قازاقتىڭ بەلگىلى جازۋشىسى, اقىن, مادەنيەتتانۋشى, اۋدارماشى جانە دراماتۋرگ, فيلوسوفيا عىلىمدارىنىڭ دوكتورى اۋەزحان قودار قايتىس بولدى. بۇل تۋرالى 9 شىلدە كۇنى اقىن اقبەرەن ەلگەزەك Facebook جەلىسىندەگى ءوزىنىڭ پاراقشاسىندا حابارلادى.
«اۋەزحان قودار اعامىز دۇنيەدەن ءوتتى دەگەن قارالى حابار الىپ جاتىرمىز. كەشە عانا جاس قالامگەرلەر تۋرالى سەريالى ماقالالار جازىپ, جاس تالانتتارعا سەرپىن بەرگەن اعامىزدان ايىرىلىپ قالعانىمىز وكىنىشتى-اق. باعاسىن بىلدىك پە, جوق پا, ول دا سۇراق...
قازاق ويىنىڭ ءبىر ۇلكەن اسقارى ەدى, جارىقتىق. يمانى جولداس, جانى جانناتتىق بولسىن. اللا الدىنان جارىلقاسىن», - دەپ جازادى ەلگەزەك.
اۋەزحان قودار 1958 جىلعى 12 ماۋسىمدا قىزىلوردا وبلىسىنىڭ قارماقشى اۋدانىنداعى ابىلا تەمىرجول بەكەتىندە تۋعان. 1982 جىلى قازمۋ-دىڭ زاڭ فاكۋلتەتىن بىتىرگەن. 1982–1985 جىلدارى قىزىلوردا وبلىسى, قارماقشى اۋاتكومىنىڭ جاسوسپىرىمدەر جونىندەگى كوميسسيانىڭ حاتشىسى, 1989–1994 جىلدارى قازاقستان جازۋشىلار وداعى جانىنداعى كوركەم اۋدارما جانە ادەبي بايلانىستار جونىندەگى رەداكتورى باس القاسىندا ورىس ءبولىمىنىڭ مەڭگەرۋشىسى, 1994 جىلدان قازاقستان حالىقتارىنىڭ مادەنيەتىن قورعاۋ جونىندەگى «التىن عاسىر» قوعامدىق بىرلەستىگىنىڭ پرەزيدەنتى بولدى. 1997–1998 جىلدارى نەمىس تەاتر اكادەمياسىندا فيلوسوفيا تاريحىنان ءدارىس بەردى. 1999 جىلدان «تامىر» جۋرنالىنىڭ باس رەداكتورى بولىپ كەلدى.
ەكى تىلدە بىردەي جازاتىن اۋەزحان قودار جازۋشىلىقتاعى جاڭا تولقىننىڭ وكىلى ەدى. جازۋشىنىڭ قالامىنان «تۋعان كۇن», «اقەدىلدىڭ انتى» پەسالارى (1986), «قاناتتى ورنەك» (1990), «اباي (يبراھيم) قۇنانباەۆ» جيناعى (1996), «ەسكە الماۋ شەڭبەرى» (1998), «قازاق ادەبيەتىنىڭ تاريحىنا شولۋ» (1999) كىتابى, «قاناعات قاعاناتى» جيناعى (1994) تۋدى. ول قازاق تىلىنە ە.ءزامياتيننىڭ «اتتيلا» دراماسىن, م.حايدەتتەر, ح.گاسەتتىڭ فيلوسوفيالىق ەڭبەكتەرىن, شۆيتتەرستىڭ ولەڭدەرىن, ال ورىس تىلىنە اباي, ماعجان, ج.جاقىپباەۆ شىعارمالارىن اۋدارعان. قودار رەسپۋبليكالىق شىعارماشىلىق جاستار «جىگەر» فەستيۆالىنىڭ لاۋرەاتى ەدى.
جازۋشى بالا جاسىنان مۇگەدەك بولدى. «مەن ءتورت جاسىمنان اۋىردىم, - دەپ جازدى ءوزى بۇل تۋرالى. – بىردە اكە-شەشەم مەنى قوناققا الىپ باردى. ۇيگە كەلگەن كەزىمىزدە مەن كەنەتتەن ەكى اياعىمنىڭ بىردەي جۇرمەي قالعانىن ءبىلدىم. جالپى, سۇمدىق ءبىر جاعداي ورىن الدى. مەدبيكەنى شاقىرتتى. ول كەلىپ ينە شانىشتى. بىراق سودان كەيىن بەزگەك ۇستاعانداي بولىپ اۋىرىپ, ءتىپتى قاقساپ كەتتى. مەنىڭ ىرىمشىل اتا-انام مۇنى كوز تيگەننەن بولدى دەپ ەسەپتەپ, مەنى دارىگەرلەرگە اپارۋدىڭ ورنىنا, ءارتۇرلى ەمشىلەرگە, باقسىلار مەن بالگەرلەرگە سۇيرەي باستادى. كەيىن مۇنىڭ پوليومەليت دەگەن ناۋقاس ەكەنى انىقتالدى».
ومىردەن وسىنداي اۋىر تاعدىرلى تالانتتى قالامگەر ءوتىپ بارا جاتىر.
جاتقان جەرىڭ جايلى, توپىراعىڭ تورقا بولسىن!
مۇرات ايتقوجا.
