سورەدە كىتاپ سويلەدى

استاناداعى ۇلتتىق اكادەميالىق كىتاپحانادا تاۋەلسىزدىكتىڭ 25 جىلدىعىنا وراي الماتى وبلىسى كۇندەرىنىڭ اياسىندا «جەرۇيىق مەكەن – جەتىسۋ» اتتى كىتاپ كورمەسى اشىلدى. جەتىسۋ – قايتالانباس تۇلعالار: ءسۇيىنباي, جامبىل, ۇمبەتالى, سونداي-اق دارابوز اقىن-جازۋشىلار ءىلياس جانسۇگىروۆ پەن ءانۋار ءالىمجانوۆ, مۇقاعالي ماقاتاەۆ پەن سايىن مۇراتبەكوۆ تۋعان ولكە. حالقىمىزدىڭ ارداقتى ۇلدارى وراز جاندوسوۆ پەن مۇحامەدجان تىنىشباەۆ ەسىمدەرى دە جەتىسۋ ولكەسىمەن بايلانىستى. شارانىڭ ماقساتى – جەتىسۋ مەن استانا تۇرعىندارى اراسىندا مادەني بايلانىس ورناتۋ, جاستاردى جۇيەلى وقۋعا باۋلۋ, «مادەني مۇرا» باعدارلاماسى اياسىندا جەتىسۋ اقىن-جازۋشىلارىنىڭ, كومپوزيتورلارىنىڭ شىعارمالارىن ناسيحاتتاۋ. سونداي-اق استانالىقتارعا الماتى وبلىسىنىڭ مادەني ورلەۋى مەن ونەردەگى جەتىستىكتەرىن تانىستىرۋ, زاماناۋي ۇلتتىق مادەنيەت پەن ادەبيەتتىڭ لايىقتى ورنىن كورسەتۋ. كورمەنى الماتى وبلىستىق مادەنيەت باسقارماسىنىڭ باسشىسى اقان ابدۋاليەۆ اشتى. شاراعا «قازاق پەن» كلۋبىنىڭ پرەزيدەنتى, جازۋشى بيگەلدى عابدۋللين, «قازاق پەن» كلۋبىنىڭ مۇشەسى, جازۋشى سماعۇل ەلۋباي, «قازاق ادەبيەتى» گازەتىنىڭ باس رەداكتورى, جازۋشى جۇماباي شاشتاي ۇلى, سونداي-اق جەتىسۋدا تۋىپ-وسكەن باسقا دا بىرقاتار ونەر ادامدارى قاتىستى. كورمەگە الماتى وبلىسى اكىمىنىڭ قولداۋىمەن 2006-2016 جىلدار ارالىعىندا جارىق كورگەن 319 اۆتوردىڭ كىتاپتارى قويىلدى. شىققان جىلى بويىنشا حرونولوگيالىق رەتپەن ورنالاستىرىلعان سورەلەردەن ولكەنىڭ اقىن-جازۋشىلارىنىڭ, كومپوزيتورلارىنىڭ تۋىندىلارىمەن تانىسۋعا بولادى. ايگۇل سەيىلوۆا, «ەگەمەن قازاقستان» سۋرەتتى تۇسىرگەن ەرلان وماروۆ, «ەگەمەن قازاقستان»