باقىتجان ساعىنتاەۆ - قازاقستاننىڭ پرەمەر-ءمينيسترى

قازاقستان پرەزيدەنتى نۇرسۇلتان نازارباەۆ پارلامەنت ءماجىلىسىنىڭ جالپى وتىرىسىنا قاتىستى, دەپ حابارلادى پرەزيدەنتتىڭ ءباسپاسوز قىزمەتى. وتىرىس بارىسىندا مەملەكەت باسشىسى پرەمەر-مينيستر ك.ءماسىموۆ باستاعان ۇكىمەتتىڭ وتستاۆكاسىن قابىل العانىن تاعى دا اتاپ ءوتتى. سونداي-اق, نۇرسۇلتان نازارباەۆ ك.ماسىموۆكە جانە ۇكىمەت مۇشەلەرىنە اتقارعان جۇمىستارى ءۇشىن العىس ايتىپ, قىزمەتتەرىندەگى كۇردەلى كەزەڭگە قاراماستان العا قويىلعان بارلىق مىندەتتەردىڭ ورىندالعانىن ايتتى. كونستيتۋتسيانىڭ 44-بابىنا سايكەس, ەلباسى پارلامەنت ءماجىلىسىنىڭ قاراۋىنا قازاقستان رەسپۋبليكاسى پرەمەر-ءمينيسترى لاۋازىمىنا باقىتجان ساعىنتاەۆتىڭ كانديداتۋراسىن ۇسىندى. – وبلىستاردىڭ, استانا مەن الماتى قالالارى اكىمدەرىنىڭ قاتىسۋىمەن وتكەن ۇكىمەتتىڭ بۇگىنگى كەڭەيتىلگەن وتىرىسىندا جاڭا مينيسترلەر كابينەتى شەشۋگە ءتيىستى بىرقاتار جاڭا مىندەتتەر قويدىم. الەمدىك ەكونوميكا مەن ساياساتتىڭ قازىرگى تۇراقسىزدىعى جاعدايىندا ستراتەگيالىق باعدارلامالارىمىزدى ىسكە اسىرۋدى جالعاستىرۋ ماڭىزدى. ۇكىمەتتەن بارلىق باعىت بويىنشا ناقتى, ساۋاتتى جۇمىس تالاپ ەتىلەدى. باقىتجان ساعىنتاەۆ جاڭا ۇكىمەت جۇمىسىنىڭ ساباقتاستىعى مەن تيىمدىلىگىن ساقتاۋ ءۇشىن لايىقتى كانديداتۋرا دەپ ويلايمىن, – دەدى نۇرسۇلتان نازارباەۆ. ءماجىلىس دەپۋتاتتارى پرەمەر-مينيستر لاۋازىمىنا ۇسىنىلعان ب.ساعىنتاەۆتىڭ كانديداتۋراسىن ءبىراۋىزدان ماقۇلدادى. ب.ساعىنتاەۆ كورسەتىلگەن سەنىم ءۇشىن العىس ءبىلدىرىپ, جۇكتەلگەن مىندەتتەردى ورىنداۋعا بار كۇش-جىگەرى مەن ءبىلىمىن جۇمسايتىنىن ايتتى.   باقىتجان ساعىنتاەۆ قازاقستان ۇكىمەتىنىڭ باسشىسى بولىپ بەكىتىلدى. ونىڭ كانديداتۋراسىن ءماجىلىس دەپۋتاتتارى ماقۇلدادى دەپ حابارلايدى ەگەمەن-اقپارات. مەملەكەت باسشىسى باقىتجان ساعىنتاەۆتى قازاقستان رەسپۋبليكاسىنىڭ پرەمەر-ءمينيسترى قىزمەتىنە تاعايىنداۋ تۋرالى جارلىققا قول قويدى. «ب.ءا. ساعىنتاەۆتى قازاقستان رەسپۋبليكاسىنىڭ پرەمەر-ءمينيسترى قىزمەتىنە تاعايىنداۋ تۋرالى» جارلىق باقىتجان ءابدىر ۇلى ساعىنتاەۆ قازاقستان رەسپۋبليكاسىنىڭ پرەمەر-ءمينيسترى بولىپ تاعايىندالسىن. قازاقستان رەسپۋبليكاسىنىڭ پرەزيدەنتى ن.نازارباەۆ   باقىتجان ءابدىر ۇلى ساعىنتاەۆتىڭ ءومىربايانى مەن ەڭبەك جولى 1963 جىلى 13 قازاندا جامبىل وبلىسى تالاس اۋدانى ءۇشارال اۋىلىندا تۋدى. س.