اۋقىمدى بايلانىستار ارناسى

وتكەن سەيسەنبىدە اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا مەن بولگاريا ۆيتسە-پرەزيدەنتى مارگاريتا پوپوۆا كەزدەسىپ, ەكىجاقتى قارىم-قاتىناستاردىڭ وزەكتى ماسەلەلەرىن تالقىلادى. كەزدەسۋ بارىسىندا گ.ابدىقالىقوۆا ءبىرىنشى كەزەكتە وسى جىلدىڭ 29 تامىزىندا استانادا وتكەن «يادرولىق قارۋسىز الەم قۇرۋ» اتتى اۋقىمدى حالىقارالىق كونفەرەنتسياعا قاتىسقانى ءۇشىن بولگاريا بيلىگىنىڭ وكىلىنە ءوزىنىڭ ۇلكەن ريزاشىلىعىن ءبىلدىردى. «ءسىز كونفەرەنتسيادا بىرقاتار ماڭىزدى ۇسىنىس جاسادىڭىز. بۇل ۇسىنىستارىڭىز مەملەكەت باسشىسى نۇرسۇلتان نازارباەۆتىڭ الەمدى يادرولىق قارۋدان ازات ەتۋ باستامالارىمەن ۇيلەسىم تابادى», – دەدى مەملەكەتتىك حاتشى. سونىمەن قاتار, گ.ابدىقالىقوۆا ەلىمىزدىڭ نەگىزگى باستامالارىن بولگاريا تاراپى ۇدايى قولداپ كەلە جاتقانىن اتاپ ءوتتى. مەملەكەتتىك حاتشىنىڭ ايتۋىنشا, بولگاريا تاراپى قازاقستاننىڭ دسۇ-عا, بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە قابىلدانۋىنا, استانادا ەكسپو-2017 كورمەسىن وتكىزۋدى, سونداي-اق, ەۋروپالىق وداق ەلدەرىنە قىسقا مەرزىمدى ساپارلار ءۇشىن ۆيزاسىز رەجىمدى ەنگىزۋدى قولداعان. ودان ءارى گ.ابدىقالىقوۆا بولگاريانى قارا تەڭىز ءوڭىرى مەن بالقان تۇبەگىندەگى قازاقستاننىڭ نەگىزگى سەرىكتەستەرىنىڭ ءبىرى بولىپ تابىلاتىنىن ايتا كەلىپ, 2015 جىلى ەلدەر اراسىنداعى تاۋار اينالىمىنىڭ كولەمى 112,9 ملن دوللاردى قۇراعانىن جەتكىزدى. سونداي-اق, ول «نۇرلى جول» ينفراقۇرىلىمدىق دامۋ باعدارلاماسىنىڭ ىسكە اسىرىلۋ بارىسى تۋرالى حاباردار ەتتى. «الداعى 5 جىلدا باعدارلامانىڭ جۇزەگە اسىرىلۋىنا 24 ملرد دوللار ءبولىنىپ, كولىكتىك جوبالار, ونىڭ ىشىندە ۇزىندىعى 7 مىڭ شاقىرىمنان اساتىن «باتىس قىتاي – باتىس ەۋروپا» اۆتوجولى ىسكە قوسىلاتىن بولادى. ءبىز بولگاريانى وسى جوبالارعا قاتىسۋعا شاقىرامىز», – دەدى مەملەكەتتىك حاتشى. سونىمەن قاتار, كەزدە­سۋ ساتىندە گ.ءاب­دىقالىقوۆا الداعى ۋاقىتتا وتە­تىن ەكسپو-2017 حالىقارالىق ماماندان­­دى- رىلعان كورمەسى تۋرالى ايتىپ, بولگا­ريالىق كومپانيالاردى بۇل ءىس-شارانىڭ اياسىندا تەحنولوگيالىق جانە ينفراقۇرى­لىمدىق جوبالاردى جۇزەگە اسىرۋعا اتسالىسۋعا شا­قىردى. بۇدان بولەك, مەملەكەتتىك حاتشى ەكىجاقتى قارىم-قاتىناستاردىڭ ماڭىزدى بولىگى رەتىندە مادەني-گۋمانيتارلىق سالاعا نازار اۋداردى. وسى ورايدا ول قازاقستاندا بولگار مادەنيەتىن دامىتۋ ماقساتىندا بولگار ەتنومادەني بىرلەستىگى جۇمىس ىستەيتىنىن جەتكىزە وتىرىپ, سوفيا ۋنيۆەرسيتەتىندە قازاق ءتىلى مەن قازاقستاننىڭ تاريحى جانە مادەنيەتىن زەردەلەۋ كابينەتى اشىلعانى ءۇشىن بولگاريا جاعىنا ىستىق ىقىلاسىن تانىتتى. كەزدەسۋ سوڭىندا گ.ابدىقالىقوۆا بولگاريا ۆيتسە-پرەزيدەنتى م.پوپوۆاعا ەكى ەل اراسىنداعى ۇنقاتىسۋدى نىعايتۋعا قوسقان ۇلەسى ءۇشىن العىس ايتتى. ال م.پوپوۆا تىلشىلەرگە ارنايى سۇحبات بەرۋ ساتىندە قازاقستاندا تاۋەلسىزدىك العان كەزدەن باستاپ حالىقتىڭ جاعدايىن جاقسارتۋ باعىتىندا قىرۋار جۇمىس اتقارىلعانىن, قازاقستان پرەزيدەنتى نۇرسۇلتان نازارباەۆتىڭ باسشىلىعىمەن ەلىمىزدىڭ قىسقا ۋاقىت ارالىعىندا مول تابىسقا جەتىپ, ابىرويى ارتقانىن اتاپ ءوتتى. جولدىباي بازار, «ەگەمەن قازاقستان»