ۇيىمدى دامىتۋ ماسەلەلەرى تالقىلاندى

ەرەۆاندا ۇجىمدىق قاۋىپسىزدىك تۋرالى شارت ۇيىمى قورعانىس مينيسترلەرى كەڭەسىنىڭ كەزەكتى وتىرىسى ءوتتى. ارمەنيا, بەلارۋس, قازاقستان, قىرعىزستان, رەسەي جانە تاجىكستان ۇقشۇ مەملەكەتتەرى قورعانىس ۆەدومستۆولارىنىڭ باسشىلارى ۇجىمدىق قاۋىپسىزدىك جۇيەسىنىڭ ىسكە قوسىلۋ جانە دامۋ ماسەلەلەرىن, ۇيىمنىڭ بىرىككەن شتابىنىڭ قىزمەتىن جەتىلدىرۋ جونىندەگى شارالاردى, مەملەكەتتەردىڭ اسكەري ىنتىماقتاستىعىنىڭ بولاشاعىن جوسپارلاۋدى تالقىلادى. قورعانىس مينيسترلەرى كەڭەسىنىڭ وتىرىسىندا بارلىعى 11 ماسەلە قارالدى. ونىڭ ىشىندە, 6 ەلدىڭ قورعانىس ۆەدومستۆولارىنىڭ باسشىلارى 2016 جىلدىڭ ەكىنشى جارتىجىلدىعى مەن 2017 جىلدىڭ ءبىرىنشى جارتىجىلدىعىنا ارنالعان سىرتقى ساياسات, قاۋىپسىزدىك پەن قورعانىس ماسەلەلەرى بويىنشا كەڭەس بەرۋ جوسپارىن بەكىتتى. سونداي-اق, كەزدەسۋ بارىسىندا اۋە شابۋىلىنا جانە زىمىرانعا قارسى قورعانىس پروبلەمالارىن زەرتتەۋ سالاسىنداعى بازالىق عىلىمي-زەرتتەۋ ۇيىمدارى تۋرالى ەرەجە بەكىتىلدى. 2020 جىلعا دەيىنگى كەزەڭدە ۇقشۇ-عا مۇشە مەملەكەتتەردىڭ اسكەري ىنتىماقتاستىعىن دامى­تۋدىڭ نەگىزگى باعىتتارىن ىسكە اسىرۋ جونىندەگى ءىس-شارالار جوس­پارىنا, سونىمەن قاتار, ۇيىمنىڭ بىرىككەن شتابىنىڭ اسكەري گەرالديكالىق بەلگىلەرىن قۇرۋ تۋرالى قورعانىس مينيسترلەرى كەڭەسىنىڭ شەشىمىنە قوسىمشا وزگەرىستەر ەنگىزىلدى. ۇجىمدىق قاۋىپسىزدىك تۋرالى شارت ۇيىمى بەيبىتشىلىكتى, حالىقارالىق جانە وڭىرلىك قاۋىپسىزدىك پەن تۇراقتىلىقتى نىعايتۋ, ۇجىمدىق نەگىزدە تاۋەلسىزدىكتى, اۋماقتىق تۇتاستىق پەن ونىڭ قاتىسۋشى مەملەكەتتەرىنىڭ ەگەمەندىگىن قورعاۋ ءۇشىن 2002 جىلى قۇرىلعانىن ايتا كەتكەن ءجون. بۇگىنگى تاڭدا ۇقشۇ-نىڭ قۇرامىندا بىرقاتار قۇرىلىمدىق ورگاندار بار. ۇدايى نەگىزدە «شەپ», «ءوزارا ءىس-قيمىل», «مىزعىماس باۋىرلاستىق», «ىزدەستىرۋ» بىرلەسكەن وقۋ-جاتتىعۋلارى وتكىزىلىپ تۇرادى. وتكەن كەزەڭدە جاڭا قاۋىپ-قاتەرلەردىڭ تۋىنداۋىنا بايلانىستى, سونداي-اق, ءوزارا ءىس-قيمىل مەن اسكەري ىنتىماقتاستىقتى نىعايتۋ شەڭبەرىندە ۇجىمدىق جەدەل دەن قويۋ كۇشتەرى, ۇجىمدىق بىتىمگەرشىلىك, اۆياتسيالىق كۇشتەر قالىپتاستىرىلىپ, باس شتابتار باستىقتارى دەڭگەيىندەگى اسكەري كوميتەت قۇرىلدى.