م. كيروۆ اتىنداعى قازاق مەملەكەتتىك ۋنيۆەرسيتەتىن ءبىتىردى, ەكونوميكا عىلىمدارىنىڭ كانديداتى. ەڭبەك جولىن الما-اتا حالىق شارۋاشىلىعى ينستيتۋتىنىڭ ساياسي ەكونوميكا كافەدراسىنىڭ وقىتۋشىسى بولىپ باستادى. 1988-1992 جىلدار ارالىعىندا س.م. كيروۆ اتىنداعى قازاق مەملەكەتتىك ۋنيۆەرسيتەتىندە جۇمىس ىستەدى, اسسيستەنت لاۋازىمىنان الەۋمەتتانۋ كافەدراسىنىڭ دوتسەنتىنە دەيىنگى جولدى ءوتتى. 1992 جىلدان 1998 جىلعا دەيىن كاسىپكەرلىك قىزمەتپەن اينالىستى. 1998 جىلى جامبىل وبلىسى اكىمىنىڭ ورىنباسارى بولىپ تاعايىندالدى. 1999 جىلدان 2002 جىلعا دەيىن قازاقستان رەسپۋبليكاسىنىڭ شاعىن بيزنەستى قولداۋ جونىندەگى اگەنتتىگى توراعاسىنىڭ ورىنباسارى, «شاعىن كاسىپكەرلىكتى دامىتۋ قورى» جاق باسقارماسىنىڭ توراعاسى, قازاقستان رەسپۋبليكاسىنىڭ تابيعي مونوپوليالاردى رەتتەۋ, باسەكەلەستىكتى قورعاۋ جانە شاعىن بيزنەستى قولداۋ جونىندەگى اگەنتتىگى توراعاسىنىڭ ورىنباسارى لاۋازىمدارىندا قىزمەت ەتتى. 2002 جىلدان 2004 جىلعا دەيىن قازاقستان رەسپۋبليكاسىنىڭ تابيعي مونوپوليالاردى رەتتەۋ جانە باسەكەلەستىكتى قورعاۋ جونىندەگى اگەنتتىگى توراعاسىنىڭ ءبىرىنشى ورىنباسارى بولىپ جۇمىس ىستەدى. 2004 جىلدان 2007 جىلعا دەيىن – قازاقستان رەسپۋبليكاسىنىڭ تابيعي مونوپوليالاردى رەتتەۋ جونىندەگى اگەنتتىگىنىڭ توراعاسى بولدى. 2007 جىلدان 2008 جىلعا دەيىن قازاقستان رەسپۋبليكاسى پرەمەر-ءمينيسترى كەڭسەسىنىڭ باسشىسى بولدى. 2008 جىلعى 30 قىركۇيەكتە پاۆلودار وبلىسىنىڭ اكىمى بولىپ تاعايىندالدى. 2012 جىلدىڭ 20 قاڭتارىندا – قازاقستان  رەسپۋبليكاسىنىڭ  ەكونوميكالىق دامۋ جانە  ساۋدا ءمينيسترى   بولىپ تاعايىندالدى. 2012 جىلدىڭ 24 قىركۇيەگىنەن باستاپ – «نۇر-وتان» حدپ  توراعاسىنىڭ ءبىرىنشى ورىنباسارى بولىپ قىزمەت ەتتى. 2013 جىلدىڭ 16 قاڭتارىندا مەملەكەت باسشىسىنىڭ جارلىعىمەن  قر پرەمەر-ءمينيسترىنىڭ ءبىرىنشى ورىنباسارى - وڭىرلىك دامۋ  ءمينيسترى بولىپ تاعايىندالدى. 2013 جىلدىڭ 6 قاراشاسىندا مەملەكەت باسشىسىنىڭ جارلىعىمەن پرەمەر-ءمينيستردىڭ ءبىرىنشى ورىنباسارى - قر وڭىرلىك دامۋ ءمينيسترى قىزمەتىنەن بوساتىلىپ, قر پرەمەر-ءمينيسترىنىڭ ءبىرىنشى ورىنباسارى بولىپ تاعايىندالدى. «قۇرمەت» وردەنىمەن  جانە مەرەيتويلىق مەدالدارمەن  ماراپاتتالعان. تابيعي مونوپوليالار سالاسىن مەملەكەتتىك  رەتتەۋ,  شاعىن جانە ورتا بيزنەستى دامىتۋ تاقىرىپتارىنا ارنالعان  بىرقاتار  عىلىمي جۇمىستىڭ اۆتورى. ۇيلەنگەن,   ەكى بالاسى بار.

---