نۇرسۇلتان نازارباەۆ G20 ءسامميتى اياسىندا كەزدەسۋلەر وتكىزدى - اقوردا

  ەۋرووداق باسشىسىمەن كەزدەسۋ   مەملەكەت باسشىسى سونىمەن قاتار ەۋروپالىق كوميسسيانىڭ توراعاسى جان-كلود يۋنكەرمەن كەزدەستى كەزدەسۋ بارىسىندا قازاقستان مەن ەۋروپالىق وداق اراسىنداعى ساياسي جانە ساۋدا-ەكونوميكالىق بايلانىستى نىعايتۋ پەرسپەكتيۆالارى قاراستىرىلدى. تاراپتار ەلىمىز بەن ەو اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمنىڭ ماڭىزدىلىعىن اتاپ ءوتىپ, قارىم-قاتىناستىڭ ودان ءارى قارقىندى دامي بەرەتىنىنە سەنىم ءبىلدىردى. كانادا ۇكىمەتىنىڭ باسشىسىمەن كەزدەسۋ قازاقستان پرەزيدەنتى G20 ءسامميتى اياسىندا كانادانىڭ پرەمەر-ءمينيسترى دجاستين تريۋدومەن كەزدەستى. كەزدەسۋ بارىسىندا قازاقستان مەن كانادا اراسىنداعى ىنتىماقتاستىقتىڭ ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالار ءتارىزدى باستى باعىتتارىنا قاتىستى پىكىر الماسىلدى. بۇدان بولەك, حالىقارالىق دامۋدىڭ كوپتەگەن ماسەلەلەرى بويىنشا ۇستانىمنىڭ ورتاقتىعى, سونداي-اق ءتۇرلى سالالاردا, سونىڭ ىشىندە اۋىل شارۋاشىلىعى سالاسىندا ەكىجاقتى ءوزارا ءىس-قيمىلدى نىعايتۋ ءۇشىن زور الەۋەت بار ەكەنى ايتىلدى. كەزدەسۋ سوڭىندا نۇرسۇلتان نازارباەۆ د.تريۋدونى استاناعا ساپارمەن كەلۋگە شاقىردى.   ۇلىبريتانيانىڭ جاڭا پرەمەرىمەن كەزدەستى   مەملەكەت باسشىسى سونىمەن قاتار ۇلىبريتانيا پرەمەر-ءمينيسترى تەرەزا مەيمەن كەزدەستى. نۇرسۇلتان نازارباەۆ پەن تەرەزا مەي ەلدەر اراسىنداعى ەكىجاقتى ءوزارا قارىم-قاتىناس ماسەلەلەرىن تالقىلادى, سونداي-اق حالىقارالىق كۇن تارتىبىندەگى وزەكتى ماسەلەلەردى قاراستىردى. مەملەكەت باسشىسى ن.نازارباەۆ د.كەمەروننىڭ پرەمەر-مينيستر بولعان كەزىندە ءوزارا ءىس-قيمىل مەن ىنتىماقتاستىقتىڭ جوعارى دەڭگەيىنە قول جەتكىزىلگەنىن اتاپ ءوتىپ, ت.مەيدى ەلىمىزگە ساپارمەن كەلۋگە شاقىردى.   رەجەپ تايپ ەردوعانمەن كەزدەسۋ   نۇرسۇلتان نازارباەۆ G20 ءسامميتى اياسىندا تۇركيا رەسپۋبليكاسىنىڭ پرەزيدەنتى رەجەپ تايپ ەردوعانمەن كەزدەستى. كەزدەسۋ بارىسىندا ەكىجاقتى ىنتىماقتاستىقتىڭ كەڭ اۋقىمدى ماسەلەلەرى قاراستىرىلدى. تاراپتار وڭىرلىك جانە حالىقارالىق كۇن تارتىبىندەگى بىرقاتار وزەكتى ماسەلەلەر, سونىڭ ىشىندە تاياۋ شىعىس پەن ورتالىق ازياداعى جاعداي جونىندە دە پىكىر الماستى. اتاپ ايتقاندا, مەملەكەت باسشىسى جاھاندىق تەرروريزممەن جانە ەكسترەميزممەن كۇرەستە حالىقارالىق قوعامداستىقتىڭ كۇشىن جۇمىلدىرىپ, ءىس-قيمىلدى ناقتى ۇيلەستىرۋ قاجەتتىگىن اتاپ ءوتتى.