ەڭبەك ەرى سىيلىق تاپسىردى

الماتىدا قازاقستاننىڭ ەڭبەك ەرى, حالىق جازۋشىسى ولجاس سۇلەيمەنوۆ ءبىر توپ جۋرناليستەرگە وتكەن كاسىبي مەرەكەسى قۇرمەتىنە وراي اقشالاي سىيلىقتار مەن ارنايى ديپلومدار تابىس ەتتى. قالامگەرلەرگە ارنالعان بۇل سىيلىق – قازاق­ستاندىق بەلگىلى جۋرناليست-جازۋشى گەننادي تولماچەۆتىڭ اتىمەن اتالادى ءارى ول 2007 جىلى «لەنينسكايا سمەنا» (قازىر – «ەكسپرەسس ك») گازە­تىنىڭ قۇرىلتايشىلىعىمەن تاعايىندالعان. «عىلىم ورداسىنىڭ» ءماجىلىس زالىندا ماراپاتقا يە بولعاندار مەن سالتاناتقا قاتىسۋشىلارعا ارناپ ءسوز سويلەگەن ايتۋلى اقىن, ديپلومات ولجاس ومار ۇلى سۇلەيمەنوۆ ەڭ الدىمەن پۋبليتسيست-جازۋشى  گەننادي تولماچەۆ تۋرالى جىلى لەبىز ءبىلدىردى.  ونىڭ ءوز زامانىندا الماتى وبلىستىق «وگني الاتاۋ» گازەتىن الماتىداعى ەڭ وقىرمانى كوپ باسىلىم جاساعان رەداكتورلىق تاماشا قابىلەتىن سۇيسىنە ەسكە ءتۇسىردى. ايتپاقشى, ولجاس سۇلەيمەنوۆتىڭ بۇرىنعى كسرو-نى ءدۇر سىلكىندىرگەن «از ي يا» كىتابىنىڭ رەداكتورى دا سول گەننادي تولماچەۆ ەكەندىگىنەن بۇگىنگى ۇرپاق حابارسىز بولۋى دا مۇمكىن. جۋرناليستەرگە تاپسىرىلعان سىيلىقتىڭ «قازاقستان رەداكتورلار جاساعىنىڭ اڭىزدارى» («لەگەندى رەداكتورسكوگو كورپۋسا كازاحستانا») نوميناتسياسى بويىنشا اقشالاي سىيلىق پەن ارنايى ديپلومدى بۇرىنعى «سوتسياليستىك قازاقستان» (قازىر «ەگەمەن قازاقستان») گازەتى رەداك­تورىنىڭ ءبىرىنشى ورىنباسارى, «حالىق كە­ڭەسى» گازەتى مەن «اقيقات» جۋرنالىنىڭ باس رەداك­­تورى قىزمەتتەرىن اتقارعان سارباس اقتاەۆ, «لەنينسكايا سمەنا», «كازاحستانسكايا پراۆدا» گازەت­تەرىنىڭ بۇرىنعى رەداكتورى فەدور يگناتەۆ يەلەندى. قازىلار القاسىنىڭ تاڭداۋىمەن بۇدان تىس ەكى جۋرناليسكە وقىرماندار اراسىندا ەلەۋلى دە جاعىمدى پىكىر تۋعىزعان – وتاندىق باق-تاعى ەڭ ۇزدىك جاريالانىمدارى ءۇشىن قۇرمەتتى اتاعى بەرىلدى. ولار – «الماتى اقشامى» قالالىق گازەتىنىڭ ءبولىم مەڭگەرۋشىسى ەرمەكباي زاڭگىروۆ پەن شىعىس قازاقستان وبلىستىق قحا-نىڭ «اسسامبلەيا جارشىسى» گازەتىنىڭ رەداكتورى اندرەي كراتەنكو. سىيلىق يەلەرىنىڭ ارقايسىسىنا تەڭگەنىڭ بۇگىنگى باعامىنا ساي 2500 اقش دوللارى مەن ارنايى ديپلوم تاپسىرىلدى. تالعات ءسۇيىنباي, «ەگەمەن قازاقستان» الماتى