اۋدانداردا دا مەدياتسيا كابينەتتەرى اشىلۋدا

وبلىس اكىمى بەردىبەك ساپارباەۆ پەن وبلىستىق سوتتىڭ توراعاسى مۇراعالي اكەتاي قۇقىقتىق داۋلاردى رەتتەۋ ءۇشىن تاتۋلاستىرۋ ءراسىمى ينستيتۋتىن دامىتۋ ماسەلەلەرى بويىنشا وتكەن كەڭەس بارىسىندا ءوزارا ىنتىماقتاستىق جونىندەگى مەموراندۋمعا قول قويدى. قازىرگى كۇنى تاتۋلاستىرۋ ءراسىمى مەن داۋلاردى شەشۋدىڭ بالاما جولدارىن كەڭىنەن قولدانۋ جانە ونى تۇسىندىرۋگە ەرەكشە نازار اۋدارىلىپ وتىر. وڭىردە وسى باعىتتا تۇراقتى تۇردە ماقساتتى جانە جۇيەلى جۇمىستار جۇرگىزىلىپ, وڭ ناتيجەلەرگە قول جەتكىزىلۋدە. – ادام قۇقىقتارىن قورعاۋ تەتىك­تەرىن جەتىلدىرۋدىڭ باسىم باعىت­­تارىنىڭ ءبىرى – تاتۋلاستىرۋ ءراسىمى جانە داۋلاردى سوتقا دەيىنگى شەشۋدىڭ بالاما جولدارى, سونىڭ ىشىندە مەدياتسيا ينستيتۋتىن قولدانۋ. ونىڭ ەرەكشەلىگى – تاراپتاردىڭ بارلىق ماسەلەنى سوت پروتسەسىنە دەيىن شە­شە الاتىندىعىندا. ەڭ الدىمەن سوتتاردىڭ جۇمىسى جەڭىلدەيدى, سونداي-اق, زاڭدى جانە جەكە تۇلعالارعا مەملەكەتتىك باج سوماسى قايتارىلادى, – دەپ اتاپ ءوتتى ءوڭىر باسشىسى. ونىڭ ايتۋىنشا, قازىرگى تاڭدا وبلىس اۋداندارىنىڭ اكىمدىكتەرىندە مەدياتسيا كابينەتتەرى اشىلىپ جاتىر. ماسەلەن, قالاداعى مەدياتسيا ورتالىعى قازاقستان حالقى اسسامبلەياسى عيماراتىندا اشىلدى. جىل باسىنان بەرى تاتۋلاستىرۋ ءراسىمىن قولدانۋ ناتيجەسىندە 724 ازاماتتىق ءىس اياقتالدى, ونىڭ 509-ى كەلىسىمگە كەلۋ ارقىلى شەشىلدى, 190 ءىس بويىنشا تاراپتار مەدياتسياعا جۇگىندى, جەكە جانە زاڭدى تۇلعالارعا 72 ميلليون تەڭگە كولەمىندە مەملەكەتتىك باج قايتارىلدى. الداعى ۋاقىتتا ءاربىر اۋداندا اشىلاتىن مەدياتسيا كابينەتتەرى تۇرعىندارعا تۇرعىلىقتى مەكەننەن شىقپاي-اق, داۋدى شەشۋ جانە ىمىراعا قول جەتكىزۋ ماقساتىندا كاسىبي ەمەس مەدياتورلارعا جۇگىنۋگە مۇمكىندىك بەرەدى. اكىمدىكتەر جانىن­داعى مەدياتسيا كابينەتتەرى, سونداي-اق, ازاماتتاردى سوت جانە كولىك شىعىندارىنان بوساتادى. ويتكەنى, مىندەتتى مەملەكەتتىك باجدى جانە وكىلدەردىڭ قىزمەتىن تولەۋ قاجەتتىلىگى بولمايدى. ساتىبالدى ءساۋىرباي, «ەگەمەن قازاقستان» اقتوبە وبلىسى