قۇربان ايت مەرەكەسى كۇنى قوستانايدا جاڭا مەشىت جاماعاتقا ەسىگىن ايقارا اشتى. بۇل قوستاناي وبلىسىنداعى ەڭ ءزاۋلىم مەشىت جانە سونىمەن قاتار وبلىس ورتالىعىنىڭ ءسانىن كەلتىرەتىن ساۋلەتتى ارحيتەكتۋرالىق عيماراتتاردىڭ بىرىنە اينالدى. وعان ءبىر مەزگىلدە 2200 ادام كىرىپ عيبادات جاساي الادى. وبلىس اكىمى ارحيمەد مۇحامبەتوۆ مەشىتتىڭ اشىلۋ سالتاناتىنداعى قۇتتىقتاۋ سوزىندە سوڭعى جىلدارى قازاق حالقى ءۇشىن اتا-بابامىز ۇستانعان يسلامنىڭ حانافي مازحاب باعىتىنىڭ حاق جولىنا بەت بۇرۋشىلاردىڭ كوبەيىپ كەلە جاتقاندىعىن اتاپ ءوتتى جانە مەشىتتىڭ جاستارعا رۋحاني تاربيە بەرەتىن جانە ءداستۇرلى ءدىنىمىزدى ناسيحاتتايتىن ورتالىققا اينالاتىنىنا سەنىم ءبىلدىردى. مۇسىلمانداردىڭ ءدىني باسقارماسىنىڭ شەشىمىمەن مەشىتكە بەلگىلى ۋاعىزداۋشى بولعان جانە قوستاناي جانە تورعاي وڭىرىندە يسلام قۇندىلىقتارىنىڭ تاراتىلۋىنا ۇلكەن ۇلەس قوسقان ايماعانبەت كاجى سپان ۇلىنىڭ ەسىمى بەرىلدى. مەشىتتىڭ اشىلۋىنا قازاقستان مۇسىلماندارى ءدىني باسقارماسىنىڭ وكىلى كامالجان تۇردىباەۆ ارنايى كەلىپ قاتىسىپ, جاماعاتتى قۋانىشپەن قۇتىقتادى.
مەشىتتىڭ 2010 جىلى باستالعان قۇرىلىسى قارجىنىڭ جوقتىعىنان ءبىراز ۋاقىت تۇرىپ قالعان بولاتىن. ۇستىمىزدەگى جىلدىڭ باسىندا ول قايتا قولعا الىنىپ, مامىر ايىنان قىركۇيەك ايىنا دەيىن قىزۋ جۇرگەن قۇرىلىس جۇمىستارىنىڭ ارقاسىندا دايىن بولدى. مەشىت قۇرىلىسى دەمەۋشىلەر بەرگەن قارجىعا سالىندى.
مەشىت عيماراتى ءۇش قاباتتان تۇرادى, ءبىرىنشى قاباتىندا 1450 ادامعا ارنالعان ەرلەردىڭ عيبادات جانە نەكە قيۋ زالدارى بار. ەكىنشى قاباتىندا ايەلدەردىڭ عيبادات جاسايتىن زالى ورنالاسقان. كۇمبەزدىك قاباتىندا قوسالقى ورىن-جايلار بار.
جاڭا مەشىتتىڭ كەستەلەنگەن ميحرابى جانە الىستان جارقىرايتىن التىن تۇستەس باس كۇمبەزى, ويۋلانعان ەسىكتەرى, جۇمساق كىلەمدەرى ونىڭ ءسان-ساۋلەتىن ايشىقتاي تۇسەدى. عيماراتتىڭ جالپى الاڭى شامامەن 4 مىڭ شارشى مەتردەي. مۇناراسىنىڭ بيىكتىگى – 40 مەتردى, باس كۇمبەزىنىڭ بيىكتىگى – 25 مەتردى جانە ونىڭ ديامەترى 12 مەتردى قۇرايدى.
ءنازيرا جارىمبەتوۆا,
قوستاناي
