كەشە مەملەكەت باسشىسى نۇرسۇلتان نازارباەۆ مەملەكەتتىك تۋدى كوتەرۋدىڭ سالتاناتتى راسىمىنە قاتىستى. بۇل استانالىقتار ءۇشىن ايرىقشا كۇن. سەبەبى, ءدال وسى 4 شىلدەدە كوك تۋىمىزدى كوككە كوتەرە وتىرىپ, قالا كۇنىنىڭ شىمىلدىعى تۇرىلەدى
جىلداعى ءداستۇر بويىنشا بيىل دا استاناداعى «اتامەكەن» ەتنومەموريالدى كەشەنىنىڭ الاڭىندا اسقاق كوڭىل-كۇي ورنادى. اينالا كوك تۋلارمەن بەزەندىرىلىپ, ءان شىرقالدى. ءانۇران ورىندالىپ, ەلىمىزدىڭ ەڭ ۇلكەن, باس بايراعى بيىكتە جەلبىرەدى.
ەلباسى ىنتىماعى ۇيىسقان حالقىمىزدى مەرەيلى مەرەكەمەن قۇتتىقتادى. پرەزيدەنت مەملەكەتتىك تۋ كوتەرۋ ءراسىمى ءداستۇر بويىنشا استانا كۇنىنە ارنالعان ءىس-شارالاردىڭ باستاۋى بولىپ سانالاتىنىنا نازار اۋداردى. مەملەكەتتىك تۋ ءاربىر قازاقستاندىق ءۇشىن قاسيەتتى قۇندىلىق بولىپ سانالاتىن ۇلتتىق بىرلىك نىشانى ەكەنىن اتاپ ءوتتى.
«بۇل – ەلىمىزدىڭ اسقاق ءرامىزى. بيىل ەل تاۋەلسىزدىگىنىڭ 25 جىلدىعى. ءبىز ەگەمەن قازاقستاندى وسى كوك تۋ استىندا بىرگە قۇردىق. شيرەك عاسىر ىشىندە قۋاتتى مەملەكەتتىڭ ىرگەسى بەرىك عيماراتىن بىرلەسىپ سالدىق. جاقىندا عانا رەسپۋبليكامىز بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. الەمدىك قوعامداستىق پلانەتاداعى بەيبىتشىلىك پەن قاۋىپسىزدىكتى قامتاماسىز ەتۋ ىسىنە اتسالىسۋ سىندى بيىك ميسسيانى قازاقستانعا سەنىپ تاپسىردى. بۇل – ەلىمىزدىڭ بيىك بەدەلى مەن تابىستى دامۋىنىڭ مويىندالۋى. بۇۇ قاۋىپسىزدىك كەڭەسىندەگى جۇمىس ءبىزدىڭ تۋىمىزدى بۇرىنعىدان دا تانىمال ەتە تۇسەدى.
بيىل ءبىز استانانىڭ 18 جىلدىعىن – كامەلەتتىك جاسقا تولۋىن اتاپ وتەمىز. بۇل – بيىكتەر باعىندىرىلعان جانە سول بيىكتەن جاڭا پەرسپەكتيۆالار كورىنىپ تۇرعان كەز. تاۋەلسىزدىك تۋدىرعان استانا قۇلپىرعان ۇستىنە قۇلپىرىپ, قارىشتاپ وسۋدە. قالا ەلدى بىرىكتىرىپ, جاڭا تابىستارعا جەتەلەپ, كوش باسىندا كەلەدى», دەدى مەملەكەت باسشىسى.
نۇرسۇلتان نازارباەۆ بارشا قازاقستان حالقىنا بەيبىتشىلىك پەن تاتۋلىق, تىنىشتىق پەن باق-بەرەكە تىلەدى.
