رەسەيدىڭ «سپورت-ەكسپرەسس» گازەتى ءوزىنىڭ 16 تامىز كۇنگى نومىرىندە «ريو-2016, 10-شى كۇن: تيششەنكونىڭ جانجالدى التىنى جانە برازيليا نوسەرى» دەگەن ماقالا جاريالاپ, سونىڭ ءبىر تارماعىن كەشە تاڭ الدىندا 91 كيلوعا دەيىنگى سالماقتا قازاقستاندىق ۆاسيلي لەۆيت پەن رەسەيلىك ەۆگەني تيششەنكونىڭ اراسىندا وينالعان فينالدىق جەكپە-جەك تۋراسىنا ارنايدى.
باسىلىمنىڭ «رينگتەگى جانجال» دەگەن تاقىرىپشا بويىنشا بەرىلگەن سول ماقالاسى, قازاقشاعا اۋدارعاندا, بىلايشا وي وربىتەدى:
«رەسەيدىڭ ريوداعى 11-ءىنشى التىنى ايتارلىقتاي جانجالدى وقيعاعا ىلەسىپ كەلدى. 91 كيلوعا دەيىنگى سالماق دارەجەسىنىڭ فينالىندا تورەشىلەر جەڭىستى قارسىلاسى قازاقستاندىق ۆاسيلي لەۆيت بولعان رەسەيلىك ەۆگەني تيششەنكوعا ءبىر اۋىزدان بەردى. مۇنىڭ پروبلەماسى رينگتە-اق باستالدى: قازاقستاندىق جانكۇيەرلەر زالدا وتىرعان حوك باسشىسى توماس باحتىڭ تۋرا كوز الدىندا اربيترلاردىڭ شەشىمىن ىسقىرىپ قارسى الدى. ءباسپاسوز ءماسليحاتىندا ولاردىڭ ءىسىن قازاقستاندىق جۋرناليستەر جالعاستىردى, بىرقاتار بەلگىلى كاسىپقويلار مەن پروموۋتەرلەر دە وسىعان قاتىستى ءوز ويلارىن ءبىلدىردى.
-ماعان ۇرىس جايلى سىرتتان باعا بەرۋ قيىن, - دەپ تيششەنكوعا اقتالۋعا تۋرا كەلدى سول جەردە. – ەگەر مەن ادىلەتسىز ۇتقان بولسام, ۆاسيليدەن كەشىرىم سۇرايمىن.
ەگەر ادالىنا جۇگىنسەك, تورەشىلەر شەشىمىنە قاتىستى شىنىندا دا بىرقاتار سۇراقتار بار. لەۆيت ۇرىس كەزىندە قارقىندى كورىندى, ۇرعاندارى دا ءجيى ءتيىپ جاتتى, ال ءۇشىنشى راۋندتا ءتىپتى قارسىلاسىن نوكداۋنعا اتتاندىرىپ جىبەرە جازدادى. تيششەنكونىڭ سول تۇستا «قالقىپ» جۇرگەنى بايقالدى. بالكىم, سول كەزدە باسىنان العان جاراقاتى عانا رەسەيلىكتى بۇدان دا زور پروبلەمادان قۇتقارىپ قالعان شىعار. تورەشىنىڭ جەكپە-جەكتى توقتاتقانى بولاشاق چەمپيوننىڭ ازداپ تىنىس الىپ قالۋىنا كومەكتەستى».
بۇعان قوساتىنىمىز, وسىنداي جانجالدى شەشىم شىعارعان تورەشىلەر يرلانديا, الجير جانە كولۋمبيا ەلدەرىنىڭ ماماندارى بولىپ شىقتى.
قازىر بىرقاتار جانكۇيەرلەر ايبا-عا بۇل جەكپە-جەكتىڭ ناتيجەسىن قايتا قاراۋ جونىندەگى ۇسىنىس بەرەتىن پەتيتسياعا قول جيناستىرىپ جاتقان كورىنەدى.
دامير قوجامقۇل
https://youtu.be/9sqOEQlON7o
