جاڭا يننوۆاتسيالىق دامۋ جولى
قىتاي حالىق رەسپۋبليكاسىنىڭ توراعاسى سي ءتسزينپيننىڭ ءباسپاسوز ءماسليحاتىندا ايتقان «G20 ءسامميتى تابىستى ءوتتى. سوڭعى ەكى كۇندە جاھاندىق باسقارۋ ساياساتىن كۇشەيتۋ, ساۋدا مەن قارجى جۇيەسىن دامىتۋ جونىندە پىكىرتالاستار بولدى. سامميت قورىتىندىسى بويىنشا قابىلدانعان كومميۋنيكە باعداردى بەلگىلەپ, ماقساتتى ايقىندادى» دەگەن ءسوزىن كەلتىرگەن.
«ءبىز الەمدىك ەكونوميكانىڭ جاڭا يننوۆاتسيالىق دامۋ جولى جونىندە ۋاعدالاستىق. فيسكالدىق جانە مونەتارلىق ساياساتقا نەگىزدەلگەن ەسكى جولدان ايىرماسى, بىزگە ءوسىمدى يننوۆاتسيا ارقىلى ىنتالاندىرۋ قاجەت», دەدى قحر توراعاسى.
اقپارات اگەنتتىگى سونداي-اق سامميتكە قاتىسۋشىلار الەمدىك ەكونوميكا مەن قارجىنى باسقارۋ ءىسىن جاقسارتۋ ماسەلەلەرى بويىنشا ءبىر مامىلەگە قول جەتكىزگەنىنە نازار اۋدارىپ, «ءبىز الەمدىك شارۋاشىلىقتىڭ ورنىقتىلىعىن ارتتىرۋ ءۇشىن جاھاندىق ەكونوميكا مەن قارجىنى باسقارۋ ءىسىن جاقسارتۋ تۋرالى شەشىم قابىلدادىق. كۆوتالار رەفورماسىن جانە حالىقارالىق قارجى ينستيتۋتتارىنداعى داۋىستار ءبولىنىسىن ىلگەرىلەتۋگە شەشىم قابىلدادىق. حالىقارالىق ۆاليۋتا قورى رەفورمالار جوسپارىن كەستەگە سايكەس ورىنداۋ ماقساتىندا جۇمىس ىستەيتىنىنە سەنىم بىلدىردىك», – دەگەن سي ءتسزينپيننىڭ سوزىنە سىلتەمە جاساعان.
قازاقستان پرەزيدەنتىنەن ۇلگى الۋ كەرەك
«قازاقستان «ۇلكەن جيىرمالىق» قۇرامىنا كىرمەيدى, بىراق نۇرسۇلتان نازارباەۆ قىتاي حالىق رەسپۋبليكاسىنىڭ توراعاسى سي تسزينپين تاراپىنان «ەكى ەلدىڭ ىنتىماقتاستىق دەڭگەيى جوعارى بولۋى سەبەپتى» سامميتكە شاقىرىلدى», – دەپ جازادى پورتال. اتالعان پورتال, سونداي-اق, جوعارعى رادانىڭ دەپۋتاتى ولەگ لياشكونىڭ فەيسبۋكتەگى جازباسىنا سىلتەمە جاساي وتىرىپ, ونىڭ «ۋكراينا بيلىگى قازاقستان پرەزيدەنتىنەن ۇلگى الۋى ءتيىس» دەگەن ءسوزىن دە كەلتىرە كەتكەن.
تاريحي بەتبۇرىستى كەزەڭ
ءوز ەلىندە الەمدىك 20 ءىرى دەرجاۆانىڭ باسشىلارىن قابىلداعان قىتاي حالىق رەسپۋبليكاسىنىڭ توراعاسى سي تسزينپين جينالعاندارعا جاھاندىق ەكونوميكا تاريحي بەتبۇرىستى كەزەڭدە تۇرعانىن مالىمدەدى, دەپ حابارلادى ۆۆس-ءدىڭ ورىس قىزمەتى.
وسى جولعى ءسامميتتىڭ ەكونوميكالىق ءمان-ماڭىزىنا باسا نازار اۋدارعان اتالعان اقپارات قۇرالى قىتاي كوشباسشىسىنىڭ «سۇرانىس قۇلدىراپ, ساۋدا مەن ينۆەستيتسيا اعىنى باسەڭدەۋى سەبەپتى نارىقتار تۇراقسىز بولعان كەزەڭدە «بوس سوزدەردەن» قاشقان ءجون» دەگەن مالىمدەمەسىن العا تارتقان.
G20 سامميتىندە جالپى ەكونوميكالىق پروبلەمالارمەن قاتار بولات ءوندىرۋ يندۋسترياسىنداعى داعدارىس, بريتانيانىڭ ەۋروپالىق وداقتان شىعۋى, سونداي-اق, ترانسۇلتتىق كورپوراتسيالارعا سالىق سالۋعا قاتىستى ماسەلەلەر تالقىلاندى.