ءراسىم اياسىندا مەملەكەت باسشىسى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى ەلىمىزدىڭ جوعارى اسكەري وقۋ ورىندارىنىڭ تۇلەكتەرىنە وفيتسەرلىك شەن تاپسىردى. پرەزيدەنتتىڭ قولىنان 12 تۇلەك – قورعانىس مينيسترلىگى قۇرلىق اسكەرلەرى اسكەري ينستيتۋتىنىڭ, ىشكى ىستەر مينيسترلىگى ىشكى اسكەرلەر اسكەري ينستيتۋتىنىڭ جانە ۇلتتىق قاۋىپسىزدىك كوميتەتى اسكەري ينستيتۋتىنىڭ ۇزدىك ءبىتىرۋشىلەرى شەن الدى.
ەلباسى رەسپۋبليكانىڭ جوعارى اسكەري وقۋ ورىندارىنىڭ بارلىق تۇلەكتەرىن قۇتتىقتاپ, قازاقستاندىق پاتريوتيزم ءتۇرلى سالادا, سونىڭ ىشىندە ەڭ الدىمەن وتانعا قىزمەت ەتۋدە كورىنىس تاباتىنىن ايتتى.
«بۇگىن ءبىز جوعارى اسكەري وقۋ ورىندارىنىڭ ۇزدىك تۇلەكتەرىنە وفيتسەرلىك شەندەر تاپسىرامىز. وسى كۇندەرى مىڭداعان قازاقستاندىق جاستار وقۋلارىن اياقتاپ, ۇلكەن ومىرگە اياق باسادى. سىزدەر ءوز جولدارىڭىزدى ەلدىڭ باس بايراعىنىڭ الدىندا, سالتاناتتى جاعدايدا باستاپ وتىرسىزدار. بۇل – كەزدەيسوقتىق ەمەس. ويتكەنى, سىزدەر قوعامدا قۇرمەتكە يە ايرىقشا ماماندىقتى تاڭدادىڭىزدار. سىزدەر بىرنەشە جىلدى جاقسى ءبىلىم الۋعا, جاڭا ماشىقتاردى يگەرۋگە, دوستىق پەن ءوزارا كومەكتىڭ قۇندىلىعىن ءتۇسىنۋگە ارنادىڭىزدار. ەندى وسىنىڭ ءبارىن تاجىريبەدە قولدانۋ كەرەك», دەدى نۇرسۇلتان نازارباەۆ.
ەلىمىزدىڭ جۇرەگى, تاۋەلسىزدىگىمىزدىڭ تىرەگى – استانا كۇنى وسىلايشا كەشەگى كۇننەن باستاپ رەسمي اشىق دەپ جاريالاندى. ال بۇل كۇننىڭ كەرەمەتىن كەشەگى كۇننىڭ تاعى ءبىر ايرىقشا جاڭالىعى ايشىقتاي ءتۇستى. ول – وسى ايتۋلى كۇنى استانا قالاسىنىڭ ميلليونشى تۇرعىنىنىڭ دۇنيە ەسىگىن اشقانى. ءدال كەشەگى كۇنى ەلوردانىڭ ميلليونىنشى تۇرعىنىنىڭ ومىرگە كەلگەنىن ەلباسى دا ەرەكشە اتاپ ءوتتى.
«بۇگىن ەرتەڭگىسىن مۇحامەديارلار وتباسىندا استانانىڭ ميلليونىنشى تۇرعىنى ومىرگە كەلگەنىن زور قۋانىشپەن حابارلايمىن. ءسابيدىڭ اناسى – بالاباقشا تاربيەشىسى, اكەسى – ەلەكتر مونتەرى. ەندى ءبىزدىڭ ەلوردا ميلليون تۇرعىنى بار قالالار قاتارىنا ەندى», دەدى ەلباسى.
كەمەل كەلەشەككە جول اشقان قاستەرلى بويتۇمارىمىز – استانانىڭ ايرىقشا كۇنى قۇتتى بولسىن!
دينارا بىتىكوۆا,
«ەگەمەن قازاقستان»
