ەلباسى "Alibaba Group" باسشىسى دجەك مامەن كەزدەستى

قىتايدىڭ حانچجوۋ قالاسىندا ءوتىپ جاتقان G20 ءسامميتى بارىسىندا پرەزيدەنت نۇرسۇلتان نازارباەۆ "Alibaba Group" ديرەكتورلار كەڭەسىنىڭ توراعاسى دجەك مامەن كەزدەستى دەپ حابارلايدى akorda.kz. كەزدەسۋ بارىسىندا كومپانيامەن ىنتىماقتاستىقتى دامىتۋ جانە ونىڭ قازاقستانداعى قىزمەتى اياسىن كەڭەيتۋ پەرسپەكتيۆالارى, سونىڭ ىشىندە ەلەكتروندى كوممەرتسيا مەن تولەم جۇيەلەرىن ينتەگراتسيالاۋ سالاسىنداعى بىرلەسكەن جوبالاردى ىسكە اسىرۋ ماسەلەلەرى تالقىلاندى. مەملەكەت باسشىسى ءبىزدىڭ ەل قىتايداعى ەلەكتروندى ساۋدا سالاسىنىڭ ۇزدىگى بولىپ سانالاتىن جانە سول باعىتتا زور جەتىستىككە جەتكەن «Alibaba Group» قىزمەتىنىڭ تاجىريبەسىن زەرتتەۋگە مۇددەلى ەكەنىن اتاپ ءوتتى. – مەن ءسىزدىڭ كومپانيامەن سەرىكتەستىكتى قولدايمىن. ءبىزدىڭ ۇلتتىق كومپانيامىز – «قازپوشتانىڭ» «Alibaba Group» كومپانياسىمەن ءوزارا ءتيىمدى ءىس-قيمىل جاساۋعا بارلىق مۇمكىندىگى بار. جالپى, سىزدەردىڭ كومپانيالارىڭىز ءتارىزدى كاسىپورىندار الەمدىك ەكونوميكانىڭ ورنىقتى دامۋى مەن تۇراقتىلىقتىڭ فاكتورى بولىپ سانالادى. الەمدى ساياسي فراگمەنتاتسيالاۋ, شەكارالاردى جابۋ جانە ءوزارا سانكتسيا سالۋ بەلەڭ العان قازىرگىدەي جاعدايدا سىزدەر بۇل كەدەرگىلەردى تابىستى ەڭسەرىپ, حالىقارالىق ساۋدانىڭ دامۋىنا ىقپال ەتىپ وتىرسىزدار, – دەدى نۇرسۇلتان نازارباەۆ. د.ما قازاقستاندا كومپانيانىڭ باستامالارىنا قولداۋ كورسەتىلىپ وتىرعانى ءۇشىن العىس ايتىپ, الداعى كەزەڭگە ارنالعان جۇمىس جوسپارلارى تۋرالى ايتىپ بەردى. سونداي-اق, «Alibaba Group» ديرەكتورلار كەڭەسىنىڭ توراعاسى ەلىمىزبەن سەرىكتەستىك قارىم-قاتىناستىڭ ودان ءارى دامي بەرەتىنىنە سەنىم ءبىلدىردى.