وبلىس رەسپۋبليكانى قانتپەن قامتىماق

كەشە ەلوردادا «قۋاتتى ءوڭىر – قۋاتتى قازاقستان» اكتسياسىنىڭ اياسىندا الماتى وبلىسىنىڭ كۇندەرى باستالدى. ءۇش كۇنگە سوزىلاتىن شارا بارىسىندا ايماقتان كەلگەن دەلەگاتسيا وبلىستىق تاۋار وندىرۋشىلەردىڭ اۋىلشارۋاشىلىق جارمەڭكەسىن, كىتاپ پەن ءساندى-قولدانبالى ونەر كورمەلەرىن, مەرەكەلىك كونتسەرتتەر وتكىزۋگە مۇرىندىق بولماق. ەل تاۋەلسىزدىگىنىڭ 25 جىلدىعىنا وراي وتەتىن شارانىڭ العاشقى كۇنى ورتالىق كوممۋنيكاتسيالار قىزمەتىندە الماتى وبلىسى اكىمىنىڭ ورىنباسارى باقتيار ونەرباەۆتىڭ قاتىسۋىمەن بريفينگ ءوتتى. ب.ونەرباەۆ وبلىستىڭ الەۋمەتتىك-ەكونوميكالىق تىنىس-تىرشىلىگىندە اتقارىلىپ جاتقان جۇمىستار بارىسىن باياندادى. ونىڭ ايتۋىنشا, بيىلعى جىلدىڭ العاشقى التى ايىندا وبلىس ەكونوميكاسىنا 269,3 ميلليارد تەڭگە كولەمىندە ينۆەستيتسيا تارتىلعان. – ينۆەستورلارمەن جۇمىس ىستەسۋ ءبىزدىڭ جۇمىسىمىزدىڭ باستى باعىتتارىنىڭ ءبىرى. سونىڭ ارقاسىندا 2016 جىلدىڭ قاڭتار-شىلدە ايلارىندا 269,3 ميلليارد تەڭگە ينۆەستيتسيا تارتىلدى. بۇل بىزگە بيۋدجەتكە تۇسەتىن سالىق كولەمىن ارتتىرۋعا, جاڭا جۇمىس ورىندارىن اشۋعا, رەسپۋبليكالىق بيۋدجەتتەن بولىنەتىن جاردەمقارجىنى ازايتۋعا مۇمكىندىك بەردى, – دەدى ب.ونەرباەۆ. ونىڭ ايتۋىنشا, كوكسۋ اۋدانىندا ۇزاق ۋاقىتتان بەرى توقتاپ تۇرعان قانت زاۋىتىنىڭ جۇمىسى وتكەن جىلى ينۆەستورلاردىڭ اتسالىسۋىمەن قايتا جاندانىپتى. بيىل اقسۋ اۋدانىنداعى قانت زاۋىتىنىڭ دا جۇمىسى جولعا قويىلماق, وعان دا ينۆەستورلار جۇمىلدىرىلعان. وسىلايشا, الماتى وبلىسى الداعى ۋاقىتتا ەلىمىزدى وتاندىق قانتپەن قامتاماسىز ەتىپ قانا قويماي, ونى ەكسپورتقا شىعارۋدى جوسپارلاپ وتىر ەكەن. – بيىلعى جىلدىڭ جەتى ايىندا وڭىردە 14 269 جۇمىس ورنى اشىلدى. بۇل مەملەكەت باسشىسى العا قويعان ماڭىزدى تاپسىرمالاردىڭ ءبىرى, – دەگەن ب.ونەرباەۆ وبلىستىڭ ەل ەكونوميكاسىنا سۇبەلى ۇلەس قوسىپ جاتقانىن تىلگە تيەك ەتتى. الماتى وبلىسى كۇندەرىنىڭ اياسىندا ەلوردادا اۋىلشارۋاشىلىق جارمەڭكەسى ءوتىپ جاتقانىن ايتا كەتۋ كەرەك. جارمەڭكەدە جالپى سالماعى 340 توننادان اساتىن 38-دەن استام ءونىم تۇرلەرى ساۋداعا شىعارىلدى. ونىڭ ىشىندە ەت پەن ەت ونىمدەرى, بالىق, كوكونىس, جەمىس-جيدەك, ءسۇت ونىمدەرى, جۇمىرتقا, تاعى دا باسقا ازىق-ت ۇلىكتەر بار. بۇگىن, ياعني 10 قىركۇيەك كۇنى كونگرەسس-حولل سارايىندا «تالدىقورعان — كەشە, بۇگىن, ەرتەڭ» اتتى كورمە اشىلىپ, شاھاردىڭ تاريحى مەن قازىرگى ساۋلەتىنەن سىر شەرتەتىن فوتوسۋرەتتەر جۇرتشىلىق نازارىنا ۇسىنىلادى. ارتىنشا وسى مادەنيەت وشاعىندا الماتى وبلىسى شىعارماشىلىق ۇجىمدارىنىڭ قاتىسۋىمەن «جەتىسۋ – جۇماق مەكەنىم» اتتى گالا-كونتسەرت وتەدى. ارنۇر اسقار, «ەگەمەن قازاقستان»