قاستەرلى قۇندىلىقتار قۇرمەتتەلدى

ورال وڭىرىندە كونستيتۋتسيا كۇنىنە ارنالعان ءىس-شارالار سان الۋاندىعىمەن جانە ءمانى مەن مازمۇنىنىڭ تەرەڭدىگىمەن ەرەكشەلەندى. سولاردىڭ اراسىندا «كونستيتۋتسيا – مەملەكەتتىڭ نەگىزگى زاڭى: وتكەنى, بۇگىنى مەن بولاشاعى» اتتى كونفەرەنتسيانىڭ شوقتىعى بيىك بولدى. وسى باسقوسۋدا ءسوز العان باتىس قازاقستان وبلىسىنىڭ اكىمى التاي كولگىنوۆ ءوز ويىن: تاۋەلسىزدىك جىلدارىندا ەلىمىز بەن بارشا قازاقستان حالقى تەك ءبىر عانا زاڭ ۇستەمدىگىنە باسىمدىق بەرەتىن مەملەكەت پەن ازاماتتىق قوعام قۇرۋعا كىرىستى. وسى ورايدا اتا زاڭىمىزدىڭ الاتىن ورنى ايرىقشا. ونىڭ باستى قاعيدالارى مەن باپتارى قوعامدىق ءومىرىمىزدىڭ بارلىق سالالارىنداعى ىسكە باسشىلىق بولىپ تابىلادى دەپ تۇيىندەدى. قاستەرلى قۇجاتتىڭ ارعى استارى مەن الاتىن ورنىن سارالاپ بەرگەن دوڭگەلەك ۇستەل مەملەكەتتىك قىزمەت ىستەرى مينيسترلىگى باتىس قازاقستان وبلىسى بويىنشا دەپارتامەنتىندە دە ۇيىمداستىرىلدى. بيىلعى كونستيتۋتسيا كۇنى قازاقستان باسشىسى نۇرسۇلتان نازارباەۆتىڭ جارلىعىنا سايكەس بۇدان 25 جىل بۇرىن سەمەي اتوم پوليگونى جابىلۋىمەن تۇسپا-تۇس كەلدى. سوعان سايكەس وبلىس ورتالىعىندا «اق ورامال» اتتى رەسپۋبليكالىق اكتسيا اياسىندا ۇيىمداستىرىلعان شاراعا بەس مىڭنان استام ايەلدەر قاتىستى. – اق ورامال – ار-وجدان مەن ايبىننىڭ نىشانى. بۇل ءوزارا تۇسىنىستىك پەن كەلىسىمگە شاقىرا ءبىلۋدىڭ تاپتىرماس جولى. حالقىمىزدىڭ ارعى-بەرگى تاريحىندا ورتاعا تاستالعان اق ورامالدى ەشكىم اتتاپ وتپەگەنى بەلگىلى. اق ورامال – حالقىمىزدىڭ اينىماس سالت-داستۇرلەرى قاتارىنان ورىن الاتىن كيەلى قۇندىلىقتاردىڭ ءبىرى. بۇگىنگى اكتسيانىڭ «اق ورامال» اتاۋىن يەلەنگەنى وسى قۇندىلىقتىڭ ءباسى مەن مارتەبەسى بۇگىنگى كۇنى ارتا تۇسپەسە, كەمىمەگەنىن كورسەتەدى, – دەدى مىڭداعان ايەلدەر جينالعان جايىق جاعالاۋىنداعى باسقوسۋدا قازاقتىڭ بەلگىلى اقىن قىزى اقۇشتاپ باقتىگەرەەۆا. تەمىر قۇسايىن, «ەگەمەن قازاقستان» ورال