قاجىمۇقاننىڭ 145 جىلدىق مەرەيتويى اتاپ ءوتىلدى (فوتو)

استانا ىرگەسىندەگى قاجىمۇقان اۋىلىندا قازاقتىڭ داڭقتى بالۋانى قاجىمۇقان مۇڭايتپاسوۆتىڭ 145 جىلدىق مەرەيتويى اتاپ ءوتىلدى. تاۋەلسىزدىكتىڭ 25 جىلدىعىمەن قاتار كەلگەن توي مەرەكەلى شارالارعا جالعاسىپ, سپورت سايىستارمەن ورنەكتەلدى. الدىمەن تسەلينوگراد اۋدانىنىڭ اكىمى مالعاجار تاتكەەۆ بالۋان بابامىز جايلى ەستەلىكتەر ايتىپ, شارانىڭ ماڭىزدىلىعىن اتاپ ءوتتى. «قاجىمۇقان مۇڭايتپاسوۆتىڭ تۋعانىنا 145 جىل تولۋى تاۋەلسىزدىكتىڭ 25 جىلدىق مەرەكەسىمەن قاتار كەلىپ وتىر. مەن اۋىل تۇرعىندارىن جانە قوناقتاردى وسى قوس مەرەكەمەن قۇتتىقتايمىن. بۇگىندە قاجىمۇقان اۋىلى گۇلدەنىپ, ءوسىپ-وركەندەپ كەلەدى. ءبىز 2014 جىلى بابامىزدىڭ ەسكەرتكىشىن ورناتتىق. اينالاسىن قورشاپ, اباتتاندىردىق. مەكتەپتە وعان ارنالعان شاعىن مۇراجاي اشتىق. وسى ارقىلى وسكەلەڭ ۇرپاققا باتىر بابا ەرلىگىن, وتانعا دەگەن سۇيىسپەنشىلىگىن, بوز كىلەمدەگى جارقىن جەڭىستەرىن ايتىپ, ناسيحاتتاۋدى قولعا الدىق. تاعى ءبىر ايتا كەتەرلىگى, قاجىمۇقان اتامىزعا ارنالعان وسى شارانىڭ وتۋىنە اۋدان, اۋىل كاسىپكەرلەرى قول ۇشىن سوزىپ, اقساقالدار القاسى مۇرىندىق بولدى. بارشاڭىزعا زور العىس بىلدىرەمىن», – دەدى اۋدان اكىمى. سونىمەن قاتار, مالعاجار تاتكەەۆ تويدىڭ وتۋىنە اتسالىسقان ءبىر توپ ازاماتتاردى ماراپاتتاپ, العىس حات تابىس ەتتى. مۇنان سوڭ ساحنا تورىنە وسى اۋداننىڭ تۋماسى, كۇش سىناسۋدان الەمدىك سايىستاردىڭ بىرنەشە دۇركىن جەڭىمپازى سەرگەي تسىركۋلنيكوۆ كوتەرىلىپ, ۇلكەن شەگە مايىستىرىپ, شىنجىر ءۇزىپ, شەگەلەردى اعاشقا قولىمەن قاعىپ حالىقتى تاڭعالدىردى. ەڭ باستىسى, ول ۇلكەن-ۇلكەن 12 شەگەنى 1 مينۋت 41 سەكۋندتا مايىستىرىپ, الەمدىك رەكوردتى جاڭارتتى. بۇعان دەيىن 6 شەگەنى 2 مينۋت 35 سەكۋندتا رەسەيلىك بالۋان بۇراپ تاستاپ الەم رەكوردىن وزگەرتكەن ەكەن. شارا بارىسىندا كۇرەس, كىر تاسىن كوتەرۋ سەكىلدى سپورتتىق ويىندار وينالىپ, كۇشتى جىگىتتەر تەمىر تەحنيكانى سۇيرەدى. تالعات رايىمبەك