استانادا مارافون مارەگە جەتتى

استانادا قايىرىمدىلىق ماقساتتا ۇيىمداستىرىلعان ءداستۇرلى مارافون اياقتالدى. بۇل جارىستا ءبىرىنشى بولىپ مارەگە «اديداس» كومانداسىنىڭ وكىلى رۋسلان اگلوۆ كەلىپ جەتتى. ونى مارەدە پرەمەر-مينيستر كارىم ءماسىموۆ قۇتتىقتاپ, مەدال تاپسىردى. بۇگىنگى ەستافەتاعا قالانىڭ قاراپايىم حالقى مەن ۇكىمەت مۇشەلەرى, بىرنەشە وتاندىق جانە حالىقارالىق كومپانيالاردىڭ وكىلدەرى, ەلشىلىكتەردىڭ قىزمەتكەرلەرى, الىس جانە جاقىن ەلدەردىڭ سپورتشىلارى قاتىستى. قولدا بار مالىمەتكە قاراعاندا بۇگىن جۇگىرۋ جارىسىنا 5 مىڭنان استام ادام شىقتى. ولار تاڭەرتەڭنەن باستاپ تۇسكى ساعات 14.00-گە دەيىن جۇگىرۋدەن جارىستى. شەتەلدىك قوناقتاردىڭ اراسىندا استاناعا قىزمەت بابىمەن جانە دەمالۋعا كەلگەن امەريكا, افريكا, ازيا مەن ەۋروپا ەلدەرىنىڭ ازاماتتارى بولدى. بۇل سىندا ۇكىمەت باسشىسى كارىم ءماسىموۆ 21,1 شاقىرىم قاشىقتىقتى 2 ساعاتتا جۇگىرىپ ءوتتى. ودان مادەنيەت جانە سپورت ءمينيسترى ارىستانبەك  مۇحامەدي ۇلى مەن اقپارات جانە كوممۋنيكاتسيالار ءمينيسترى داۋرەن اباەۆ تا قالىسپاي, جارىسقا قاتىستى. ولار مارەگە جەتكەننەن كەيىن  بيىلعى وليمپيادانىڭ چەمپيوندارىمەن جانە جۇلدەگەرلەرىمەن كەزدەسىپ, ەمەن-جارقىن اڭگىمەلەسىپ, بىرگە ەستەلىككە فوتوسۋرەتكە ءتۇستى. پرەزيدەنت اكىمشىلىگىنىڭ جەتەكشىسى ادىلبەك جاقسىبەكوۆ 42,2 شاقىرىمدىق قاشىقتىققا جۇگىردى. ول بۇل شاقىرىمدى 4 cاعات 22 مينۋتتا جۇگىرىپ ءوتتى. بۇل از قاشىقتىق ەمەس. ادىلبەك رىسكەلدى ۇلى فينيشكە كەلگەندە وسىنى جاسىرماي, 42,2 شاقىرىمعا جۇگىرۋدىڭ وڭاي ەمەستىگىن, جارتى جولدا مارافوندى اياقتاۋ ويىندا بولعانىن, دەگەنمەن نامىسقا تىرىسىپ, سوڭىنا دەيىن جۇگىرۋدى ماقسات ەتكەنىن ايتتى. وسىلاي دەي كەلىپ, ول مارافوندى ۇيىمداستىرۋشىلارعا العىسىن ايتىپ, ەلباسىنىڭ حالىقتىڭ سالاماتتى ءومىر سالتىن ۇستانۋعا, سپورتپەن اينالىسۋىنا ەرەكشە ءمان بەرەتىنىن, ونى ەلدىڭ ءبارى قولدايتىنىن, سونىڭ ءبىر دالەلى وسىنداي بۇقارالىق جارىستاردىڭ ءجيى وتكىزىلىپ جاتقانىن اتاپ ءوتتى. بۇگىنگى شاراعا شەتەلدىك وتباسىلار مەن زاعيپ جاندار دا  قاتىستى. كوزى ناشار كورەتىن ايتبەك اۋىلباەۆ دەگەن جىگىت ون شاقىرىمدىق قاشىقتىققا جارىستى. مارافون كەزىندە وعان ارينە, كوپشىلىك ەرىكسىز تاڭدانىستارىن جاسىرمادى. جالپى, مارافون ەسىل, الماتى جانە سارىارقا اۋداندارىن قامتىدى. وعان قاتىسقان ادامدار 42,2 شاقىرىم, 21,1 شاقىرىم, 10 شاقىرىم مەن  ەستافەتالىق جۇگىرۋلەردە باق سىناستى. داستان كەنجالين