جەلىسى ۇزىلمەگەن جەڭىس

«بالاسى اتقا مىنسە, اناسى تاقىمىن قىسادى» دەيتىن اتالى ءسوز بار. بەلارۋس جەرىندە وتكەن بيىلعى «سلاۆيان بازارى – 2016» بايقاۋىندا باق سىناعان جەرلەسىمىز جاس ءانشى, قازاق ەستراداسىندا «اDAM» دەگەن اتپەن تانىلعان داۋرەن ورازبەكوۆ ءۇشىن الاڭداپ, ءۇمىت كۇتكەندەر كوپ بولدى. وتكەن جىلى ديماش قۇدايبەرگەنوۆ اتال­عان الا­ماننىڭ الدىنان كو­رىنىپ, باس بايگەنى قانجىعاسىنا بايلاپ قايتقانىن ءباسپاسوز بەتتەرى جارىسا جازعانى بەلگىلى. دەگەنمەن, «جىل سايىن جىلى قاباق تانىتا بەرە مە, وسى جولى ولجاسىز قالامىز با؟» دەگەن كۇدىك تە بولدى. بىراق, «ارەكەتتىڭ بەرەكەتى بولادى» دەمەكشى ادامنىڭ ەڭبەگى ەلەنىپ, ءبىرىنشى ورىندى ەنشىلەپ قايتتى. الەمنىڭ 44 ەلىنەن كەلىپ سىنعا تۇسكەن ونەرپازداردىڭ اراسىنان ءوزىنىڭ باعى جانىپ, جۇلدەلى ورىنعا يە بولعانىن جاس ءانشى ۇلكەن جەتىستىگىم دەپ باعالاپ, ءارى قاراي تاباندى ەڭبەك ەتۋگە تالپىناتىنىن جەتكىزدى. «وسىمەن حXV مارتە وتكى­زىلگەن حالىقارالىق باي­قاۋ­عا قاتىسۋدىڭ ءوزى جە­ڭىس دەپ وي­لايمىن. ماعان قول­داۋ ءبىل­دىرىپ, قولۇشىن بەرگەن ءما­دە­نيەت جانە سپورت مينيس­تر­لىگىنە, جانكۇيەرلەرىمە ۇلكەن ال­عىسىمدى بىلدىرەمىن. مەن باي­قاۋدىڭ ءبىرىنشى كۇنى دانيل كوروتاەۆتىڭ سوزىنە جازىلعان «يسپوۆەد» ءانىن ورىنداپ, 77 ۇپايعا, ال بايقاۋدىڭ سوڭعى كۇنىندە «Sam Smith “I’m Not The Only» ءانىن ورىنداپ, 78 ۇپايعا يە بولدىم. وسىلايشا ەكى كۇن بويى جيناعان 155 ۇپايىم ارقىلى ءبىرىنشى ورىنعا قول جەتكىزدىم», – دەيدى جاس ءانشى. حالىقارالىق بايقاۋدىڭ قازىلارى قاتارىندا ۆالەري لەونتەۆ, ناتاليا موگيلەۆسكايا, ناعيما ەسقاليەۆا جانە الەك­ساندر تيحونوۆيچ بولعان. ءتورت كۇنگە سوزىلعان ونەر ءباي­گەسىندە باعى جانىپ, بابى كەلىپ, كورەرمەندەردىڭ كوڭىلىنەن شى­عىپ, قازىلاردىڭ جوعارى ۇپايىن العان بەلارۋسيالىق ءانشى جەڭىمپاز اتانعانىن دا ايتا كەتكەنىمىز ورىندى. ءسوز باسىندا بىلتىرعى «سلا­ۆيان بازارى – 2015» بايقاۋى­نىڭ جەڭىمپازى ديماش قۇداي­بەرگەنوۆ بولعانىن اتاپ وتتىك. ال وسى جىلى فەستيۆالدى ۇيىم­دا­ستىرۋشىلار ديماشتى كون­تسەرتتىك باعدارلاماعا رەسمي تۇردە شاقىرعان. ول وندا «وپيات مەتەل» كومپوزيتسياسىن ورىنداعان. اتالعان ءان بايقاۋىنىڭ جۇلدە قورى دا از ەمەس ەكەن. جەڭىمپاز جەرلەسىمىز قانجىعاسىنا باي­لاعان قاراجاتىنا ۇيلەنىپ, توي جاسايتىنىن دا جاسىرمادى. راۋان قايدار, «ەگەمەن قازاقستان»