تورتتىكتىڭ كوشىن پورتۋگاليا باستادى

فۋتبولدان فرانتسيادا ءوتىپ جاتقان ەۋروپا چەمپيوناتىنىڭ بۇرناعى كۇنى وينالعان شيرەك فينالدىق كەزدەسۋىندە پولشادان پەنالتيلەر سەريا­سىنان باسىم تۇسكەن پورتۋگاليا جارتىلاي فينالعا شىقتى. مارسەلدە وينالعان ماتچتىڭ نەگىزگى ۋاقىتى 1:1 ەسەبىمەن تەڭ اياقتالدى, وۆەر-تايمدا وسى ەسەپ وزگەرگەن جوق, سوندىقتان جەڭىمپازدى ويىننان كەيىنگى سوققىلار ارقىلى انىقتاۋعا تۋرا كەلدى. وسىلايشا, تۋرنيردە كۇنى بۇگىنگە دەيىن وتكىزگەن بەس ۇشىراسۋىنىڭ بىرەۋىندە عانا جەڭىس تويىن تويلاعان, وعان دا نەگىزگى ۋاقىتتان كەيىنگى قوسىمشا تايمداردا قولى جەتكەن پورتۋگاليا العاشقى ۇزدىك تورتتىكتىڭ قۇرامىنا ءبىرىنشى بولىپ كىردى. بىراق, ادالى كەرەك, بۇل كۇنى فەرناندۋ سانتۋشتىڭ شاكىرتتەرى قارسىلاستارىنا قاراعاندا, كەلەسى كەزەڭگە ءوتۋ جولىندا ەداۋىر ارتىق ەڭبەك ءسىڭىردى. ويىندا ميۋنحەننىڭ «باۆاريا» كلۋبىنىڭ ءمۇ­شەلەرى – پولياك روبەرت لەۆاندوۆسكي مەن پورتۋگال رەناتۋ سانشەش ءوز ەلدەرىنىڭ قۇرامالارى ءۇشىن ءبىر-ءبىر گولدان سالىپ, ەكى جاقتى تارتىستىڭ كۇشەيە تۇسۋىنە ايتارلىقتاي سەرپىن بەردى. ماتچ «ەۋروپالىق برازيلدەردىڭ» قا­ۋىرت شابۋىلىمەن ءورىس الدى. ولار پولياكتارعا تەلىنگەن دوپقا العاش يەلىك ەتكەننەن قارسى قاقپانى تاباندى تۇردە قاراۋىلعا الۋعا كىرىستى. الايدا, بۇل ىسكە قاتتى بەرىلىپ كەتكەندەرى سونداي, كەنەت قاۋىپتى قارسى شابۋىلدىڭ قالاي قۇيعىتىپ وتە شىققانىن اڭعارماي قالدى. ويىننىڭ وسى بولىگىندە بۇعان دەيىنگى بار ارەكەتى ءۇشىن سىنعا ۇشى­راپ كەلگەن لەۆاندوۆسكيگە جارقىراپ كورىنۋدىڭ ورايى كەلە كەتتى. بۇعان الىستان العان دوبىن سول قاپتالمەن العا قاراي الا قاشقان كاميل گروسيتسكي كەرەمەت كومەك كورسەتتى. ونىڭ قاقپا الا­ڭىنا قاراي جەر سىزدىرا جونەلتكەن سناريادىن ءبىر سوققىمەن بۇرىپ جىبەرگەن شابۋىلشى قاقپانىڭ تورىن بۇلك ەتكىزدى. كەزدەسۋدىڭ 2-مينۋتىندا سالىنعان بۇل گولدىڭ قارىمىن قايتارۋ ءۇشىن كريش­تيانۋ رونالدۋ باستاعان پورتۋگالدار جاساعى تاعى جارتى ساعاتتان استام ۋاقىت جوڭكىلە شاپتى. ال تارازى باسىن تەڭەستىرۋگە تەڭدىك بەرەتىن مۇمكىندىك كوپ بولدى. سونىڭ بىرىندە نانيمەن قاقپاقىل ويناپ, العا شىققان سانشەش كوپ ويلانىپ جاتپاستان, قاقپاعا قاراي قايقايتا سىلتەدى. گولكيپەر لۋكاش فابيانسكيدىڭ وڭ جاعىنان زاۋلاعان دوپ سول زاماتىندا تورعا بارىپ قادالا قالدى. بۇدان ءارى ەكى جاقتىڭ ءبىر-بىرلەرى الاڭىنا دەمبىل-دەمبىل تۇرا جۇگىرۋلەرىمەن ەستە قالدى. وسى تۇستا پورتۋگالدار ەپتەپ توقمەيىلسىگەن سىڭاي تانىتتى. پولياكتار قولدان سۋسىپ كەتكەن باسىمدىقتى قايتارماققا كۇش سالدى. دەگەنمەن, تۇتاستاي العاندا, ءبىرىنشى تايم پورتۋگاليا تەرمە جاماعاتىنىڭ ايتارلىقتاي باسىمدىلىعىمەن ءوتتى. قارسىلاستار ەكىنشى تايمدى ساۋىس­قاننان ساق باستادى. كونە دۇنيەدەگى «برازيل باعلاندارى» جويقىن جورىق ءتاسىلىن قاپتالدان ايىپ الاڭىنا دوپ تاستاۋعا الماستىرىپ, بۇرىنعى كرەاتيۆتى كەسكىندەرىنەن باس تارتىپ شىعا كەلسە, «قىراندار» العى شەپكە جەدەل سنارياد جەتكىزىپ تۇرۋدىڭ ورنىنا الاڭ ورتاسىمەن جىلانباۋىرلاپ جىلجىپ وتىرۋعا بەت قويدى. مۇندايدا ءار ءمۇلت كەتكەن ءسات قاتەلىگىنىڭ سالماعى كۇرت ارتا تۇسەدى. بىراق بۇكىل تايم بويى ءبىر-ءبىرىن اڭدىسقان مۇنداي تاكتيكانى ۇستاپ تۇرۋ مۇمكىن ەمەس ەدى. سوندىقتان 64-مينۋتتا پورتۋگالدار قورعاۋشىسى سەدريك 25 مەتر جەردەن قاقپاعا قاراي دوپ جولداپ, الاڭ ءۇستىن ءبىر دۇرلىكتىرىپ ءوتتى. ارادا بىرنەشە مينۋت وتكەندە, لەۆاندوۆسكي الاڭ جيەگىنەن قاقپا الاڭىنا قاراي دوپ جەتكىزىپ, ونى كاميل گليك دەمدە گولعا اينالدىرىپ جىبەرە جازدادى. ال كەيدە 5-6 ويىنشىنىڭ قورشاۋىنا ءتۇسىپ قالىپ جاتاتىن رونالدۋعا قاقپاعا تۋرا باعىتتاپ دوپ ۇرۋدىڭ قولايلى ساتتەرى كوپ تۋا قويعان جوق. سونداي ءبىر سيرەك مەزەتتەردىڭ بىرىندە, 85-مينۋتتا كريشتيانۋ ءدال الدىنان كولبەڭدەپ وتكەن دوپقا اياعىن ىلىكتىرە الماي قالدى. جالپى, تايم تۇگەسىلەر شامادا اتالمىش فورۆارد ءوز كومانداسىن العا شىعارۋدىڭ ەكى مۇمكىندىگىن پايدالانا المادى. وسىلاردىڭ ءبارىن ساراپتاي كەلگەندە, ونىڭ بۇل كەشتەگى ويىنىن دا ادەپكى ماتچتارداعىداي ءساتسىز دەپ باعالاۋعا بولادى. وزىنە وتە قيىن جاعدايلاردا سيرەك جەتكەن دوپتاردى ءتيىمدى پايدالانا الماعانى ءوز الدىنا, شابۋىلشى پاس بەرۋدە دە كوپ قاتەلىكتەرگە جول بەردى. كەزدەسۋدىڭ وۆەرتايمدارى الاڭ ۇستىندە ويىن سۇرلەۋىنە كوپ وزگەرىس ەنگىزگەن جوق. ولاردىڭ ەندى تاۋەكەلدىڭ جەلقايىعىنا مىنە سالۋعا باتىلدارى جەتپەي تۇرعان­دارى انىق اڭعارىلدى. پورتۋگالدار بۇ­رىنعىسىنشا جۇيەلى تۇردە شابۋىل جاساۋدى جالعاستىرا بەرسە, پولياكتار ولاردى باستاپقى كەزىندەگىدەي قارسى شابۋىلداردا قاپى قالدىرۋدى مۇرات تۇتتى. بىراق بۇلاردىڭ الدىڭعىلارىنىڭ ارەكەتتەرى توسىن قيمىلداردان ادا, كىل بىروڭكەي تۋرا شاپقىلاۋدان قۇرالسا, ەكىنشىلەرىنىڭ ەكپىندەرىنەن وتكىرلىك تابىلماي جاتتى. كوماندالاردىڭ وسى سۇرەڭسىزدەۋ ويىندارى جانىنا جاقپاي قالسا كەرەك, جاسىل جەيدە كيگەن ءبىر جانكۇيەر الاڭعا اتىپ شىعىپ, ونىڭ ورتاسىنا دەيىن باردى... سوڭىنان 11 مەترلىك ايىپ دوپتارىن سوعۋدىڭ كەزەگى كەلدى. وندا ەكى جاق مەرگەندەرى العاشقى ءۇش كەزەكتى مۇلتىكسىز ۇردى. ال تورتىنشىگە كەلگەندە, پولياكتار جاعىنان بۇعان دەيىنگى ماتچتاردا بەلسەندىلىك تانىتىپ كەلگەن ياكۋب بلاششيكوۆسكي قادامىنان جاڭىلىپ, ۇرعان دوبىن قاقپاشىنىڭ ولجاسىنا اينالدىرىپ الدى. وسىنىڭ سالدارىنان العا شىعىپ كەتكەن پورتۋگالدار ەڭ سوڭىنان ريكاردۋ كۋارەجمانىڭ ءدال سوققىسىمەن ەسەپتى 5:3-كە جەتكىزىپ, ويىننىڭ سوڭعى نۇكتەسىن قويىپ شىقتى. پورتۋگاليا 6 شىلدە كۇنى وتەتىن ءبىرىنشى جارتىلاي فينالدىق ويىن­دا كەشە تۇندە وينالعان ۋەلس – بەلگيا قۇ­رامالارىنىڭ جەڭىمپازىمەن كەزدەسەدى. سەرىك ءپىرنازار, «ەگەمەن قازاقستان»