ورتا سالماقتا WBA (Super), IBO, IBF جانە WBC بويىنشا الەم چەمپيونى گەننادي گولوۆكين (35-0, 32 كو) مەن جارتىلاي ورتا سالماقتاعى IBF بەلبەۋىنىڭ يەسى بريتاندىق كەلل برۋكتىڭ (36-0, 25 كو) اراسىنداعى جەكپە-جەك مەرزىمىنەن بۇرىن اياقتالدى. لوندوندا 20 مىڭ ادام سياتىن ارەنادا وتكەن ايقاستىڭ 5-راۋندىندا بريتاندىقتىڭ سەكۋندانتى اق ورامال تاستادى.
جەكپە-جەكتىڭ ءبىرىنشى راۋندىندا-اق برۋك نوكاۋتقا تۇسە جازداپ ارەڭ قالدى. الايدا, ەكىنشى راۋندتا ول شيراق قيمىلداپ گولوۆكينگە ءبىراز سوققىسىن ءدال تيگىزدى.
ءۇشىنشى راۋندتا برۋك قۇلاپ قالعان ەدى, بىراق تورەشى ونىڭ اياعى تايىپ كەتتى دەپ ەسەپتەدى. ءتورتىنشى راۋندتا دا قازاقستاندىق بوكسشى قارسىلاسىن ءدال سوققىلارمەن توپەلەدى. بەسىنشى راۋندتا گولوۆكيننىڭ سوققىلارى بريتاندىققا وتە اۋىر ءتيىپ جاتقانى انىق كورىنە باستادى. برۋك بۇل راۋندتا بىردە-ءبىر سوققى جۇمساعان جوق. راۋند اياعىنا جەتپەي برۋكتىڭ باپكەرى دومينيك ينگل ورامال بۇلعاپ جەكپە-جەكتى توقتاتۋعا ءوتىنىش ءبىلدىردى. الايدا, رينگتەگى تورەشى ونى كورمەدى جانە شۋىلدان ەستي دە المادى. سول ارالىقتا گولوۆكين قارسىلاسىنا تاعى بىرنەشە سوققى جۇمسادى. تەك سەكۋندانت ورامالىن رينگكە لاقتىرعاننان كەيىن عانا ايقاس توقتاتىلدى.
وسىلايشا گەننادي گولوۆكين كاسىپقوي بوكستاعى 36-شى جەڭىسىنە جەتتى.
جەكپە-جەكتەن كەيىن بەرگەن سۇحباتىندا گولوۆكين «لوندونعا, جۇرتشىلىققا, بارشا جانكۇيەرلەرگە العىس ايتقىم كەلەدى. كەلل ءىرى جانە جاقسى بوكسشى, ونىڭ شەبەرلىگىنە جانە مەنەن قايمىقپاعانىنا ريزا بولدىم. بۇل مەن ءۇشىن ءبىر سپاررينگ سياقتى بولدى, قارسىلاس ماعان قيىندىق تۋدىرا المادى. برۋكتىڭ باپكەرىنىڭ شەشىمىن دە تۇسىنەمىن, ويتكەنى ول ايقاستىڭ اياقتالۋعا جاقىن ەكەنىن كورە ءبىلدى. ەندى مەن بارلىق بوكسشىلاردى, سونىڭ ىشىندە كىشى يۋبەنكتى جەكپە-جەككە شاقىرام, بىراق الدىمەن بيللي دجو سوندەرسپەن كەزدەسكىم كەلەدى», - دەدى گولوۆكين.
