كەشە اقوردادا ەلباسى نۇرسۇلتان نازارباەۆ ريو وليمپياداسىنا باراتىن سپورتشىلارمەن كەزدەسۋ بارىسىندا ولارعا ۇلكەن سەنىم جۇكتەلەتىنىنە باسا نازار اۋداردى.
– سەندەردىڭ وليمپياداعا قاتىسۋلارىڭ بۇكىل وتانداستارىمىزعا رۋح بەرەدى جانە قۋانىش سىيلايدى. سول سەبەپتى, الداعى جەڭىستەرىڭدى ەل تاۋەلسىزدىگىنىڭ 25 جىلدىعىنا ارنالعان ۇلكەن سىي رەتىندە كۇتەمىز. سەندەردىڭ جەڭىستەرىڭە ەرەكشە سەنىم ارتىپ, وليمپيادادان سوڭ جەڭىمپازداردى ماقتانىشپەن جانە قۇرمەتپەن كۇتەتىن بولامىز, – دەدى مەملەكەت باسشىسى.
ەلباسى بۇگىنگى جەتىستىكتەر كەشەگى اعا ۇرپاقتىڭ زاڭدى جالعاسى ەكەندىگىن دە ەرەكشە قۇرمەتپەن ەسكە الا وتىرىپ, ونىڭ تاۋەلسىزدىك العاننان كەيىن دە زاڭدى تۇردە جالعاسقاندىعىنا توقتالدى.
– كەشەگى كەڭەستىك زاماننان بەرى قاراي الاتىن بولساق, ءالجان جارمۇحامەدوۆ, نەللي كيم, جاقسىلىق ۇشكەمپىروۆ سياقتى ۇلكەن اعا-اپالارىڭىز قازاقستاننىڭ مەرەيىن كوتەرىپ, جەڭىپ شىققان ەدى. تاۋەلسىزدىك جىلدارىندا دا سپورتشىلارىمىز وليمپيادادا جەڭىپ العان 59 مەدالدىڭ 17-ءسى التىن القا بولاتىن. ريو-دە-جانەيرودا دا يگى ءۇردىس جالعاسىپ, ەلىمىزدىڭ مەرەيى اسپانداي تۇسەتىندىگىنە سەنىمدىمىن. ناعىز پاتريوت قانا ەلدىڭ ابىرويى ءۇشىن تايتالاستا ءوز ءمۇمكىنشىلىگىنىڭ شەگىنەن دە شىعىپ جەڭىسكە جەتەتىن بولادى, – دەدى نۇرسۇلتان ءابىش ۇلى.
ەلباسى وليمپيادا سىندى ءىرى دودالاردا جەڭىسكە جەتۋ ءۇشىن مەملەكەت تاراپىنان بۇكىل جاعدايدىڭ جاسالىپ جاتقاندىعىن جەتكىزدى.
– سوڭعى ءۇش جىلدىڭ ىشىندە وليمپيادالىق رەزەرۆتى كەشەندى تۇردە دايىنداۋ ءۇشىن ەلىمىزدە بىرنەشە حالىقارالىق دەڭگەيدەگى سپورت نىساندارى سالىندى. ايبا بۇكىلالەمدىك بوكس اكادەمياسى, الماتىداعى دزيۋدو اكادەمياسى, تارازداعى «تاراز-ارەنا» ستاديونى وسىلاردىڭ قاتارىندا. سونداي-اق, «قاراعاندى-ارەنا» مۇز سارايى مەن ەلورداداعى ءجۇزۋ كەشەنى بار كوپفۋنكتسيونالدى مۇز سارايى ىسكە قوسىلدى. ءوسكەمەن قالاسىنداعى ولگا رىپاكوۆا اتىنداعى جەڭىل اتلەتيكا ورتالىعى مەن الماتىداعى الەكساندر ۆينوكۋروۆ اتىنداعى سپورت سارايى وليمپياداشىلاردى دايارلاپ جاتىر, – دەدى ەل پرەزيدەنتى.
مەملەكەت باسشىسى قازاقستاندىق وليمپياداشىلاردىڭ باعىندىرعان بيىگى اسقاق ەكەندىگىن ايتا كەلىپ, ريودا ساننان گورى ساپاعا كوبىرەك ءمان بەرۋ قاجەتتىلىگىنە نازار اۋداردى.
