ماكەدونيانىڭ تولىمدى تارتۋى

ەلورداداعى ۇلتتىق اكادەميالىق كىتاپحانادا ماكەدونيا بۇرىشى اشىلدى. بۇل رەسمي شارا ماكەدونيانىڭ ەلىمىزدەگى مادەني كۇندەرى اياسىندا ءوتتى. كىتاپ سورەسىنە الەمنىڭ بىرنەشە تىلدەرىنە اۋدارىلعان 135 تومدىق كوركەم ادەبيەت پەن زەرتتەۋ ەڭبەكتەرى قويىل­دى. ماكەدونيا رەسپۋب­لي­كا­سىنىڭ استاناسى – سكوپەدەگى اۋليە كليمەنت وحريدسكي اتىنداعى ۋنيۆەرسيتەت كىتاپ­حاناسىنىڭ تارتۋى ەكى ەل اراسىنداعى مادەني قا­رىم-قاتىناستى ارتتىرۋعا باعىتتالىپ وتىر. رەسمي شاراعا ۇلتتىق اكادەميالىق كىتاپحانا ديرەكتورى ءۇمىتحان مۇڭالباەۆا, ماكەدونيا رەس­­­پۋبليكاسىنىڭ قازاق­ستانداعى توتەنشە جانە وكى­لەتتى ەلشىسى يليا پسال­تيروۆ, ماكە­دونيا رەس­پۋبليكاسى سىرت­قى ءىس­­تەر مينيسترلىگىنىڭ ەۋرو­پا­لىق ەمەس مەملەكەتتەر دەپارتامەنتىنىڭ ديرەكتورى نەناد كولەۆ مىرزا قاتىستى. ايتا كەتەيىك, مادە­ني كۇندەر اياسىندا ماكەدو­نيا­نىڭ «سينتەزيس» ەتنوتوبى ەلىمىزدىڭ ەكى ءىرى قالا­سىندا كونتسەرت قويدى. ال­دىمەن 3 قىركۇيەك كۇنى ال­ماتى قالاسىندا جام­بىل اتىنداعى قازاق مەم­لەكەتتىك فيلارمونياسىندا مەملەكەتتىك اكادەميالىق سيمفونيالىق وركەستردىڭ سۇيەمەلدەۋىمەن كوپشىلىك نازارىنا ماكەدونيانىڭ ۇلتتىق ونەرى ۇسىنىلسا, «سينتەزيس» توبىنىڭ مەم­لەكەتتىك اكادەميالىق سيم­فونيالىق وركەسترىمەن ءبىر­لەسكەن ەكىنشى كونتسەرتى 6 قىركۇيەك كۇنى قازاق ۇلتتىق ونەر اكادەمياسىندا ۇيىمداستىرىلدى. «سينتەزيس» ەتنو-توبى 1995 جىلى ماكەدون ۇلتتىق فولكلورىن ساقتاۋ جانە ناسي­حاتتاۋ ماقساتىندا قۇ­­رىلعان. جيىرما جىلدان استام ۋاقىت ىشىندە الەم­نىڭ تۇكپىر-تۇكپىرىن ارالاپ, 700 كونتسەرت بەرگەن. اتاپ ايت­قاندا, ۆەنگريا, سلوۆەنيا, اۆستريا, يتاليا, گەرمانيا, گرەكيا, سەربيا, پورتۋگاليا, يسپانيا, بەل­گيا, پولشا, فرانتسيا, شۆەتسيا, اقش, جاپونيا, اۆستراليا سەكىلدى ەلدەر تۇرعىندارىنىڭ ەرەكشە ءىلتي­پاتىنا بولەنگەن. التى CD البومى مەن ماكەدونيا فيلارمونياسىنىڭ وركەس­ترىمەن بىرىگىپ وتكىزگەن كون­تسەرتىنىڭ DVD نۇسقاسى جا­رىق كورگەن. «ەگەمەن-اقپارات»