كىتاپحاناشىلار ءۇن قوستى

اقتوبە وبلىستىق ن.بايعانين اتىنداعى بالالار كىتاپحاناسىنىڭ كىتاپحاناشىلارى «ريو-2016» وليمپياداسىنا قاتىسۋشىلارعا ءوز تىلەكتەرىن ءبىلدىردى. قاشاندا ەل ماقتانىشتارىن وزگەلەرگە ناسيحاتتاۋدا ۇلكەن شارۋا اتقارىپ جۇرەتىن كىتاپ­حاناشىلار بۇل جولى دا قاراپ قالعان جوق. مەكتەپ وقۋشىلارى جازعى دەمالىستا بولعاندىقتان, بالالاردى جيناپ, ءىس-شارا وتكىزۋ وڭاي ەمەس. سوعان قاراماستان, وبلىستىق بالالار كىتاپحاناسىنىڭ كىتاپحاناشىلارى جۋرنال-كروسسينگ ۇيىمداستىرىپ, ساياباقتا كەشكىلىك دەمالىپ وتىرعان قالا تۇرعىندارى مەن قوناقتارعا سپورتشىلارىمىز تۋرالى مالىمەتتەر مەن ولار تۋرالى جازىلعان باسىلىمدار تاراتتى. كوزى ناشار كورەتىن قارتتارعا وليمپياداعا قاتىسۋشى جاستار تۋرالى جازىلعان مالىمەتتەر مەن اقپاراتتاردى وقىپ بەردى. ولار, سونداي-اق, «ريو-2016» وليمپياداسىنا قاتىسۋشىلارعا جالىندى سالەم جولدادى. «ريو-2016   وليمپياداسىنا قاتىسۋ­شى­لارعا سالەم!» دەپ جازىلعان پلا­كاتتى الىپ, ساياباقتار مەن قالا تۇرعىندارى ءجيى جۇرەتىن كوشەلەردى ارالادى. – بۇگىندە انالارىمىز تاقىمىن قىسىپ, اكەلەرىمىز نامىسىن قايراپ وتىرعان شىعار. ۇلت ابىرويىن قورعايتىن ءاربىر قازاق سپورتشىسى ءۇشىن ءبارىمىز دە جاۋاپتى ەكەنىمىزدى سەزىنۋىمىز كەرەك. سول سەبەپتى ءبىزدىڭ ۇجىم كىتاپحاناعا كەلگەن ءاربىر وقىرمانعا, كوشەدەگى قاراپايىم حالىققا سپورتشىلارىمىز ءۇشىن جانكۇيەر بولۋدىڭ ماڭىزى تۋرالى ۇنەمى ايتىپ وتىرادى, – دەيدى كىتاپحانا ديرەكتورى گۇلجاينار قالدينا. جاز مەزگىلىن كىتاپحاناشىلار تولىق قازاق سپورتىنا ارناپ وتىر. ولار وليمپيادا باستالعانشا لاگەرلەر مەن بالاباقشالاردا, سپورت مەكتەپتەرى مەن ۇيىرمەلەردە بالالار اراسىندا سپورتتىق جارىستار وتكىزىپ كەلدى. جەڭىمپاز بولعان بالالاردىڭ كەۋدەسىنە مەدال تاعىپ, بولاشاقتا مىقتى سپورتشى بولۋعا ۇندەدى. اينۇر نەرميەۆا اقتوبە