتتى ەلشىسى ۋيليام X. كورتنيدى ونىڭ ءوتىنىشى بويىنشا قابىلدادى. ديپلومات مەملەكەت باسشىسىنا اقش پرەزيدەنتى بيلل كلينتوننىڭ جەكە حاتىن تابىس ەتتى. كەزدەسۋ كەزىندە يادرولىق قارۋسىزدانۋ ماسەلەسىنە ءمان بەرىلدى.
*25 اقپاندا پرەزيدەنت جارلىعىمەن ت.و.اۋباكىروۆ قازاقستان رەسپۋبليكاسى مينيسترلەر كابينەتى جانىنداعى ۇلتتىق اەروعارىش اگەنتتىگىنىڭ باس ديرەكتورى بولىپ تاعايىندالدى.
* 26 اقپاندا ماسكەۋدە قازاقستان پرەزيدەنتى نۇرسۇلتان نازارباەۆ پەن رەسەي باسشىسى بوريس ەلتسين باستاعان رەسەي جانە قازاقستان مەملەكەتتىك دەلەگاتسيالارىنىڭ كەلىسسوزى اياقتالدى. پرەزيدەنتتەر اسكەري-وندىرىستىك كەشەننىڭ كۇش-قۋاتىن پايدالانۋدى ۇيلەستىرۋدىڭ ماقساتتىلىعى جانە ونى كونۆەرسيالاۋ تۋرالى, «بايقوڭىر» عارىش ايلاعىن جانە باسقا پوليگونداردى ەكى ەل حالىق شارۋاشىلىعىنىڭ مۇددەسىنە پايدالانۋ تۋرالى ورتاق پىكىرگە كەلدى. وسى كۇنى «قازاقستان رەسپۋبليكاسىنىڭ مەملەكەتتىك شەكاراسى تۋرالى» زاڭى ءوز كۇشىنە ەندى.
* 3 ناۋرىزدا مەملەكەت قاراماعىنان الۋ جانە جەكەشەلەندىرۋ جونىندەگى 1993-1995 جىلدارعا ارنالعان ۇلتتىق باعدارلاما تالقىلاندى. وبلىس اكىمدەرىنىڭ جانە مينيسترلىكتەر مەن ۆەدومستۆولار باسشىلارىنىڭ قاتىسۋىمەن وتكەن كەڭەستە پرەزيدەنت ن.ءا.نازارباەۆ قۇجاتتىڭ ماڭىزدىلىعى جاعىنان جاقىندا قابىلدانعان كونستيتۋتسيادان كەيىنگى ەكىنشى بەدەرلى بەلەس بولاتىنىن قاداپ ايتتى.
* 5 ناۋرىزدا پرەزيدەنت ن.ءا.نازارباەۆ «مەملەكەتتىك كاسىپورىنداردى اكتسيونەرلىك قوعامدار ەتىپ قايتا قۇرۋ ءجونىندەگى ۇيىمداستىرۋ شارالارى تۋرالى» جارلىققا قول قويدى.
* 20 ناۋرىزدا پرەزيدەنت ن.ءا.نازارباەۆ رەسپۋبليكا حالقىنا ناۋرىز مەيرامىنا وراي قۇتتىقتاۋ جولدادى. «كوكتەم شۋاعىمەن بىرگە جەتەتىن ناۋرىز مەيرامى ءبىزدىڭ ءبارىمىزدىڭ جۇرەكتەرىمىزگە جىلىلىق قۇيسىن, ءبىر-بىرىمىزگە دەگەن دوستىق كوڭىلىمىزدى ارايلاندىرىپ, ىزگىلىكتىڭ ساۋلەسىن توكسىن», دەپ تىلەك ءبىلدىردى ەلباسى.
* 25 ناۋرىزدا رەسپۋبليكا قاۋىپسىزدىك كەڭەسىنىڭ ءماجىلىسى وتكىزىلدى. كەڭەستى اشقان پرەزيدەنت ن.ءا.نازارباەۆ بۇدان بىلاي بۇل كەڭەس كونستيتۋتسيالىق ورگان بولىپ تابىلاتىندىعىن ايتتى.
* 1 ساۋىردە جوعارعى كەڭەستىڭ سەسسياسىندا «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭ جوباسى تالقىلاندى. پىكىر الماسۋ بارىسىندا «حالىق قاھارمانى» اتاعى, «وتان», «داڭق», «پاراسات», «قۇرمەت» وردەندەرى, «ەرلىگى ءۇشىن», «ەرەن ەڭبەگى ءۇشىن», «شاپاعات» مەدالدارى قابىلداندى. جوباداعى «ارداقتى انا» قۇرمەتتى اتاعى جانە «انا مەرەيى» كۇمىس القاسى جونىندە تالاس ءوربىپ, دەپۋتات شەرحان مۇرتازا: «انالاردىڭ ءبارى ارداقتى, ەگەر ول بالاسىن تاستاپ كەتپەسە, بۇزىق جولعا تۇسپەسە. ورىسشالاعاندا «پوچەتنايا مات» بولىپ شىعادى. دۇنيە جۇزىندە مۇنداي اتاق قانە. ەرسى ەستىلەدى», دەي كەلىپ, «التىن القا», «كۇمىس القا» دەگەن اتاۋلاردى ۇسىندى. قازىرگى قولدانىلىپ جۇرگەن زاڭ بويىنشا وسى قۇرمەتتى اتاقتار بەرىلىپ كەلەدى.
