يران ينۆەستيتسياسى ورال وڭىرىنە كەلەدى

ورال ءوڭىرى مەن يران يسلام رەسپۋبليكاسى اراسىندا ساۋدا–ەكونوميكالىق, ينۆەستيتسيالىق جانە كولىك-لوگيستيكالىق سالادا ىنتىماقتاستىق جونىندەگى كەلىسىم جاسالدى. اتالعان كەلىسىمگە وتكەن شىلدە ايىنىڭ اياعىندا تەگەراندا قول قويىلعان بولاتىن. ءوز كەزەگىندە يراندىق وكىل-ينۆەستور تاۆاكول يبرايمي ورال وڭىرىندە بولعان ساپارىندا مۇندا ەكى كەزەڭنەن تۇراتىن جىلىجاي قۇرىلىستارىن سالۋ ءۇشىن يران تاراپى ينۆەستيتسيا قۇيۋعا ءازىر ەكەندىكتەرىن مالىمدەدى. بۇعان گوللانديالىق تەحنولوگيانى قولدانۋ بەلگىلەنگەن. ونىڭ ەرەكشەلىكتەرى جونىندە Egemen.kz تىلشىسىنە ينۆەستورمەن بىرگە كەلگەن ارىپتەسى, نيدەرلاندتىق اندريەس كوپپەرت ايتىپ بەردى. ونىڭ مالىمدەۋىنشە جوبانىڭ العاشقى كەزەڭىندە قۇرىلىس اۋماعى قىرىق گەكتاردى قۇراماق. بولاشاقتا جىلىجايدان جينالاتىن ءونىم مولشەرى ءوڭىر تۇرعىندارىنىڭ سۇرانىسىن قامتىپ قانا قويماي, ونى كورشىلەس رەسەي ەلدەرىنە ەكسپورتقا شىعارۋعا بولادى دەگەن بولجام جاسالىپ وتىر. قازاقستان ەۋرازيالىق وداقتىڭ قۇرامىندا بولعاندىقتان, مۇنداي جاعىمدى جايت رەسەيمەن ساۋدا-ەكونوميكالىق قارىم-قاتىناستاردى ودان ءارى تەرەڭدەتە تۇسۋگە سەپتىگىن تيگىزەدى دەپ كۇتىلۋدە. ايتىلار ويدى بۇدان دا گورى اشىڭقىراپ ايتقاندا, قازاقستاننىڭ اتالمىش ەكونوميكالىق كەڭىستىكتە ورنالاسۋى يراندىق ينۆەستورلاردىڭ قىزىعۋشىلىعىن ودان ءارى كۇشەيتە تۇسكەندەي كورىنەدى. ءتىپتى قازىرگى كۇنى ءىرى دە كۇردەلى جىلىجاي جوباسىنىڭ ورنى بەلگىلەنىپ تە قويىلىپتى. ايتالىق, «ورال» الەۋمەتتىك-كاسىپكەرلىك كوورپوراتسياسى وڭىردەگى يندۋستريالىق ايماقتى قۇرۋعا بەل شەشە كىرىسىپ,ونىڭ ورنىن بەلگىلەگەن بولاتىن. بۇل ارالىق -تەرەكتى اۋدانىنداعى پويما تەمىرجول بەكەتىنە تاياۋ ورنالاسقان. يراندىقتار مەن گوللانديالىقتار بىرلەسىپ قولعا الاتىن جىلىجاي قۇرىلىسى ءدال وسى ارادا بوي كوتەرمەك. ءوز كەزەگىندە «ورال اكق» اتالعان شەتەلدىك كومپانيامەن بىرلەسىپ جۇمىس جۇرگىزبەكشى. وسى ورايدا مەردىگەر رەتىندە بەلگىلەنگەن «KGS» كومپانياسى قۇنى 176 ميلليون اقش دوللارىن قۇرايتىن كەڭ تىنىستى قۇرىلىستى الداعى ءبىر ايدىڭ ىشىندە باستاپ كەتۋگە بەل بۋىپ وتىرعانى ۇلكەن سەنىم تۋعىزادى. تەمىر قۇسايىن