كەشە ەلباسى نۇرسۇلتان نازارباەۆ ەلوردا تويىنىڭ باستالعانىن پاش ەتەتىن مەملەكەتتىك تۋدى كوتەرۋ راسىمىندە سويلەگەن سوزىندە استانانىڭ ميلليونىنشى تۇرعىنى دۇنيەگە كەلگەنىن ۇلكەن قۋانىش ۇستىندە ايتتى.
التاي مەن اتىراۋ اراسىنداعى الاش بالاسىنىڭ باسىنداعى بوركىن اسپانعا اتتىرعان بۇل جاعىمدى جاڭالىق سول ساتىندە-اق جاھانعا جايىلدى. قاسيەتتى سارىارقا ساۋىرىندا قازىعى قاعىلىپ, كەرەگەسى كەرىلگەن قازاقستاننىڭ باس قالاسى, مىنە, ەندى مەگاپوليس مەكەنگە اينالدى. بالا جاستان باسىمىزعا جاستاپ وقىعان باتىرلار جىرىنىڭ باستى كەيىپكەرلەرىندەي ساعات ساناپ وسكەن سامالا شاھار ەلىمىزدىڭ جۇرەگى, تاۋەلسىزدىگىمىزدىڭ تىرەگى بولىپ قانا قويماي, تورىندە تورتكۇل دۇنيەنىڭ ساياسات سەركەلەرى ءماندى ءماجىلىس قۇراتىن مارتەبەگە دە يە ەكەندىگى بارىمىزگە بەلگىلى. اللا جارىلقاپ, الدىنان اق كۇن تۋا بەرسىن, اقوردالى استانانىڭ!
ال ەندى استانانى ميلليونەر اتاندىرعان نەسىبەلى نارەستە كىم؟ ايتايىق. قالاداعى №1 پەريناتالدى ورتالىقتا تۋعان قىزدىڭ اتى – سايدا. ول – اتا-اناسىنىڭ كوزىن اشىپ كورگەن تۇڭعىشى. دەمەك, جاراسىم تاپقان جاس جۇبايلاردىڭ قۋانىشىندا شەك جوق ەكەندىگى ايتپاسا دا تۇسىنىكتى. ىڭگالاعان سابيىنە ىلەسىپ ەلوردا تاريحىنا ەنىپ كەتكەلى تۇرسا, قاعاناقتارى قارىق, ساعاناقتارى سارىق بولماي قايتەدى ەندى. كۇلشەلى كىشكەنتايدىڭ اكەسى ولجاس مۇحامەدياردىڭ ماماندىعى ەنەرگەتيك, «استانا-رەك» كاسىپورنىندا ەڭبەك ەتەدى. ال شەشەسى ارايلىم №9 «نۇرشاشۋ» بالاباقشاسىندا تاربيەشى. ەكەۋى وسى استانادا تانىسىپ, تابىسىپ وتاۋ كوتەرىپتى. ەرلى-زايىپتىلار ازىرشە جىگىتتىڭ اكە-شەشەسىنىڭ قولىندا تۇرىپ جاتىر. بولەك شىعۋ ويلارىندا جوق بولاتىن. بىراق, مىنا وڭدى وقيعا جوسپارلارىن وزگەرتىپ جىبەردى. ويتكەنى, ءومىر ەسىگىن ەرەكشە مارتەبەمەن اشقان سايدانىڭ باعى ارتىپ, استانا قالاسىنىڭ اكىمى اسەت يسەكەشەۆ پەرزەنتحانادا مەرەيلى وتباسىنا ەكى بولمەلى پاتەردىڭ كىلتىن بەردى. ءسويتىپ, كوشەلى باسشىعا لايىق ءمارت مىنەز تانىتتى.
قول-اياعىن باۋىرىنا ءالى الا قويماعان ارايلىمدى مازالاماي-اق, توبەسى كوككە ەكى-اق ەلى جەتپەي تۇرعان ولجاستى اڭگىمەگە تارتقان ەدىك.
– جارىمدى تولعاق قىسىپ, پەرزەنتحاناعا اپارعاندا, ەڭ الدىمەن, امان-ەسەن بوسانۋىن تىلەدىم. بوتەن وي بولمادى. ءبىر-اق كۇندە ەسىمىمىزدىڭ ەلىمىزگە ايگىلى بولاتىنىن قايدان بىلەيىن. قاراپايىم قازاقستاندىقتاردىڭ بەيبىت اسپان استىندا بەسىك تەربەتىپ, بەرەكەلى تىرشىلىك كەشۋىنە بارلىق جاعدايدى جاساعان پاراساتتى پرەزيدەنتىمىزگە مىڭ دا ءبىر راحمەت. قامقورلىق كورسەتكەن قالا باسشىلىعىنا ريزامىز. باقىتتان باسىم اينالىپ تۇرعاندىقتان اۋزىما باسقا ءسوز تۇسپەي تۇر, – دەدى ول جۇرەكجاردى العىسىن جاسىرا الماي.
ءوز كەزەگىمىزدە ءبىز دە ەل گازەتى – «ەگەمەننىڭ» اتىنان ايدارىنان جەل ەسكەن ازاماتقا «بالاپانىڭىزدىڭ باۋى بەرىك بولسىن!» دەگەن تىلەگىمىزدى بىلدىردىك.
تالعات باتىرحان,
«ەگەمەن قازاقستان»
ميلليونىنشى!..
كوكىرەگىمدى جارىپ شىقتى جىر گ ۇلى, ءسۇيىنشى, دوستار, بايعازى دەپ ءبىل مۇنى! تۋدى بۇگىن, دۇنيەگە «شىر» ەتىپ, استانانىڭ ميلليونىنشى تۇرعىنى! كۇن دە بۇگىن تىم ەرەكشە جارقىرار, شابىت قۇسى قيا شىڭعا شارق ۇرار. شيرەك عاسىر – استانامنىڭ تاۋەلسىز – ماقتانامىن – ءبىر ميلليون حالقى بار. تۋىمىز – كوك, اسپان دا – كوك, تاس تا – كوك. باۋىر دا – كوپ, تۋىس تا – كوپ, دوس تا – كوپ. باس قالادا تۋ ۇستايتىن قولىنا, تۋدى, مىنە – ميلليونىنشى جاس بوبەك. وسى ەكەن عوي, تىرشىلىكتىڭ جالعاسى, مەرەيتويدا – مەرەكەنىڭ ءدال باسى. بۇل دا ءبىر كۇن – استانانى باسقارار, كىم بىلەدى, بولار ءبىر كۇن ەلباسى! نە جەتەدى ءدال وسى ءبىر مەزەتكە, كۇمبىرلەدى – كۇي قوناقتاپ وزەكتە. تۋا سالا – استانانىڭ تۇرعىنى, تۇرمايدى ول پاتەر كۇتىپ كەزەكتە. جۇرەر, بالكىم, ولەڭدەتىپ, جىرلاتىپ, عارىشكەردەي جۇلدىزدارمەن ءتىل قاتىپ... ميلليونمەن ەسەپتەلەر زاماندا ميلليونىنشى تۇرعىن بولۋ – ءبىر باقىت. بيىك بولسىن, ول ءاردايىم اسقان شىڭ, دوس ءسۇيىنىپ, جاۋى بولسا – جاسقانسىن. قازاقتاعى – ميلليونەرلەر ءتىزىمى, استانادان – باس قالادان باستالسىن! سەرىك تۇرعىنبەك ۇلى, حالىقارالىق «الاش» ادەبي سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى استانا
