ايشىقتى تارتۋ

ۇلتتىق مۋزەيدە استانا كۇنى مەرەكەسى قارساڭىندا «كاميل مۋللاشەۆتىڭ رەتروسپەكتيۆاسى. مەنىڭ زامانىم» كورمەسى سالتاناتتى جاعدايدا اشىلدى. قىلقالام شەبەرىنىڭ تاڭداۋلى تۋىندىلارى ۇسىنىلعان كورمەدە ۇلتتىق مۋزەيدىڭ ديرەكتورى دارحان مىڭباي اۆتوردىڭ ەڭبەكتەرىنە جوعارى باعا بەرە كەلىپ: «كاميل مۋللاشەۆتىڭ ەسىمى ءوز ەلىمىزدە عانا ەمەس, الىس-جاقىن شەتەلدەردە دە كەڭىنەن تانىمال. ول ءتول تۋىندىلارىندا بالالىق شاعىنان باستاپ بۇگىنگى تاڭعا دەيىنگى ءومىر باسپالداقتارىن كوركەم تىلمەن كوسىلە بەينەلەگەن. ودان بولەك, اۆتوردىڭ شىعارماشىلىق جۇمىستارىنان قازاقى بوياۋدى, قازاقى مىنەزدى اڭعارۋعا بولادى. ونىڭ ەڭبەكتەرى سونىسىمەن دە قۇندى. كاميل اعامىزدىڭ تۋىندىلارى ۇلتتىق مۋزەيدەن ورىن الىپ, كوپشىلىكتىڭ كوزايىمىنا اينالىپ جاتقانىنا وتە قۋانىشتىمىز, – دەدى. استانا قالاسى اكىمىنىڭ ورىنباسارى ەرمەك امانشاەۆ كورمەدەگى تۋىن­دى­لاردىڭ كوركەمدىك مانىنە توقتالا كەلە, سۋرەتشىگە شىعارماشىلىق تابىستار تىلەدى. – مۇنداعى تۋىندىلاردىڭ قاي-قايسىسى دا ادامنىڭ قىزىعۋشىلىعىن تۋدىرماي قويمايدى. كاميل اعامىزدى ەلىمىزدىڭ ەڭبەك سىڭىرگەن قايراتكەرى رەتىندە جاقسى بىلەمىز. شەبەرحاناسىندا سان رەت بولعانمىن. ونىڭ تۋىندىلارى راسىمەن جوعارى باعاعا يە. كاميل مۋللاشەۆ – قازاق بەينەلەۋ ونەرى جولىندا وزىندىك قولتاڭباسى بار تالانتتى سۋرەتشىلەردىڭ ءبىرى. سوندىقتان اۆتور قانداي قۇرمەتكە دە لايىق, – دەدى ە.امانشاەۆ. سونىمەن قاتار, كورمە اۆتورى ك.مۋللاشەۆ شىعارماشىلىق جۇمىس­تارىنىڭ ەرەكشەلىكتەرى تۋرالى بايانداي كەلىپ, ونەر جولىنىڭ قىر-سىرىنا توقتالدى. – استانا كۇنىنە وراي ارنايى دايىن­داعان كورمەمنەن ءتۇرلى جانرداعى تۋىندىلارىمدى تاماشالاي الاسىزدار. ولاردىڭ ىشىندەگى, اسىرەسە حالقىمىزدىڭ تىنىس-تىرشىلىگى, شىنايى ەڭبەك جولىن­داعى ەرلىك-ونەگەلەرى تۋرالى جاۋھارلار ارقىلى جانىڭىز نۇرلانادى. مەن ءۇشىن 1990-2000-جىلدار وتە جەمىستى بولدى. وسى جۇمىستارىمنىڭ بارلىعى دەرلىك بىرنەشە ەلدەردىڭ اۋىر كەزەڭدەرىنەن حابار بەرەدى. ونىڭ ءبارىن سۋرەت ارقىلى بەينەلەۋ راسىمەن دە وڭايعا تۇسكەن جوق, – دەدى كورمەنىڭ اشىلۋ سالتاناتىندا وي بولىسكەن اۆتور. مەرەكەلىك ءىس-شاراعا رەسەي, قىتاي, تاتارستان ەلدەرىنىڭ ەلشىلەرى, زيالى قاۋىم وكىلدەرى, قوعام قايراتكەرلەرى, عالىمدار مەن ونەرتانۋشىلار قاتىس­تى. ال, ونەر يەسى تۋرالى قىسقاشا ماع­لۇمات بەرسەك, ول – قازاقستاننىڭ ەڭبەك ءسىڭىر­گەن قايراتكەرى, تاتارستاننىڭ عابدوللا توقاي اتىنداعى مەملەكەتتىك سىي­لىعىنىڭ لاۋرەاتى, فرانتسيا كوركەمونەر اكادەمياسىنىڭ كۇمىس مەدالىنىڭ يەگەرى, قىتاي ونەر اكادەمياسىنىڭ اكادەميگى.  ونىڭ تۋىندىلارى مەملەكەتتىك ترەتياكوۆ گالەرەياسىنىڭ, ءا.قاستەەۆ اتىن­­­داعى مەملەكەتتىك مۋزەيدىڭ قور­لا­رىندا ساقتاۋلى. سونىمەن قاتار قا­زاق­­ستاننىڭ جەكە كوللەكتسيالارىنان جانە اقش, فرانتسيا, گەرمانيا, ليح­تەنشتەين, تۇركيا, قىتاي جانە ت.ب. شەت­ەلدەردىڭ گالەرەيالارىنان كەزدەسەدى. ايتا كەتۋ كەرەك, كورمە 1 تامىزعا دەيىن جالعاساتىن بولادى. قارشىعا كۇلەن