تەرگەۋ ءىسى قاداعالاۋعا الىندى

  «ەگەمەن قازاقستان» گازەتىنىڭ 18.06.2016 جىلعى سانىندا «ەگەمەنگە» ەلدەن كەلدى» ايدارىمەن «تەنتىرەتكەن تەرگەۋ ءىسى» اتتى ماقالا جاريالانعان ەدى. وندا كەز ىندە ءوزى دە تەرگەۋشى بولىپ جۇمىس ىستەگەن ا.ساتمۇحانبەتوۆتىڭ بالاسىنىڭ ولىمىنە قاتىستى قۇقىق قورعاۋ ورگاندارىن ايىپتاعان شاعى­مىن­داعى كەلەڭسىزدىك, ياعني قىزمەت بابىندا ءجۇرىپ كولىك اپاتىنا ۇشىراعان پولي­تسيا وفيتسەرىنىڭ بىرنەشە ساعات بويى ولىممەن ارپالىسقان ءحالى, ونى قۇت­قارىپ قالۋعا بولاتىندىعى جايىن­داعى دارىگەرلەردىڭ وزەكتى ورتەر تۇجى­رىمى, دارمەنسىز جاننىڭ جەكە ءمۇل­كىنىڭ تونالۋىنا جول بەرگەن پوليتسيا قىزمەتكەرلەرىنىڭ سەلقوستىق تانىتۋى تۋرالى جان-جاقتى اشىلىپ كورسەتىلدى. وسىعان وراي شىعىس قازاقستان وبلىستىق پروكۋرورىنىڭ ءبىرىنشى ورىنباسارى ر.اپەكوۆتىڭ اتىنان رەداكتسيامىزعا حات كەلىپ ءتۇستى. وبلىس پروكۋرورىنىڭ ءبىرىن­شى ورىنباسارى ءمالىم ەتكەندەي, 17.11.2014 جىلى اياگوز اۋدانىنىڭ پرو­­كۋ­را­تۋراسى تاراپىنان قك-ءنىڭ 316-بابىمەن قىلمىستىق ءىس قوزعالىپ, الدىن الا تەرگەۋدى جالعاستىرۋ ءۇشىن ءىس تەرگەۋ رەتتىلىگىمەن ءتيىستى ورگانعا جولدانىپتى. الايدا قىلمىستىق ءىس بىرنەشە رەت وندىرىستەن توقتاتىلىپ (قىسقارتىلىپ), سوتقا دەيىنگى تەرگەپ-تەكسەرۋ تولىق كولەمدە جۇرگىزىلمەۋىنە بايلانىستى قىلمىستىق ءىستى توقتاتۋ تۋرالى قاۋلىلار بۇزىلعان. سوڭعى رەت, ياعني 20.04.2016 جىلى شى­عىس قازاقستان وبلىسى بويىنشا سى­باي­لاس جەمقورلىقتىڭ الدىن الۋ ءجونىن­دەگى ۇلتتىق بيۋرو دەپارتامەنتىنىڭ باسشىسى ب.باينيازوۆ قپك-ءنىڭ 35-بابى 1-بولىگى 2-تارماعى نەگىزىندە قىلمىستىق ءىستى توقتاتۋ تۋرالى قاۋلى شىعارعان. الايدا قىلمىستىق ءىس قۇجاتتارىمەن تانىسۋ بارىسىندا ءىستى توقتاتۋ تۋرالى قاۋلى ءىستىڭ ءمان-جايى وەكتيۆتى ءتۇر­دە جان-جاقتى جانە تولىق تەكسەرىل­مەي, نەگىزسىز شى­عارىل­عاندىعى انىق­تال­دى. ءسويتىپ, قازىرگى كۇنى گازەتتە كەلتى­رىل­گەن فاكتى­لەر راستالىپ, ەندى قىل­مىس­تىق ءىستىڭ تەرگەلۋى اياگوز اۋداندىق پرو­كۋرو­رى­نىڭ قاداعالاۋىنا الىنىپتى. «ەگەمەن-اقپارات»