وسىدان ءۇش جىل بۇرىن الماتىدا قازاقستان تەڭىز فلوتى ءۇشىن الەمدىك دەڭگەيدەگى كاسىبي ماماندار دايارلاۋعا رۇقسات رەتىندە ءۇش رەت قاتارىنان ءداستۇرلى كەمە قوڭىراۋى سوعىلعان-دى.
ەندى مىنە, الماتى قالاسىندا 4 جىلدىق وقۋ باعدارلاماسىن ءتامامداپ, باكالاۆر دارەجەسىن العان قازاقستان تەڭىز اكادەمياسىنىڭ العاشقى 16 كادەتىنە ديپلوم تاپسىرۋ سالتاناتتى ءراسىمى ءوتتى. راسىمگە ەلىمىزدىڭ مەملەكەتتىك ورگاندارى, وقۋ ورىندارى, «تەڭىزشەۆرويل» جاۋاپكەرشىلىگى شەكتەۋلى سەرىكتەستىگى اكتسيونەرلەرى, مۇددەلى تاراپتار جانە باق وكىلدەرى قاتىستى.
قازاقستان تەڭىز اكادەمياسى 2012 جىلى قازاقستان پرەزيدەنتىنىڭ تاپسىرماسى بويىنشا تەڭىزدەگى مۇنايگاز كەن الاڭدارىن يگەرۋدى قولداۋ جانە ءداستۇرلى مۇنايگاز سەكتورىنان تىس قازاقستان ازاماتتارىن جۇمىسپەن قامتۋ ماقساتىندا قۇرىلعان.
قازاقستان تەڭىز اكادەمياسى «تەڭىزشەۆرويل» جاۋاپكەرشىلىگى شەكتەۋلى سەرىكتەستىگىنىڭ تىكەلەي قولداۋىمەن قۇرىلىپ, وعان قازاق-بريتان تەحنيكالىق ۋنيۆەرسيتەتى سەرىكتەس بولدى. قازاقستان تەڭىز اكادەمياسىنىڭ حالىقارالىق سەرىكتەستىگىنە تەڭىز ءبىلىمى سالاسىنداعى كونگلومەرات – STC-Group (نيدەرلاند) كومپانياسى شاقىرىلدى. «شەۆرون شيپپينگ» كومپانياسى كادەتتەردىڭ حالىقارالىق دەڭگەيدەگى زاماناۋي كەمەلەردە تاجىريبەدەن وتۋىنە كاسىبي تۇرعىدا قولداۋ كورسەتىپ, تاجىريبە ساباقتارىن ۇيىمداستىردى. سونىمەن قاتار, اكادەميانىڭ التى تۇلەگىن تاعىلىمگەر رەتىندە قابىلدادى.
«تەڭىزشەۆرويل» كاسىپورنى اتىنان اكادەميا تۇلەكتەرىن وقۋدى بىتىرۋىمەن قۇتتىقتايمىن! ءوز بويلارىڭداعى ماقساتكەرلىكتىڭ, قازاقستان رەسپۋبليكاسى ۇكىمەتى مەن سەرىكتەستەرىمىزدىڭ قولداۋى ارقاسىندا سىزدەر تەڭىز تاسىمالى سالاسىندا حالىقارالىق تۇرعىدا مويىندالعان قازاقستاندىق مامان بولاسىزدار, – دەدى باس ديرەكتورىنىڭ مىندەتىن اتقارۋشى يمەر بوننەر.
قازىرگى تاڭدا 84 كادەت قازاقستان تەڭىز اكادەمياسىندا ءبىلىم الۋدا.
«قازاقستان تەڭىز اكادەمياسى مەن ءۇشىن جاڭا ءومىر اشتى, ول – تەڭىز ءومىرى», – دەپ اتاپ ءوتتى قازاقستان تەڭىز اكادەمياسىنىڭ كادەتى ارايلىم بەكوۆا.
«تەڭىزشەۆرويل» ينۆەستيتسيالار جانە دامۋ مينيسترلىگىنە تەڭىزشىلەردى دايارلاۋ, اتتەستاتسيادان وتكىزۋ جانە ۆاحتالىق ءادىستى ەنگىزۋ تۋرالى حالىقارالىق كونۆەنتسيا تالاپتارى مەن شارتتارىنا ساي ەكەندىگىن دالەلدەۋ شارالارى بويىنشا كومەك بەرۋدى جالعاستىرىپ كەلەدى. بۇل قازاقستان تەڭىزشىلەرىنە قازاقستان رەسپۋبليكاسىنىڭ اۋماقتىق سۋلارىنان تىس ساپارلارعا دا شىعۋعا مۇمكىندىك بەرەدى.
ايناش ەسالي
