بيلەت تابۋ بەينەت

جول ماقساتى – جەتۋ. ەندەشە, دىتتەگەن جەرىنە جەتۋ ءۇشىن كىمدە-كىم بولماسىن قالتاسىنا قاراي قولايلى, ءتيىمدى كولىكتى تاڭدايدى. جولاۋشىلار پويىزى دا قولايلى كولىكتەردىڭ قاتارىندا. قاجەتتى جەرىڭە جول قاۋىپسىزدىگىنە الاڭداماي جاتىپ دەمالىپ, اڭگىمە كورىگىن قىزدىرىپ قالاي جەتكەنىڭدى اڭعارماي قالاسىڭ. بەسىكتەي تەربەپ, بەرەكەڭدى المايتىن ۆاگوندار دا ىڭعايلىلىعىنا قاراي جوعارى جانە تومەنگى كلاستارعا بولىنەدى. جولاۋشىلار جازدىڭ قاپىرىق ىستىعىندا جەلدەتكىشتەرى بار سالقىن كۋپەلەردى, كىستىڭ ساقىل­داعان ايازىندا جىلى كۋپەلەردى تاڭ­دايدى. ەرتەرەكتە الماتىنىڭ قاي ۆوكزالىنا بارساڭىز دا الدىڭىزدى وراپ, «قايدا باراسىز؟ قانشا بيلەت كەرەك» دەپ شاۋىپ جۇرەتىن دەل­دال­داردان بۇگىندە ارىلعان ەدىك. بىراق ەندى بيلەت تاپپايتىن كۇي­گە جەتتىك. دوستىق بەكەتى – قازاق­ستاننىڭ شىعىس قاقپاسى. بۇل ەل­دى­ مە­ك­ەنگە تالقانى شىققان تاس­جول­مەن جەتۋ – قيامەتتىڭ قيامەتى. دوستىقتان استاناعا, الماتىعا بيلەت الۋ ماتەماتيكالىق تەڭ­دەۋ­لەردى شەشىپ, كۋبيك-رۋبيك­تەردى قۇراستىرۋدان دا قيىن. قيىن­داتىپ وتىرعاندار دا وسى سا­لانىڭ قىزمەتكەرلەرى. ءسىز­دەن قۇجاتىڭىزدى جارتى اي بۇ­رىن السا دا بيلەتتىڭ توبەسىن كور­مەيسىز. «تۇران» جولاۋشى­لار تا­سىمالداۋ ۆاگوندارى جەكەمەن- شىكتىڭ قولىندا. جازعى ماۋسىمدا كۇنارا جيىرما ۆاگوننان تىركەلەتىن بۇل پويىزعا بيلەت تابىلمايدى. تابىلا قالسا, جولسەرىكتەر سۇراعان باعا تاڭدايىڭدى تۇسىرەدى. اپتاسىنا ءبىر مارتە استانادان – ۇرىمشىگە, ۇرىمشىدەن – استاناعا قاتىنايتىن  بار. الماتىدان وسىنداي قۇراممەن شىعاتىن جولاۋشىلار پويىزى اقتوعاي ستانساسىندا توعىسىپ, سول جەردەن ەكى باعىتقا بەت الادى. ۇرىمشىدەن قايتىپ استانا, الماتى باعىتىنا ءتورت-تورتتەن بولىنگەن سەگىز ۆاگوندا بارلىعى وتىزعا تارتا جولاۋشى وتىرادى. سوندا 250-گە تارتا بوس ورىنمەن كەلە جاتقان جولسەرىكتەردىڭ ءوزى كەيدە «اۋا اكەلە جاتىرمىز» دەپ كۇلە قارايدى. قادىرى كەتكەن حالىقارالىق پويىزدىڭ مۇشكىل جاعدايى وسى. ال دوستىقتان استاناعا, الماتىعا جەتە الماعان جۇرگىنشىلەر جاعدايى مۇلدەم سوراقى. جاڭاعى بوس كەلە جاتقان ۆاگونداعى ورىنعا بيلەت الا المايسىز. بيلەت كاسساسىنداعىلاردىڭ ايتۋىنشا, قانشا ورىن بوس ەكەنى جايلى مالىمەت استانا مەن الماتىداعى جول ءبولىمى بيۋرو­لارىنان جەتكىزىلىپ, ودان سوڭ دوستىق, بەسكول, اقتوعاي, ساياق كاس­سالارىنىڭ جارىسى باستالىپ كەتەدى-مىس. بۇل جەردە بيۋرو­داعى­لاردىڭ بۇيرەگى بۇرعاندار مولى­راق قامتيتىنى ايدان انىق. ءالى كۇنگە ەسكى «ەكسپرەسس-21» بيلەت باسۋ قۇرىلعىسى تۇرعان دوس­تىقتاعى كاسسير تەرىپ ءۇل­گەر­گەنشە, «وليۆەتتي» قۇرىلعى­سىن قۇيىن­داي ۇيىرگەن وزگە بەكەت­تە­گىلەر مو­لىنان قامتىپ قالاتىن كورىنەدى. سىنىقتان سىلتاۋ ىزدەپ, بىرىنە ءبىرى سىلتەگەنشە حالىقتىڭ پىكىرىنە قۇلاق اسىپ, الدىمەن الىس بەكەتتەگىلەردى قامتاماسىز ەتىپ, سودان سوڭ ارالارى ءۇش ساعاتقا سوزىلاتىن كەلەسى ستانساداعىلاردىڭ بيلەت كاسساسىن اشىپ وتىرسا, نۇر ۇستىنە نۇر بولار ەدى. دوستىققا ساپارلاپ كەلگەندەر دىتتەگەن جەرىنە جەتە الماي, اپتالاپ بيلەت توسپاس ەدى. قايتكەن كۇندە دە قولايلى جاعىن ىزدەستىرگەن ءلازىم. بۇلاي بولماعان جاعدايدا بيلەتتى پىسىقايلار الىپ, قاراپايىمدار قالىپ, ءالجۋازدار تالىپ, ءالى تالاي جۇرتشىلىقتى اۋرە-سارساڭعا سالماسىنا كىم كەپىل. سەيىت وماروۆ دوستىق بەكەتى