كونفەرەنتسيا ءوتتى

تاۋەلسىزدىك سارايىندا «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ جەتەكشىلىگىمەن پارتيانىڭ كەزەكتەن تىس كونفەرەنتسياسى ءوتىپ, كۇن تارتىبىندە استانا قالالىق فيليالى توراعاسىن تاعايىنداۋ مەن ساياسي كەڭەس قۇرامىنا وزگەرىستەر ەنگىزۋ تۋرالى ەكى ماسەلە تالقىلاندى.  «نۇر وتان» پارتياسى استانا قالالىق فيليالى كەزەكتەن تىس ءححىىى قالالىق كونفەرەنتسياسىنىڭ قاۋلىسى مەن قوعامدىق بىرلەستىك جارعىسىنىڭ 9,6 تارماعىنا سايكەس, ادىلبەك جاقسىبەكوۆ باسقا قىزمەتكە اۋىسۋىنا بايلانىس­تى توراعالىق قىزمەتتەن بوساتىلدى. سونداي-اق, وسى قاۋلى نەگىزىندە استانا قالاسىنىڭ اكىمى اسەت يسەكەشەۆ پارتيانىڭ قالالىق فيليالى توراعاسى بولىپ تاعايىندالدى. كونفەرەنتسيادا ەلوردامىز – استانا قالاسىنىڭ بۇگىندە قازاقستاننىڭ نەگىزگى وندىرىستىك ورتالىقتارىنىڭ ءبىرى رەتىندە قالىپتاسىپ, دامۋ قارقىنى مەن دوتاتسيالىق قالادان رەسپۋبليكالىق بيۋدجەتتىڭ نارلەندىرۋشى-ايماعىنا اينالعانى تۋرالى ايتىلدى. وسى رەتتە ءسوز العان جيىن جەتەكشىسى م.قۇل-مۇحاممەد:  «مەملەكەت باسشىسى نۇرسۇلتان نازارباەۆ استانانى دامىتۋدىڭ باسىم باعىتى رەتىندە يننوۆاتسيالىق سالانى كورسەتىپ بەردى. ول جاڭا ەكونوميكالىق مودەلدى قۇرۋعا مۇمكىندىك بەرەتىن ءبىزدىڭ باس­تى ستراتەگيالىق ماقساتىمىز بولىپ تابىلادى. سونىمەن قاتار, بۇل قادام ەلىمىزدى الەمنىڭ ەڭ دامىعان 30 ەلىنىڭ قاتارىنا قوسۋدى قامتاماسىز ەتەدى. ەكسپو-2017 حالىقارالىق كورمەسى قارساڭىندا بۇل ماسەلە وزەكتىلىگىن جويماق ەمەس. سوندىقتان «نۇر وتان» پارتياسى ەلباسى تاپسىرمالارىنىڭ ورىندالۋ ساپاسىن قاتاڭ باقىلاۋمەن قامتاماسىز ەتۋى ءتيىس», – دەدى. باسقوسۋدىڭ كۇن تارتىبىنە شىعارىلعان ەكىنشى ماسەلە قالالىق فيليالدىڭ ساياسي كەڭەس قۇرامىنا وزگەرىستەر ەنگىزۋ جايى بولاتىن. داۋىسقا سالۋ ناتيجەسىندە, كونفەرەنتسياعا قاتىسۋشىلار ۇسىنىلعان كانديداتۋرانى قولداپ, ساياسي كەڭەس قۇرامىنا وزگەرىستەر ەنگىزۋ باستاماسىن ءبىراۋىزدان ماقۇلدادى. بۇل جونىندە ارنايى بايانداما جا­ساعان «نۇر وتان» پارتياسى استانا قا­لالىق فيليالى ۇيىمداستىرۋ-با­قى­لاۋ جۇمىستارى ءبولىمىنىڭ مەڭ­گە­رۋشىسى  نۇرال ايداشەۆ سالتانات فاي­زول­لاقىزىن, قايرات كەڭەسبەك ۇلىن, ەردەن ەرلان ۇلىن, مەيرامباي ورالوۆ پەن بەكبول ءۇبايدوللا ۇلىن, گۇلنار ەرەجەقىزىن ساياسي كەڭەس قۇرامىنان شىعارۋدى, ال اسەت يسەكەشەۆ پەن ۆلا­ديسلاۆ سەرگەەۆتى, گايدار قابدول­لا ۇلى مەن جانات عازيز ۇلىن جانە سايات نۇرلان ۇلىن كەڭەس قۇرامىنا قا­بىلداۋدى ۇسىناتىندىعىن ءبىلدىردى. ءسوي­تىپ, قاتىسۋشى 192 دەلەگاتتىڭ بار­لىعى دا ساياسي كەڭەستىڭ جاڭا قۇرامىنا ءبىراۋىزدان قولداۋ ءبىلدىردى. وسىنداي رەسمي تاعايىنداۋلاردان كەيىن ءسوز العان سپيكەرلەر استانا تاۋەلسىزدىك مەرەيىنىڭ جارقىن كەلبەتى ەكەنىنە ەرەكشە توقتالىپ, پارتيا جە­تەكشىلەرىنىڭ الدىنداعى ماڭىزدى ءمىن­دەتتەردى ناقتىلاي ءتۇستى. بۇل رەتتە الدىمەن سويلەگەن اسەت ورەنتاي ۇلى بىلدىرىلگەن سەنىم ۇدەسىنەن شىعۋعا كۇش-جىگەرىن ايامايتىندىعىن جەتكىزدى. «شاھاردا ءبىلىم جانە مەديتسينالىق كلاستەرلەر, لوكوموتيۆ قۇراستىرۋ جانە ۆاگون قۇرىلىسى كەشەندەرى, سونداي-اق, ورتالىق ازيا مەن سىبىردەگى ءىرى جاڭا كولىك-لوگيستيكالىق ورتالىعى قۇرىلدى. ەندىگى جەردە وسى كەزگە دەيىن اتقارىلعان شارۋالاردىڭ شاشاۋىن شىعارماي, ءىلىپ اكەتىپ جالعاستىرۋ, ءبىزدىڭ باستى مىندەتىمىز بولماق», دەدى قالا اكىمى. سونىمەن قاتار, نۇرال ايداشەۆ جاس­تارمەن جۇمىس جۇرگىزۋدىڭ باعىت باع­دارىنان كوپشىلىكتى حاباردار ەتتى. پارتيا توراعاسىنىڭ ءبىرىنشى ورىنباسارى جيىنعا قاتىسۋشىلارعا «100 ناقتى قادام» ۇلت جوسپارى مەن «نۇرلى جول» باعدارلاماسىن 100 پايىز جۇزەگە اسىرۋ كەرەكتىگىن ايتتى. بۇل سالا بويىنشا پارتياعا ماڭىزدى رەۆيزيالىق فۋنكتسيا بەرىلگەنىن ەسكە الىپ, «نۇر وتان» پارتياسىنىڭ استانا قالالىق فيليالى اسەت يسەكەشەۆتىڭ توراعالىعىمەن پرەزيدەنت تاپسىرمالارىن ءتيىمدى ورىندايتىندىعىنا سەنىم ارتتى. نۇرلىبەك دوسىباي, «ەگەمەن قازاقستان»