ەلباسى اقش پرەزيدەنتى باراك وبامامەن كەزدەستى

قازاقستان پرەزيدەنتى نۇرسۇلتان نازارباەۆ قىتاي حالىق رەسپۋبليكاسىنىڭ حانچجوۋ قالاسىندا ءوتىپ جاتقان G20 ءسامميتى اياسىندا امەريكا قۇراما شتاتتارىنىڭ پرەزيدەنتى باراك وبامامەن كەزدەستى. بۇل تۋرالى akorda.kz حابارلادى. كەزدەسۋ بارىسىندا تاراپتار بىرقاتار ماڭىزدى سالالارداعى ەكىجاقتى ءوزارا ءىس-قيمىلدىڭ قازىرگى جاعدايى مەن دامۋ پەرسپەكتيۆالارىن تالقىلادى. ەكى ەلدىڭ كوشباسشىلارى حالىقارالىق كۇن تارتىبىندەگى وزەكتى ماسەلەلەر جونىندە دە پىكىر الماستى. مەملەكەت باسشىسى ن.نازارباەۆ ب.وبامانىڭ پرەزيدەنتتىگى كەزىندە ەكى ەل اراسىنداعى ىنتىماقتاستىق كوپتەگەن باعىتتار بويىنشا, سونىڭ ىشىندە يادرولىق قارۋدى تاراتپاۋ جانە قارۋسىزدانۋ سالاسىندا جاڭا دەڭگەيگە كوتەرىلگەنىن اتاپ ءوتتى. ب.وباما نۇرسۇلتان نازارباەۆتىڭ امەريكا قۇراما شتاتتارى ءۇشىن جاقىن دوس جانە سەنىمدى سەرىكتەس ەكەنىن ايتىپ, ءوزىنىڭ پرەزيدەنتتىك مەرزىمى اياقتالعاننان كەيىن دە ءوزارا تىعىز ءىس-قيمىل جاساۋعا ءازىر ەكەنىن جەتكىزدى. كەزدەسۋ سوڭىندا قازاقستان پرەزيدەنتى اقش پرەزيدەنتى ب.وبامانى ەلىمىزگە ساپارمەن كەلۋگە شاقىردى. تالعات رايىمبەك فوتو: فوتو: vlast.kz