قازاقستاننىڭ قولونەر شەبەرلەرى ەكسپو-2017 كورمەسىنە قازىردەن باستاپ دايىندالۋى قاجەت. سەبەبى, ىرىكتەۋ كەزىندە تاۋاردىڭ تيراجىنا عانا ەمەس, ساپاسىنا دا, ونى ۇسىنۋدىڭ كرەاتيۆتى, ياعني ەرەكشە ءتاسىلدەرىنە دە باسا نازار اۋدارىلادى. وسى ورايدا ماماندار قولونەر كاسىبىنە بيزنەس كوزى رەتىندە قاراۋعا كەڭەس بەرىپ وتىر. ازىرشە كورمەدە ۇسىنىلاتىن ۇلتتىق قولونەر بۇيىمدارىن ىرىكتەۋدىڭ ناقتى تالاپتارى جوق. الايدا, «استانا ەكسپو-2017» ۇلتتىق كومپانياسىنىڭ وزىندىك كوزقاراسى, بەلگىلى ءبىر ۇسىنىستارى بار. بالكىم, سونىڭ بارلىعىن «EXPO&WOMEN» حالىقارالىق ۇيىمى ىسكە اسىراتىن بولار.
بۇگىنگى جوسپارعا سايكەس, ەكسپو كورمەسى كەزىندە ەتنواۋىل اشىلادى. سول جەردە قازاقتىڭ ۇلتتىق قولونەر بۇيىمدارىن ساتۋ جوسپارلانعان. الايدا, وعان كوپ ادام سىيمايتىن سياقتى. سوندىقتان, ەتنواۋىلدا ساۋدا ورىندارى از بولادى. شامامەن, 30-35 ورىن. دەگەنمەن, ول جەردەگى تاۋارلاردىڭ سانى دا, ساپاسى دا جوعارى بولۋى شارت. سونداي-اق, قولونەر بۇيىمدارىن تانىستىرۋدىڭ وزىندىك ءبىر ءتاسىلى بولعانى ءجون. «ەتنواۋىلدا كادىمگىدەي قازاقى ورتانى جاساۋ قاجەت. تاماعى دا, تاۋارى دا ۇلتتىق ناقىشتا بولسا ەكەن دەيمىز. سوسىن قولونەر بۇيىمدارىن جاي بازارداعى سياقتى قويا سالماي, سول بۇيىمداردىڭ قالاي جاسالاتىنىن كورسەتۋ كەرەك. مىسالى, كىلەم ساتىلسا, ونى بىرەۋ توقىپ وتىرادى. ءجىپ يىرەدى, قىشتان ىدىس جاسايدى, ويۋ سالادى, كەستە تىگەدى. ەڭ باستىسى, قازاقتىڭ تىنىس-تىرشىلىگىن, تاريحى مەن مادەنيەتىن جان-جاقتى كورسەتۋ كەرەك. بالكىم, ءبىز ول جەردە روتاتسيا جۇيەسىن قولدانامىز. وندايدا ءبىر اي ءبىر شەبەر وتىرسا, ەكىنشى ايدا ەكىنشى ءبىر شەبەر كەلىپ, ءوز تاۋارىن ساتا الادى. وسىلايشا, قولونەر شەبەرلەرىن كوپتەپ قامتۋعا بولادى», – دەيدى «استانا ەكسپو-2017» ۇلتتىق كومپانياسى كوممەرتسياليزاتسيالاۋ دەپارتامەنتى ديرەكتورىنىڭ ورىنباسىرى ءىلياس ورازاقوۆ. وسى ورايدا كومپانيا وكىلى ەكسپو لوگوتيپىمەن ساتىلاتىن كەڭسە زاتتارى, گادجەت قوسىمشالارى, كادەسىيلار جانە تاعى باسقا ۇساق-تۇيەكتەردى قولونەر بۇيىمدارىمەن شاتاستىرماۋ قاجەت دەپ وتىر. سەبەبى, جارنامالىق تاۋارعا سالىق سالىنسا, قولونەر بۇيىمدارىنا سالىق سالىنبايتىن شىعار. شەبەرلەر تەك ەتنواۋىل ايماعىندا جالعا العان ورىننىڭ تولەماقىسىن عانا تولەۋى مۇمكىن.
بۇگىندە «استانا ەكسپو-2017» ۇلتتىق كومپانياسى قولونەر شەبەرلەرىن ىرىكتەۋدى «EXPO&WOMEN» حالىقارالىق ۇيىمىنا ۇسىنىپ وتىر. اتالعان ۇيىمنىڭ باسشىلىعى ول ۇسىنىستى قابىلداپ, ەتنواۋىلدىڭ تالاپتارىن ازىرلەۋگە كەلىستى. الايدا ەكى جاق ءالى ناقتى ءبىر قۇجاتقا قول قويعان جوق.
نەگىزى, كولونەر بۇيىمدارىن ساتۋ ورىندارى تەك كورمە الاڭىندا عانا ەمەس, بارلىق قالا اۋماعىندا دا اشىلادى. سوندىقتان, استانا قالاسىنىڭ اكىمدىگى قوعامدىق ۇيىمدارمەن بىرلەسە وتىرىپ, وسى سالاداعى وتاندىق شەبەرلەردىڭ الەۋەتىن زەردەلەپ شىعۋعا مۇددەلى. وعان دا «EXPO&WOMEN» حالىقارالىق ۇيىمى تارتىلىپ وتىر. «كوكتەمدە ءبىز ۇلكەن جارمەڭكە وتكىزگەن ەدىك. ال قىركۇيەكتىڭ 9-10-ى كۇندەرى تۋرا سونداي ۇلكەن جارمەڭكە ۇيىمداستىرىلادى. وعان رەسپۋبليكانىڭ تۇكپىر-تۇكپىرىنەن قولونەر شەبەرلەرى قاتىسىپ, ءوز تاۋارلارىن كورسەتە الادى. مىنە, وسى ىسپەتتى شارالاردىڭ ارقاسىندا ءبىز ءوز ءمۇمكىندىكتەرىمىزدى بايقاپ كورمەكپىز», – دەيدى ۇيىم باسشىسى س.راقىمبەكوۆا.
ونىڭ سوزىنە قاراعاندا, ەكسپو-نىڭ ەتنواۋىلىنا ىرىكتەۋ تالاپتارىن ازىرلەۋ ءۇشىن بىرنەشە باسقوسۋلاردى وتكىزىپ, وسى ماسەلەنى كەڭىنەن تالقىلاپ الۋ قاجەت. سەبەبى تاۋاردىڭ وزىندىك ەرەكشەلىگىنەن بولەك, تيراجى دا از بولماۋى ءتيىس. قازىرگى كەزدە رەسپۋبليكا بويىنشا 100-گە تارتا قولونەر شەبەرى كورمەگە قاتىسۋعا نيەتتى.
ارمان اسقاروۆ
