ەلورداعا – ەرەكشە سىي

قازاقستان رەسپۋبليكاسىنىڭ ۇلتتىق مۋزەيى قازاقستان حالقى اسسام­ب­لەيا­سى­مەن بىرلەسىپ, استانا كۇنىنە تارتۋ رەتىندە «قازاقستان – مەنىڭ وتانىم» اتتى قولدان توقىلعان مونۋمەنتالدى-دەكوراتيۆتىك تۋىندى – ولشەمى 430ح600 سانتيمەترلىك گوبەلەندى كوپشىلىك نازارىنا ۇسىندى. كومپوزيتسيانىڭ ناق ورتاسىندا, قازاق­ستاندا تۇراتىن ەتنوستاردىڭ ۇلت­تىق كيىمدەرىن كيگەن ادامدار ءمۇسىن­دەرى بەينەلەنگەن ويۋ-ورنەكتى شەڭبەردىڭ فونىندا بەيبىتشىلىك جانە كەلىسىم سارايى قاس­بەتىنىڭ قازاقستان حالقى اسسام­ب­لەيا­سىنىڭ لوگوتيپى بار سۋرەت ورنالاسقان. ۇلتتار وكىلدەرىنەن تۇراتىن شەڭ­بەر­دىڭ ورتاسىندا, قوناقجايلىق پەن كەڭ­­پەيىل­دىلىكتى ءبىلدىرىپ, قولىن قۋانا كوتەرىپ تۇرعان قازاقستان رەسپۋب­ليكا­سى­نىڭ پرەزيدەنتى نۇرسۇلتان ءابىش ۇلى نازارباەۆتىڭ سۋرەتى توقىلعان. شەڭبەردىڭ توبەسى قازاقستان حالقى­نىڭ بىرلىگىنە نەگىزدەلگەن مەملەكەتتىك بي­­لىك­­­تىڭ سيمۆولى رەتىندە اقوردانىڭ قاس­بەتى­نىڭ بەينەسىنە كەلىپ تىرەلەدى. گوبەلەن­نىڭ ءبۇيىر بولىكتەرى تاعدىر ءتال­كەگى­مەن قازاق­­ستان­عا كەلىپ پانا تاپقان كوپ­تە­گەن ۇلت­تار­دى تۋعانىنداي باۋىرىنا باس­قان حالىق­تىڭ جان سۇلۋلىعىن بەي­­نە­­لەي­­تىن, باس­قۇر­لارداعى قازاق ويۋ-ورنە­گى­­نىڭ اشە­كەي­لەنگەن سۋرەتتەرىمەن تولتى­رىلعان. ەل بىرلىگىن توقىما ونەرى ارقىلى بەينە­لەگەن ەرەكشە جوبانىڭ اۆتورلارى – قازاق­ستان رەسپۋبليكاسى سۋرەتشىلەر وداعى­نىڭ مۇشەلەرى, «دارىن» مەملەكەت­تىك سىيلىعىنىڭ لاۋرەاتتارى ايدار جامحان مەن مالىك مۇقانوۆ. بۇل ونەر تۋىندىسىنىڭ كوركەمدىك ءمانى دە سوندا – گوبەلەندە قازاقستان حالقى­نىڭ بىرلىگى يدەياسى قازاق حالقى­نىڭ ءداستۇرلى قولونەرى ارقىلى شىعارما­شىلىق تاسىلمەن بەرىلىپ, تاۋەلسىز قازاق­ستاندى سيپاتتايتىن وزىندىك ەرەكشەلىگى مول سيمۆوليكالار ۇيلەسىمدى تۇردە كومپوزيتسيا رەتىندە كورىنىس تاپقان. گوبەلەن ازياداعى ءوزارا ءىس-قيمىل جانە سەنىم شارا­لارى جونىندەگى كەڭەس (اوسشك) ۇلتتىق-مادەني ورتالىق­تارى­نىڭ قازاقستان رەسپۋب­ليكاسى تاۋەلسىز­دىگى­نىڭ 25 جىلدىعىنا ارنالعان «الەم. ءححى عاسىر»: اوسشك ەلدەرى ىنتى­ماق­­تاس­تىعىنىڭ جاڭا پەرسپەكتيۆالارى» اتتى ازاماتتىق فورۋم اياسىندا جۇرت­شى­لىق­قا تانىستى­رىلىپ, تۇساۋى كەسىلدى. مەرەكەلىك شاراعا قاتىسقان قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ, پارلامەنت ءماجىلىسىنىڭ دەپۋتاتى, دەپۋتاتتىق توپتىڭ جەتەكشىسى ساۋىتبەك ابدراحمانوۆ, قازاقستان رەسپۋبليكاسى ۇلتتىق مۋ­زەيى­نىڭ ديرەكتورى دارحان مىڭباي, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قحا كافەدراسىنىڭ مەڭگەرۋشىسى اناتولي باشماكوۆ ءوز سوزدەرىندە گوبەلەندە بەينەلەنگەن قازاقستاندىقتاردىڭ جالپىۇلتتىق بىرلىگى, دوستىعى مەن قوعام­دىق كەلىسىمىن بىلدىرەتىن كومپو­زيتسيانىڭ تەرەڭ ماعىناسىنا ءمان بەردى. شاراعا قىرعىز رەسپۋبليكاسى مەن تايلاند كورول­­دىگىنىڭ رەسمي دەلەگاتسياسى, رەسەي مەن تاجىكستاننىڭ ساراپشىلىق قاۋىم­داس­تىق وكىلدەرى, بەلارۋس, ازەرباي­جان, اۋعانستان مەن جاپونيا­نىڭ قازاق­ستان­­داعى ديپلوماتيالىق ميسسيا­لارى­نىڭ وكىلدەرى, اوسشك ەلدەرى ۇلتتىق-مادەني ورتالىقتارىنىڭ وكىل­دەرى, پار­لامەنت دەپۋتاتتارى, قازاق­ستان حالقى اسسام­بلەيا­سىنىڭ مۇشەلەرى, بەلگىلى قوعام جانە ساياسي قايراتكەرلەر قاتىستى. «ەگەمەن-اقپارات»