التىنسارين مەكتەبى ايشىقتالدى

قوستاناي زيالىلارى كوپ­تەن ايتىپ جۇرگەن كوكەيدەگى ءبىر ءىس ورىندالدى. كەمەڭگەر اعارتۋ­شى ىبىراي ءالتىنساريننىڭ ءوزى اشقان مەكتەپتىڭ ورنىنا ەسكەرتكىش بەلگىتاس قويىلدى. وعان «وسى جەردە 1884 جىلى ۇلى اعارتۋشى, ۇستاز ى.التىنسارين العاشقى قازاق مەكتەبىن اشتى» دەپ جازىلعان جانە سول مەكتەپتىڭ سۋرەتى بەرىلگەن. ىبىراي اشقان مەكتەپتى وتكەن عاسىردىڭ 70-ءشى جىلدارى ءسۇرىپ تاستاپ, ورنىنا جاڭا ءبىلىم ۇياسى سالىنعان ەدى. بيىل ىبىراي ءالتىنساريننىڭ تۋعانىنا 175 جىل تولادى. ول كۇزدە وبلىستا حال-قادەرىنشە اتالىپ وتپەك. وبلىس جۇرتشىلىعى وكىلدەرى وسى شارا اياسىندا ۇستازدىڭ ءوزى اشقان, قازاقتىڭ ىرىلەرى ءبىلىم العان مەكتەپتىڭ ورنىنا بەلگى قويۋدى وبلىس اكىمى ارحيمەد مۇحامبەتوۆكە ءوتىنىش ەتىپ ايتقان بولاتىن. سول مەكتەپتەن ءبىلىم العان ارداگەر اعالاردىڭ لەبىزىن اكىم قولداعان بولاتىن. – ەسكەرتكىش بەلگىتاستى قوستانايلىق ءمۇسىنشى ەگور كيسليتسين جىتىقارادان اكەلىنگەن تابيعي قىزىل گرانيت تاستان ويىپ جاسادى. ال جازۋ تابيعي بازالت پليتاعا جازىلدى. ەسكەرتكىش بەلگىنىڭ سال­ماعى 10 توننادان اسادى – دەدى ارداگەر ۇستاز. ۇلى اعارتۋشىنىڭ تۋعانىنا 175 جىل تولۋ مەرەيتويى اياسىندا قالا سىرتىنداعى ىبىراي كەسەنەسىنىڭ توزىپ كەتكەن تۇستارى جوندەلىپ, اينالاسى قالىپقا كەلتىرىلەتىن بولادى. ءنازيرا جارىمبەتوۆا, «ەگەمەن قازاقستان» قوستاناي