شكافتان تابىلعان 150 مىڭ ەۋرو

وسىدان بىرنەشە كۇن بۇرىن گەرمانيانىڭ ميندەن قالاسىندا مۇحاممەد ەسىمدى بوسقىن قايىرىمدىلىق ۇيىمى بەرگەن شكافتان 150 مىڭ ەۋرو كولەمىندە اقشا تاۋىپ الىپتى. ويلاماعان جەردەن بايلىققا كەنەلگەن ول كوپ ويلانباستان, جەرگىلىكتى بيلىككە قايتارىپ بەرگەن ەكەن. وتكەن جىلى عانا سيريادان قونىس اۋدارىپ كەلگەن 25 جاستاعى جىگىت بۇل ءىسى ارقىلى كوپشىلىكتىڭ ىستىق ىقىلاسىنا بولەنىپ ۇلگەردى. مالىمەتتەرگە قاراعاندا, 50 مىڭ ەۋرو قولما-قول تۇرىندە بولسا, قالعان 100 مىڭ ەۋرو چەك تۇرىندە تاقتايدىڭ ىشىندە جاسىرىلعان ەكەن. وسىدان سوڭ سيريالىق ازامات بىردەن ءتيىستى ورىندارعا حابار بەرگەن. – مۇحاممەد كوپشىلىككە ۇلگى بولارلىقتاي ءىس جاسادى. بۇگىندە تابىلعان اقشانى پوليتسيا قىزمەتكەرلەرىنە تاپسىراتىندار جوق دەپ ايتۋعا كەلمەس. بىراق مۇنداي قوماقتى قارجىنى قايتارعاندى العاش كورىپ وتىرمىن, – دەدى پوليتسيا قىزمەتكەرىنىڭ ءبىرى. قازىرگى تاڭدا قۇقىق قورعاۋ ورگاندارى اقشانىڭ ءوز يەسىن ىزدەستىرۋدە. مۇحاممەد گەرمانياعا 2015 جىلدىڭ قازان ايىندا كەلگەن. بۇگىندە ول نەمىس ءتىلىن ارنايى كۋرستاردان ۇيرەنىپ جاتىر. تۋعان ەلىندە ول بايلانىس تەحنولوگيالارى ماماندىعى بويىنشا ءبىلىم العان ەكەن. الداعى ۋاقىتتا وسى ءبىلىمىن جەرگىلىكتى جوعارى وقۋ ورىندارىنىڭ بىرىندە جالعاستىرۋدى ماقسات ەتىپ وتىر. ايتا كەتەيىك, بۇگىندە تاياۋ شىعىس ەلدەرىندەگى جاعدايدىڭ قيىندىعىنا بايلانىستى ەۋروپاعا كوشىپ جاتقانداردىڭ قاتارى كۇن ساناپ ارتىپ بارادى. بىرىككەن ۇلتتار ۇيىمى ءبىر عانا سيريادا 4,6 ميلليون ادام تۋعان ەلىن تاستاپ كەتۋگە ءماجبۇر بولعانىن حابارلادى. ال, جالپى العاندا, كوپتەگەن ەلدەردەگى بوسقىنداردىڭ سانى ميلليونداعان ادامدى قۇراپ وتىر. ايان ءابدۋالي, «ەگەمەن قازاقستان»