– ريو وليمپياداسىنا بارلىعى 206 ەلدەن 10 مىڭنان استام سپورتشى قاتىسادى. بارلىعى دا كىلەڭ ءدۇلدۇل, بارلىعىنىڭ دا جەڭىسكە قول جەتكىزگىسى كەلەدى. ءبىزدىڭ ەلىمىز 38 سپورت ءتۇرىنىڭ 26-سىنان 100-دەن استام جولداما الدى. بۇل كورسەتكىش جامان ەمەس, بىراق جولدامانىڭ سانى ەمەس, سپورتشىلاردىڭ ساپاسى قاجەت ەكەنىن جاقسى بىلەسىزدەر, – دەدى نۇرسۇلتان ءابىش ۇلى. نۇرسۇلتان نازارباەۆ ەلىمىزدە سپورتتى ناسيحاتتاۋدا وتاندىق «قازسپورت» تەلەارناسىنىڭ ءرولى جوعارى ەكەندىگىن دە ايرىقشا اتاپ ءوتتى.
– وسىدان تۋرا ءۇش جىل بۇرىن, 2013 جىلدىڭ شىلدەسىندە سپورتتى ناسيحاتتايتىن «قازسپورت» ارناسى قۇرىلىپ, ول وتاندىق سپورتشىلار قاتىساتىن جارىستاردى تۇراقتى تۇردە كورسەتىپ كەلەدى. بۇل سەندەردىڭ ونەگەلەرىڭ ارقىلى جاس سپورتشىلاردى ءتاربيەلەۋگە دە ءوز ۇلەسىن قوسادى. تەلەارنانىڭ جوعارى رەيتينگىسى – ونىڭ سپورتتى ناسيحاتتاۋدا تانىمال بولا باستاعاندىعىنىڭ ايعاعى. سپورتپەن شۇعىلدانۋ ارقىلى جەڭىسكە ۇمتىلىس, العا قويعان ماقساتقا جەتۋگە تالپىنىس سياقتى ماڭىزدى قاسيەتتەر قالىپتاسادى. سپورت دەگەنىمىز – مىقتى دەنساۋلىق, رۋحتىڭ كۇشتىلىگى, پاتريوتيزم. مەن جاستاردى سپورتپەن شۇعىلدانۋعا شاقىرامىن, – دەدى ەلباسى.
قازاقستان رەسپۋبليكاسىنىڭ پرەزيدەنتى ەلىمىزدە پاراليمپيادا قوزعالىسىنىڭ دامۋىنا مەملەكەتتىڭ جۇيەلى ءتۇردە قولداۋ كورسەتىپ كەلە جاتقاندىعىن, ولاردىڭ اراسىنداعى سپورتپەن اينالىسقىسى كەلەتىن ازاماتتارعا بارلىق جاعداي جاسالىپ وتىرعاندىعىن دا اتاپ كورسەتتى.
سونداي-اق, مەملەكەت باسشىسى ريو وليمپياداسى بۇل قازاقستاننىڭ قاتىسقالى وتىرعان 12-ءشى وليمپياداسى ەكەندىگىن, ەلىمىز كوك تۋدىڭ استىندا 5 رەت جازعى, 6 رەت قىسقى وليمپيادا ويىندارىنا قاتىسقانىن ەسكە سالدى. قازاقستاندىق سپورت ساڭلاقتارى 17 التىن مەدالعا يە بولعاندىعىن, ريو-دە-جانەيرودا وسى ءداستۇردىڭ جالعاسىپ, مەرەيىمىزدىڭ اسپانداي تۇسەتىندىگىنە سەنىم ءبىلدىردى.
ءوز كەزەگىندە وليمپياداشىلار اتىنان ءسوز العان باپكەرلەر مەن سپورتشىلار سپورتتىڭ دامۋىنا مەملەكەت تاراپىنان جاسالىپ جاتقان قامقورلىققا وراي نۇرسۇلتان ءابىش ۇلىنا العىستارىن ايتىپ, ريو وليمپياداسىندا بيىك بەلەستەن كورىنەتىندىكتەرىن جەتكىزدى.
مىرزاعالي ايتجانوۆ,
بوكستان قازاقستان قۇراماسىنىڭ باس باپكەرى:
– بايراقتى باسەكەدە ەلىمىزدىڭ نامىسىن قورعاۋ – بارىمىزگە زور مارتەبە ءارى ۇلكەن جاۋاپكەرشىلىك. ريوداعى جازعى وليمپيا ويىندارى ەل تاۋەلسىزدىگىنىڭ 25 جىلدىعىنا تۇسپا-تۇس كەلىپ وتىر. بۇل تاۋەلسىز ەلىمىزدىڭ قاتىسىپ وتىرعان 12-ءشى وليمپياداسى. بۇعان دەيىن 59 مەدال الىپ, سونىڭ 17-ءسى التىن بولعان ەدى. وسى جەڭىستى جولدىڭ بيىل دا جالعاسارىنا سەنەمىز.
