گولوۆكيننىڭ 36-شى جەڭىسى

قىركۇيەكتىڭ 11-ىنە قاراعان ءتۇنى لوندونداعى و2 ارەناسىندا كاسىپقوي بوكستان قازاقستاندىق گەننادي گولوۆكين بريتانيالىق كەلل برۋكتى تەحنيكالىق نوكاۋتپەن جەڭىپ, ءۇش نۇسقا بويىنشا ءوزىنىڭ الەم چەمپيونى دەگەن اتاعىن قورعاپ قالدى.  شايقاس برۋكتىڭ جات­تىق­تىرۋشىسى ورتاعا اق سۇلگى تاس­تاۋىمەن توقتادى. وسىلايشا تەحنيكالىق نوكاۋتپەن جەڭىسكە جەتكەن 34 جاستاعى جەرلەسىمىز كاسىپقويلار رينگىندەگى 36 ۇرىسىن ءبارىن جەڭىسپەن ءبىتىردى. سونىڭ ىشىندە 33-ءشى نوكاۋتىنا قول جەتكىزدى. بۇعان قوسا, قاتارىنان 23 رەت شايقاسىن مەرزىمىنەن بۇرىن اياقتاپ وتىر. ال 30 جاستاعى كەلل برۋكتىڭ 37 شايقاستاعى ەڭ العاشقى جەڭىلىسى وسى بولدى. ول بۇعان دەيىنگى 36 جەكپە-جەگىنىڭ ءبارىن ۇتىسپەن ءبىتىرىپ, 25 رەت نوكاۋت جاساعان ەدى. ءبىزدىڭ جەرلەسىمىز ءبىرىنشى راۋند­تى قارقىندى باستادى. ونىڭ العاشقى جويقىن سوققىلارى قارسىلاسىن ەداۋىر ەسەڭگىرەتىپ جىبەردى. بىراق كەلل برۋك تەز تىكتەلىپ كەتتى. ەكىنشى راۋندتىڭ باسىندا گەننادي بەرگەن دجەبتى كەلل ىلە-شالا قاتتىراق سوققىمەن قايتالا­دى. ۇرىستىڭ وسى بولىگىندە بري­تانيالىق بىلعارى قولعاپ شەبەرى باسىمداۋ كورىندى. دەگەن­مەن, ونىڭ نوپىرىنە گولوۆ­كين توتەپ بەردى. ال ءۇشىندى راۋندتا قايتادان قاھارىنا ءمىندى. بۇل ارالىقتا ونىڭ قارسىلاسى شەشۋشى سوققىلاردان ارەڭ سىتىلىپ كەتىپ جۇرگەندەي كورىندى. ءتورتىنشى راۋند قازاقستاندىق سپورتشىنىڭ باسىمدىلىعى ارتا تۇسكەنىن تانىتتى. ەندى بولماسا ەسەسى كەتىپ قالاتىنىن سەزگەن برۋك سوڭىندا تارازى باسىن وزىنە اۋدارۋعا ۇمتىلدى. سول كەزدە بىرەر سوققىسى جاقسى شىقتى. مۇنىڭ ءبارى بەسىنشى راۋندتىڭ باسىندا بوسقا كەتكەندەي بولدى. تاعى دا بەلسەندىلى­گىن ارتتىرعىسى كەلگەن كەللدى گەنانىڭ اۋىر سوققىلارى كۇتىپ تۇردى. ولاردىڭ جويقىن دا قاۋىپتى بولعانى سونداي, برۋكتىڭ سەكۋندانتى ورتاعا سۇلگى تاستاۋعا ءماجبۇر بولدى. سوڭىندا بريتانيالىق اتلەت­تىڭ ءوزى جاتتىقتىرۋشىسىنىڭ بۇل ارەكەتىنە ريزاشىلىق ءبىلدىردى. ءوزى سودان كەيىن ءبىر كوزىنە كەلگەن زاقىمعا بايلانىستى وپەراتسيا ۇستەلىنە جاتقىزىلدى. قازىر گەنناديدىڭ كەلەسى جەكپە-جەگى قاراشا ايىندا ءوتىپ قالۋى مۇمكىن ەكەنى جايلى ءسوز قوزعالىپ جاتىر.