استانا قالاسىندا قازاقستان حالقى اسسامبلەياسىنىڭ ۇيىمداستىرۋىمەن «مەدياتسيا كۇنى» اتتى رەسپۋبليكالىق اكتسيا شەڭبەرىندە اشىق ەسىك كۇنى ءوتتى.
قازاقستاندا سوت وتىرىستارىنىڭ بالامالى ءتۇرى سانالعان مەدياتسيا كوپ قولدانىلا بەرمەيدى, الايدا, بۇل – ازاماتتىق داۋدىڭ سوتسىز جانە تەرگەۋسىز شەشىمىن تاباتىن زاڭنىڭ ءتۇرى. ول اتاۋى جاڭا بولعانمەن, اتا ءداستۇرىمىزدە قالىپتاسقان اۋزى دۋالى اقساقالدار مەن تۋرا ءسوزدىڭ ءتۇبىن تۇسىرەتىن بيلەر ءسوزىنىڭ زاڭدى جالعاسى بولىپ تابىلادى. قازاق تاريحىنا كوز جۇگىرتسەڭىز, «قاسىم حاننىڭ قاسقا جولى», «ەسىم حاننىڭ ەسكى جولى», تاۋكە حاننىڭ «جەتى جارعىسى» وسى كۇنگە دەيىن ساقتالىپ, زاڭىمىزدىڭ زاڭدى جالعاسى بولىپ كەلە جاتىر. سول كەزدەگى بي, اقساقالدار حالىقتىڭ اراسىنداعى ءتۇرلى داۋ-جانجالداردى ءبىر اۋىز سوزبەن اقىلداسا, كەڭەسە وتىرىپ شەشىپ وتىرعان. 2011 جىلعى 28 قاڭتاردا ەلباسى ن.ءا.نازارباەۆ قازاقستان رەسپۋبليكاسىنىڭ «مەدياتسيا تۋرالى» زاڭىن بەكىتكەن بولاتىن. بۇگىنگى كۇندە بۇل ءىس جۇزەگە اسىرىلىپ, جۇيەسىن تابۋدا. سونىمەن قاتار, بيىلعى جىلدىڭ 30 شىلدەسىندە قازاقستان حالقى اسسامبلەياسى مەن قازاقستان جوعارعى سوتى مەدياتسيا ينستيتۋتىن دامىتۋعا بايلانىستى مەموراندۋمعا قول قويدى.
استانا قالاسى بويىنشا جىل باسىنان بەرى 910 مەدياتسيالىق جۇمىس قابىلداندى. ونىڭ 671 ءىسى سوتتىق مەدياتسيا قىزمەتكەرلەرىنىڭ قاتىسۋىمەن وتكەن. مەدياتسيانىڭ ارقاسىندا قىلمىستىق ىستەردىڭ جەڭىل ءتۇرى سوتقا جەتپەي, شەشىمىن تاۋىپ وتىر. سوڭعى جارتى جىلدا سوتتا بىتىمگەرلىك ءراسىمدەردى قولدانعاننان كەيىن تالاپكەرلەر بيۋدجەتكە تولەنگەن مەملەكەتتىك باجداردى قايتارىپ الۋ جەڭىلدىكتەرىن پايدالانىپ, 200 000 000 تەڭگەنى ءوندىرىپ الدى, ونىڭ ىشىندە قايتا قاراۋ ساتىسى 26 000 000 تەڭگەنى قۇرادى.
ايمان مۇقىشەۆا
