ۋنيۆەرسياداعا ازىرلىك قارقىندى جۇرۋدە

قازىرگى كەزدە الماتىدا 28-ءشى بۇكىلالەمدىك قىسقى ۋنيۆەرسيادا ويىندارىنا  جان-جاقتى دايىندىق جۇمىستارى جۇرگىزىلىپ جاتىر. بۇل جارىس كەلەسى جىلى ەلىمىزدە عانا ەمەس, تمد كەڭىستىگىندە العاش رەت وتكىزىلەدى. سپورتتىڭ 12 تۇرىنەن 2000-نان استام سپورتشى قاتى­سادى. ۋنيۆەرسيادا ديرەك­تسياسىنىڭ باسشىسى نايل نۋروۆتىڭ ايتۋىنشا, جارىسقا قاتىسۋ ءۇشىن رەسمي تۇردە 58 ەل تىركەلدى. – 2011 جىلى تۇركيانىڭ ەرزۋ­رۋم قالاسىندا وتكەن سىنعا وسىن­شاما ەلدىڭ سپورتشىلارى قاتىس­قان بولاتىن. سوندىقتان كەلەسى جىلى الماتىدا جالاۋىن كوتەرە­تىن جارىسقا 58 مەملەكەتتىڭ وكىل­دەرى كەلسە, ءبىزدىڭ قالامىز ۋني­ۆەرس­يادا تاريحىندا ەڭ كوپ ەلدەر قاتىس­قان مەملەكەتتەردىڭ ءبىرى بولادى, – دەيدى ول. ۋنيۆەرسيادادا جارىستار 8 سپورت سارايىندا وتەدى. سونىمەن بىرگە, ۋنيۆەر­سيا­داعا 127 حالىق­ارالىق تورەشى مەن 600-گە جۋىق ۇلتتىق تەنيكالىق مامان قاتى­ساتىنىن, ال جارىس كەزىندە ويىن­داردى باس­قا­رۋ ورتالىعى جۇمىس ىستەيتىنىن ايتتى. الماتى قالا­سىنىڭ ءىىد-مەن بىرىگىپ, ۋنيۆەر­سيادا كولى­گىنىڭ نەگىزگى جانە بالامالى قوز­عالىسى بەكىتىلدى. بارلىق اۆتو­كولىكتەر GPS ناۆيگاتورىمەن قامتىلادى. اۆتوكولىك قوزعا­لى­سىن قاداعالايتىن ارنايى ديسپەت­چەرلىك ورتالىق جۇمىس ىستەيدى. مەديتسينالىق كومەك كورسەتۋ ءۇشىن الماتىنىڭ 8 ستاتسيونارى مەن 30 جەدەل كومەك كورسەتۋ بريگاداسى قىزمەت ەتەدى. اتلەتتەر قالا­­شىعىندا مەديتسينالىق ورتا­لىق بولادى. سونداي-اق, وندا دو­پينگ­تىك-باقىلاۋ ستانسالارى ۇيىمداستىرىلادى. قىركۇيەك ايىندا جوو-نىڭ ستۋدەنتتەرى اراسىنان ەرىكتىلەردى ىرىكتەۋ جوسپارلانعان. ىرىكتەۋ اياقتالعان سوڭ, قازان ايىنان 2017 جىلدىڭ قاڭتارىنا دەيىن, ەرىكتىلەرگە ارنالعان وقىتۋ سەمينارلارى مەن ترەنينگتەرى وتەدى. قازىر ەرىكتىلەرگە بايلانىس­تى جۇمىس قىزۋ ءجۇرىپ جاتىر. مىسا­لى, جوعارى وقۋ ورىندارى, ىشكى ىستەر جانە توتەنشە جاعداي دەپار­تامەنتى مەن مەديتسينا قىزمەت­كەرلەرىنە تەگىن اعىلشىن ءتىلىنىڭ كۋرسى ۇيىمداستىرىلعان. بۇگىندە 600 ادام وقىتىلدى. ۋنيۆەرسيادا با­ستال­عانشا 2 مىڭ قىزمەتكەرگە اعىل­شىن ءتىلىن ءۇي­رەتۋ جوسپارلانعان. قىسقى ۋنيۆەرسيادانىڭ ەستافەتاسى 25 قاڭتاردا باستالىپ, استانا قالاسىنداعى نازارباەۆ ۋنيۆەرسيتەتتە الاۋى جاعى­لادى. الاۋ ەستافەتاسى ەلىمىز­دىڭ بارلىق ءوڭىر­­لەرىندە وتكى­زىلەدى. سودان كەيىن ول الماتىعا جەت­كىزىلەدى. جوس­­پار­عا سايكەس, 16 الاۋ ءبىر جەردە تو­عى­سىپ, ۇلكەن ءبىر الاۋعا اينالادى. ۋنيۆەرسيادا ديرەكتسياسىنىڭ باسشىسىنىڭ ايتۋىنشا, جارىس­تار 80 ەلگە تارايدى. ولاردى كۇن سايىن 1 ملرد. ادام تاماشالاي الادى. جارىسقا ارنالعان بارلىق سپورت وردا­لارى­نىڭ ەسىگى حالىققا ايقارا اشىق بولادى. قازىر قالا قوناق­تارى مەن تۇرعىندارى ءۇشىن ۋنيۆەر­­سيا­دا سپورت الاڭدارىنىڭ قول­جەتىم­دىلىگى تۋرالى باعدارلاما جاسالعان. – ۋنيۆەرسيادا – ەل تاري­حى­نىڭ 25 جىلىنداعى ەڭ ءىرى مۋلتي­سپورتتىق جارىس. ويىن­داردىڭ ارقا­سىندا, الماتى قالاسى جاڭا نىساندارمەن تولى­عىپ جاتىر. كوپ سالالى مۇز كەشەن­دەرى, وليم­پيادالىق قىس­قى سپورت تۇرلەرىن دامىتاتىن, تانىتاتىن الاڭعا اينالادى,– دەيدى نايل نۋروۆ. داستان كەنجالين, «ەگەمەن قازاقستان»