بوكس. عالىم كەنجەباەۆ: «باسەكە بار جەردە ناتيجە بار»

بوكستان قازاقستاننىڭ جاستار قۇراما كومانداسى گەرمانيانىڭ ودەردەگى فرانكفۋرت قالاسىندا وتكەن ءداستۇرلى براندەنبۋرگ كۋبوگى تۋرنيرىنەن كەلدى. بۇل سىندا بوكسشىلارىمىز 4 التىن, 3 كۇمىس جانە 2 قولا مەدال يەلەندى. بوكسشىلاردىڭ وسى جەڭىسىنە بايلانىستى جاستار قۇراما كومانداسىنىڭ باس جاتتىقتىرۋشىسى عالىم كەنجەباەۆ گەرمانيادا وتكەن تۋرنير تۋرالى egemen.kz سايتىنا ويلارىمەن ءبولىستى. –بيىلعى تۋرنيردە باسەكەلەستەر وتە كوپ بولدى. تۋرنيرگە رەسەي جاقسى دايىندالىپتى. ولار مىقتى كوماندا اكەلدى. قاراشا ايىندا سانكت-پەتەربۋرگتە جاستار اراسىندا الەم چەمپيوناتى وتەدى. رەسەي وسى دوداعا شىنداپ كىرىسكەن سياقتى. ءبىز دە قاراپ جاتقان جوقپىز. براندەنبۋرگ كۋبوگى تۋرنيرىندە الەم چەمپيوناتىنا قاتىساتىن كوماندالاردى زەرتتەپ كوردىك. الەم چەمپيوناتىندا ءبىزدىڭ باستى قارسىلاسىمىز رەسەي مەن كۋبانىڭ قۇرامالارى بولادى. تۋرنيردە كۋبالىقتار بولعان جوق. بىراق, ءبىز ولاردى اناپادا وتكەن تۋرنيردە كورگەنبىز, – دەدى ول. – بوستاندىق ەلىنىڭ بوكسشىلارى  اناپادا جاقسى قىرىنان كورىندى مە؟ الداعى الەمدىك دودادا رەسەيمەن دە كۋبامەن دە يىق ءتۇيىستىرىپ باسەكەلەسۋگە بولا ما؟ –ارينە, رەسەي مەن كۋبادا مىقتى بوكسشىلار كوپ بولعانىمەن ولارمەن ارقاشان يىق تەڭەستىرىپ باسەكەلەسۋگە دايىنبىز. ءبىزدىڭ ەلدە بوكس مەكتەبى بار. قازاقستان الەمدەگى بوكس دەرجاۆالارىنىڭ ءبىرى سانالادى. جاس بولسا دا باس بولا بىلەتىن جاستارىمىز ءوسىپ كەلەدى. شارشى الاڭدا شىڭدالىپ جاتقان جاستار بار. ال براندەنبۋرگ كۋبوگى وليمپيادا كەزىندە باستالىپ, كەشە عانا ءبىتتى. بيىل ول 21-ءشى رەت جالاۋىن كوتەردى. تۋرنير 2008 جىلى وليمپيادا كەزىندە دە وتكەن بولاتىن. سول كەزدە وعان دانيار ەلەۋسىنوۆ پەن يۆان دىچكو قاتىسقان. بۇل تۋرنير جاستار ءۇشىن ماڭىزدى. كەزىندە ونى گەننادي گولوۆكين دە جەڭىپ العان. مەن وسىنى قۇراما كومانداعا ۇنەمى ايتىپ جۇرەمىن. سولارعا قاراپ بوي تۇزەڭدەر دەپ ايتامىن. ويتكەنى, وسى ءتۋرنيردى جەڭىپ العان ادام جامان بوكسشى بولمايدى. ونى جەڭۋ كىم-كىمگە بولسىن ابىروي, مارتەبە. – قۇراما كوماندا ءجيى وزگەرىپ تۇرا ما؟  قوسالقى قۇراممەن پروبلەما جوق پا؟ - كوماندا ءجيى وزگەرىپ تۇرادى. ال كوماندانىڭ رەزەرۆى بۇرىننان بەرى بار. ول ارقاشان بولا بەرەدى. ءبىزدىڭ ەلدە بوكس جاقسى دامىپ جاتىر. بوكس فەدەراتسياسى جاستار بوكسىن دامىتۋ ءۇشىن قولدا بار مۇمكىندىكتەردى جاساپ وتىر.  سپورتتىڭ وسى تۇرىنە ەلىمىزدە ۇلكەن ءمان بەرىلەدى. ەلىمىزدە بوكس ورتالىقتارى, سپورت كەشەندەرى بار. ولار كوبەيە بەرەدى. سپورت كەشەندەرىنىڭ كوبەيگەنى جاستارعا جاقسى. قازىر ءوز باسىم كوشەدە بوس جۇرمەي, سپورت الاڭدارىنا باراتىن جاستاردىڭ تالايىن كورىپ ءجۇرمىن. مەنىڭ ويىمشا, دانيار ەلەۋسىنوۆتىڭ التىن مەدالى, ادىلبەك نيازىمبەتوۆ, ۆاسيلي لەۆيت, يۆان دىچكو مەن داريعا شاكىموۆانىڭ جۇلدەلەرى جاستارعا جاقسى اسەر ەتىپ جاتىر.  بىر وكىنىشتىسى, ءبىزدىڭ ەلدە اۋىر سالماقتاعى جاستار از. سوندىقتان اۋىلدارعا بارىپ, ەل-ەلدى ارالاپ اۋىر سالماقتاعى جاستاردى ىزدەۋىمىز كەرەك. – كوماندانىڭ الداعى جوسپارى قانداي؟ 12 – 19 قىركۇيەك كۇندەرى ۋكراينادا اعايىندى كليچكولاردىڭ ءتۋرنيرى وتەدى. سوعان بارامىز. وعان براندەنبۋرگ كۋبوگى تۋرنيرىنە قاتىسقان 75 جانە 81 كيلوعا دەيىنگى سالماقتاعى بوكسشىلاردى اپارامىز. باسقا سالماقتا باسقا بوكسشىلار بارادى. ويتكەنى, بىزدە جەڭىل سالماقتا باسەكە كۇشتى. سودان كەيىن قازان ايىندا حالىقارالىق اۋەسقوي بوكس قاۋىمداستىعىنىڭ اكادەمياسىندا وتەتىن جيىنعا قاتىسامىز. ال قاراشادا الەم چەمپيوناتىنا سوڭعى دايىندىقتى جاسايمىز. الەمدىك دودا 14-26 قاراشا كۇندەرى وتەدى. داستان كەنجالين