ولگا رىپاكوۆا,
لوندون وليمپياداسىنىڭ چەمپيونى:
– ەلىمىزدە سپورتتىق نىسانداردىڭ سانى جىلدان-جىلعا كوبەيىپ كەلەدى. بۇگىنگى كۇنى 4,5 ميلليونعا جۋىق قازاقستاندىق سپورتپەن اينالىسادى. ەلىمىزدە ءوتىپ جاتقان ءتۇرلى سپورت سايىستارىنان تىكەلەي حابار جۇرگىزەتىن «قازسپورت» تەلەارناسىنا ۇلكەن راحمەت. سپورت پاتريوتتىق رۋحىمىزدى شىڭداپ, جەڭىسكە دەگەن جىگەرىمىزدى جاني تۇسەدى. ءبىزدىڭ وليمپيادالىق قۇرامانىڭ ساپىندا 10-نان استام ۇلتتىڭ وكىلى بار. وسىنداي دوستىعى بەرىك, ءبىرتۇتاس كوماندا ارقىلى ەلىمىزدىڭ ابىرويىن اسقاقتاتاتىن بولامىز. ريو-دە-جانەيرودا ءبىز بۇكىل الەمگە اسقاق رۋحىمىزدى تانىتامىز.
دانيار ەلەۋسىنوۆ,
بوكستان الەم چەمپيونى:
– ءبىزدىڭ بوكسشىلار وليمپيادادان ەشقاشان جۇلدەسىز ورالعان ەمەس. ەلىمىز جازعى وليمپيا ويىندارىندا جەڭىپ العان 52 مەدالدىڭ 17-ءسى بىلعارى قولعاپ شەبەرلەرىنىڭ ۇلەسىندە. جانە ونىڭ 6-ۋى التىن. ەل قورجىنىنا ەڭ كوپ التىن سالعان دا, ەڭ كوپ مەدال العان دا بوكسشىلار. ءبىز ماڭگىلىك ەلىمىزدىڭ كوك تۋىن ارقاشان بيىك ۇستايمىز. ول – الەمدەگى ەڭ بيىكتە جەلبىرەۋگە لايىق تۋ.
گۇزەل مانيۋروۆا,
قازاقستاننىڭ قىزدار كۇرەسى قۇراماسىنىڭ مۇشەسى:
– قازاقستان سپورتتىق دەرجاۆا. ءبىزدىڭ تۋىمىز بەن ءانۇرانىمىزدى بۇكىل الەم بىلەدى. وليمپيا ويىندارىندا ءبىزدىڭ ءانۇرانىمىز 17 مارتە شىرقالدى. ريو-دە-جانەيرودا ءوز ەلىمىزدىڭ الدىڭعى قاتارلى, كۇشتى مەملەكەت ەكەنىن تاعى دا پاش ەتەتىن بولامىز.
راۋشان قويشىباەۆا,
قازاقستاننىڭ پاراليمپيادالىق قۇراماسىنىڭ مۇشەسى:
– ەلىمىزدە مۇمكىندىگى شەكتەۋلى ادامدارعا بۇكىل جاعداي جاسالعان. مۇگەدەكتەرگە ارنالعان 12 سپورت كلۋبى جۇمىس ىستەيدى. 25 مىڭنان استام مۇمكىندىگى شەكتەۋلى ادام سپورتپەن جۇيەلى تۇردە اينالىسادى. وسىنىڭ ناتيجەسىندە پاراليمپيادا ءداستۇرلى تۇردە دامىپ كەلەدى. پاراليمپيادالىق سپورتشىلارىمىز سوڭعى ءۇش جىلدا حالىقارالىق سايىستاردا 250 مەدال الدى. وسى جولدى جالعاستىرىپ برازيليادا ەل ابىرويىن لايىقتى قورعايمىز دەپ ۋادە بەرەمىز.
كەزدەسۋ سوڭىندا قازاقستان پرەزيدەنتى وليمپيادالىق قۇرامانىڭ تۋ ۇستاۋشىسى رۋسلان جاپاروۆقا مەملەكەتتىك تۋدى تاپسىردى. وسىلايشا, تاەكۆوندودان حالىقارالىق تۋرنيرلەردىڭ جەڭىمپازى, 20 جاستاعى رۋسلان ريودا كوك تۋدى جەلبىرەتىپ الىپ شىعاتىن بولادى. قازاقتان شىققان تۇڭعىش وليمپيادا چەمپيونى ءالجان جارمۇحامەدوۆتىڭ جەڭىستى جولىن رۋسلان جاپاروۆ باستاعان وليمپيادالىق ۇمىتتەر شوعىرى جالعاستىرادى.
عابيت ىسكەندەر ۇلى,
«ەگەمەن قازاقستان»
