ەلشىنىڭ «ەگەمەنگە» العىسى

جۋىردا جاپونيانىڭ قازاقستانداعى ەلشىسى قىزمەتىنە جاڭادان تاعايىندالعان يتيرو كاۆاباتا «ەگەمەن قازاقستان» گازەتىنە كەلىپ, باسىلىم باسشىلىعىمەن كەزدەسكەن بولاتىن. سول كەزدەسۋدە الداعى ۋاقىتتا ءوزىنىڭ باستى مىندەتى ەكى ەلدىڭ ىنتىماقتاستىعىن ودان ءارى كەڭەيتۋ بولاتىنىن اتاپ وتكەن ەلشى «ەگەمەن قازاقستان» گازەتىمەن اراداعى اقپاراتتىق بايلانىستى دامىتۋعا ەرەكشە دەن قوياتىنىن ايتىپ ەدى. مىنە, كوپ ۋاقىت وتپەي سول ۋاعدالاستىق العاشقى ناتيجەسىن بەرە باستادى. وعان جاقىندا گازەتىمىزدە جاريالانعان جاپونيانىڭ پارلامەنتتىك ۆيتسە-ءمينيسترى موتومە تاكيساۆانىڭ ماقالاسى ءبىر مىسال. گازەتىمىزدىڭ 27 تامىز كۇنگى نومىرىندە جارىق كورگەن «تاعدىرلاس ەلدەردەن – تاعىلىم» اتتى بۇل ماقالادا جاپونيانىڭ پارلامەنتتىك ۆيتسە-ءمينيسترى ەلىمىزدە وتكەن سەمەي يادرولىق پوليگونى جابىلۋىنىڭ 25 جىلدىعىنا ارنالعان حالىقارالىق كونفەرەنتسيا جايىنداعى ويىمەن ءبولىستى. وندا جاپونيا مەن قازاقستاننىڭ يادرو زاردابىن تارتۋدا ۇقساس تاعدىرلارىن مىسالعا كەلتىرىپ, ەلىمىز اتوم قارۋىنا قاتىستى شىنايى اقيقاتتى ەرەكشە تۇسىنەتىن مەملەكەت بولىپ سانالاتىنىن جەتكىزدى. سونداي-اق, ول اتالعان كونفەرەنتسيانىڭ وتكىزىلۋىن قۇپتاي وتىرىپ, قازاقستاننىڭ وسى ماسەلەدەگى كوشباسشىلىق رولىنە قۇرمەت سەزىمىن ءبىلدىردى. ال كەشە «ەگەمەن قازاقستان» گازەتىنىڭ باسشىلىعىنا جاپونيانىڭ قازاقستانداعى ەلشىسى يتيرو كاۆاباتا بۇل ماقالانىڭ گازەتىمىزدە جارىق كورۋىنە ىقپال ەتىپ, قولداۋ بىلدىرگەنى ءۇشىن ريزاشىلىعىن ايتىپ, العىس حات جولدادى. «بولاشاقتا دا ءبىزدىڭ ەكىجاقتى ىنتىماقتاستىعىمىز ءارى قاراي جالعاسىن تابادى دەپ سەنەمىن» دەلىنگەن ەلشىنىڭ حاتىندا. ءيا, «ەلدەستىرمەك – ەلشىدەن» دەگەن وسىنداي بولسا كەرەك-ءتى. «ەگەمەن-اقپارات»