* 6 ساۋىردە الماتىداعى دوستىق ۇيىندە پرەزيدەنت ن.ءا.نازارباەۆ پەن «شەۆرون» كورپوراتسياسىنىڭ باسقارما توراعاسى جانە وكىمشى ديرەكتورى كەننەت ت. دەرر 40 جىل مەرزىمگە ەسەپتەلگەن «تەڭىز-شەۆرون»/«تەنگيزشەۆرويل»/ بىرلەسكەن كاسىپورنىن قۇرۋ تۋرالى كەلىسىمشارتقا قول قويدى.
* 8 ساۋىردە «ەگەمەن قازاقستان» گازەتىندە ەكونوميكانى تۇراقتاندىرۋ جانە نارىققا كوشۋ كەزەڭىنە ارنالعان «داعدارىسقا قارسى شۇعىل شارالار جانە الەۋمەتتىك-ەكونوميكالىق رەفورمالاردى تەرەڭدەتۋ باعدارلاماسى» جاريالاندى. جوعارعى كەڭەستىڭ توعىزىنشى سەسسياسىندا قارالعان بۇل باعدارلامانى پرەزيدەنت ن.ءا.نازارباەۆ بەكىتتى.
* 9 ساۋىردە تۇركيا پرەزيدەنتى تۇرعىت ءوزال قازاقستانعا رەسمي ساپارمەن كەلدى. ءتۇركيا دەلەگاتسياسى قازاقستانعا حالىقارالىق ەكونوميكالىق كومەك بەرىلۋىنە باعىتتالعان ءوز كۇش-جىگەرى تۋرالى حاباردار ەتتى.
* 10 ساۋىردە ءتۇركيا پرەزيدەنتى تۇرعىت ءوزال مەن قازاقستان پرەزيدەنتى نۇرسۇلتان نازارباەۆ وڭتۇستىك قازاقستان وبلىسىندا بولىپ, تۇركىستاندا قوجا احمەت ياساۋي كەسەنەسىنە تاعزىم ەتتى. وسىندا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەسمي اشىلۋ سالتاناتى وتكىزىلدى. راسىمدە ەكى ەلدىڭ باسشىلارى ءسوز سويلەدى.
* 12 ساۋىردە نۇرسۇلتان نازارباەۆ رەسەي فەدەراتسياسىنىڭ پرەزيدەنتى بوريس ەلتسينمەن, ازەربايجان پرەزيدەنتى ءابىلفاز ەلشىبەيمەن جانە ارمەنيا پرەزيدەنتى لەۆون تەر-پەتروسيانمەن تاۋداعى كاراباق توڭىرەگىندە قالىپتاسقان جاعداي جونىندە تەلەفون ارقىلى سويلەستى.
* 15 ساۋىردە پرەزيدەنت ن.نازارباەۆ قازاقستان رەسپۋبليكاسىنىڭ ۆەنگريا رەسپۋبليكاسىنداعى, بەلگيا كورولدىگىندەگى, ەگيپەت اراب رەسپۋبليكاسىنداعى ەلشىلىكتەرىن اشۋ تۋرالى جارلىقتارعا قول قويدى.
* 18 ساۋىردە الماتىدا بۇكىلدۇنيەجۇزىلىك ەكونوميكالىق فورۋمنىڭ كوشپەلى سەسسياسى جۇمىسىن باستادى. وعان الەمنىڭ 30-عا جۋىق ەلىنەن ىسكەر توپتاردىڭ بەدەلدى وكىلدەرى كەلدى. قازاقستان باسشىسى نۇرسۇلتان نازارباەۆ فورۋمدا ءسوز سويلەدى.
* 21 ساۋىردە كەنەتتەن قايتىس بولعان تۇرىك رەسپۋبليكاسىنىڭ پرەزيدەنتى تۇرعىت وزالمەن قوشتاسۋ راسىمىنە قاتىسۋ ءۇشىن ىستانبۇلعا كەلگەن قازاقستان پرەزيدەنتى نۇرسۇلتان نازارباەۆ تۇركيا پرەمەر-ءمينيسترى سۇلەيمەن دەميرەلمەن, گەرمانيا پرەزيدەنتى ريحارد فون ۆايتسزەككەرمەن, اقش ۆيتسە-پرەزيدەنتى البەرت گورمەن, ازەربايجان پرەزيدەنتى ءابىلفاز ەلشىبەيمەن, ارمەنيا پرەزيدەنتى لەۆون تەر-پەتروسيانمەن, گرۋزيا پارلامەنتىنىڭ توراعاسى ەدۋارد شەۆەردنادزەمەن, يران يسلام رەسپۋبليكاسىنىڭ سىرتقى ىستەر ءمينيسترى ءالي اكبار ۆەلاياتيمەن, اقش-تىڭ بۇرىنعى مەملەكەتتىك حاتشىسى دجەيمس بەيكەرمەن, باسقا دا لاۋازىمدى ادامدارمەن قىسقاشا كەزدەسۋلەر وتكىزدى.
* 26 ساۋىردە اۆستريا رەسپۋبليكاسىنىڭ فەدەرالدىق كانتسلەرى فرانتس ۆرانيتسكي رەسمي ساپارمەن الماتىعا كەلدى. بۇل اۆستريا باسشىسىنىڭ قازاقستانعا ەكىنشى ساپارى بولاتىن. قازاقستان پرەزيدەنتى كەزدەسۋ بارىسىندا ەلدەر اراسىنداعى ىنتىماقتاستىقتىڭ بولاشاعىنا قاتىستى ەكى جاقتىڭ پىكىرلەرىنىڭ سايكەستىگى ارتا تۇسكەندىگىن اتاپ كورسەتتى.
