ەكەۋى سىناقتان ءوتىپ, ءۇشىنشىسى سايلاۋعا تۇسۋدەن باس تارتتى

كەشە ورتالىق سايلاۋ كوميسسياسىندا قازاقستان پرەزيدەنتتىگىنە تاعى ەكى كانديدات لينگۆيستيكالىق كوميسسياعا مەملەكەتتىك تىلدەن سىناق تاپسىردى. سونداي-اق, كۇن قورىتىندىسى بويىنشا ەكى ۇمىتكەر وزدەرىن قولداۋعا قول جيناۋ ءۇشىن قول قويۋ پاراقتارىن الدى. تاعى ءبىر كانديدات سايلاۋ ناۋقانىنا ودان ءارى قاتىسۋدان باس تارتتى. العاشقى بولىپ سىناققا قا­زاقستاننىڭ كوممۋنيستىك حالىق­تىق پارتياسىنان ۇسىنىلعان ءۇمىت­كەر جامبىل احمەتبەكوۆ كەلدى. ەمتيحان قورىتىندىسى بوي­ىن­شا لينگۆيستيكالىق كوميسسيا اشىق داۋىس بەرۋ ارقىلى ج.احمەتبەكوۆ قازاق ءتىلىن ەركىن مەڭ­گەرگەن دەگەن ءبىراۋىزدى شەشىم قابىلدادى. كوميسسيا توراعاسى مىرزاتاي جولداسبەكوۆ اتاپ وتكەندەي, كانديدات «استانا – باس قالا» تا­قى­رى­بىنا جاقسى شىعارما جاز­عان. ور­فوگرافيالىق قاتەلەرى جوق. تەك ەكى پۋنكتۋاتسيالىق قاتە مەن ەكى ستي­ليس­تيكالىق جونسىزدىككە جول بەرگەن. ەكىنشى تاپسىرما – كوركەم وقۋ بويىنشا كانديدات احمەت بايتۇر­سىنوۆتىڭ شىعارماسىن جاقسى دا مازمۇندى ەتىپ وقىپ شىققان. ءۇشىنشى تاپسىرما – «ادام جانە تابيعات» تاقىرى­بىنداعى ەركىن اڭگىمە بارىسىندا دا ول ءوزىن جاقسى قىرىنان كورسەتە بىلگەن. مەملەكەتتىك ءتىلدى ءبىلۋدىڭ سىناعىنان تاعى ءبىر ۇمىتكەر –سوۆەتقازى نۇرسيلا دا تابىستى وتكەن. قورىتىندى شەشىمدى حا­بارلاعان م.جولداسبەكوۆ س.نۇر­سيلانىڭ شىعارمانى «وتان» تا­قىرىبىنا جازعانىن ايتتى. «وكى­نىشكە قاراي, كانديدات تاقى­رىپ­تى تولىق اشا العان جوق, بىراق شىعارما جازا الاتىنىن  كورسەتتى. ەكىنشى تاپسىرما بوي­ىن­شا ول مۇحتار اۋەزوۆتىڭ «اباي جولى» رومانىنان ءۇزىندى وقىدى. بۇل سىناقتا كانديدات ورتاشا دەڭگەي كورسەتتى, ويتكەنى, كەيبىر ارىپتەردى «جۇتىپ» قويىپ وتىردى. ءۇشىنشى تاپسىرما بوي­ىنشا ول «مەملەكەتتىك ءتىل – بىرىكتىرۋشى فاكتور» تاقىرىبىندا ءسوز قوزعادى. تاقىرىپتى تولىق­تاي اشا العان جوق. تاقىرىپتا كورسەتىلگەن ءجايت­تەن اۋىتقىپ, ءتىلدىڭ ءمار­تە­بەسى مەن پروبلە­ما­لا­رى تۋرالى ايتىپ كەتتى. دەسەك تە, ۇمىتكەردىڭ قازاقشا جاقسى ويلاي بىلەتىنى كورىنىپ تۇردى. بارلىق ارگۋمەنتتەردى ەسەپكە الا كەلە, كوميسسيا  مۇشەلەرى س.نۇرسيلا قازاق ءتىلىن بىلەدى دەگەن قورى­تىندىعا كەلدى», دەدى م.جولداسبەكوۆ. الايدا, سىناقتان سوڭ ىلە-شالا سوۆەتقازى نۇرسيلا سايلاۋ ناۋقانىنا ودان ءارى قاتىسۋدان باس تارتىپ, ءوز كانديداتۋراسىن الىپ تاستادى. وسك-گە  ءتيىستى مالىمدەمەمەن شىققان ول كونستيتۋتسيادا قاراستىرىل­عانىن­داي, قازاقستاننىڭ ءار ازاماتى­نىڭ پرەزيدەنتتىككە كانديدات­تىق­قا تۇسۋگە تولىق قۇقىعى بار ەكەنىنە كوزى جەتكەنىن اتاپ ءوتتى. – مەنىڭ ماقساتىم دا وسىنى ءبىلۋ بولاتىن, – دەدى س.نۇرسيلا. كەشە ورتالىق سايلاۋ كوميس­سياسى قانات تۋراگەلديەۆ پەن جامبىل احمەتبەكوۆ ەل زاڭ­نامالارى تالابىنا سايكەس پرەزيدەنتتىك سايلاۋعا قاتىسا الادى دەگەن شەشىم شىعاردى. ءسويتىپ, قوس كانديداتقا قول جيناۋ ءۇشىن قول قويۋ پاراقتارىن بەردى. ءاليسۇلتان قۇلانباي.