ەتنو-فولكلورلىق دجاز فەستيۆالى

استانادا تۇڭعىش رەت وتكىزىلدى كەشە كەشكىسىن استانادا قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا ازياداعى ءوزارا ءىس-قيمىل جانە سەنىم شارالارى جونىندەگى كەڭەس (اوسشك) اياسىندا ەل تاۋەلسىزدىگىنىڭ 25 جىلدىعىنا ارنالعان « ۇلى دالا اۋەنى» حالىقارالىق ەتنو-فولكلور-دجاز فەستيۆالى ۇيىمداستىرىلدى. اتالعان كونتسەرتتى استانا كۇ­نىنە ارنالعان ەرەكشە سىي رەتىندە قابىلداۋىمىزعا ابدەن بولادى. ءويت­كەنى, اۋقىمى كەڭ بۇل فەستيۆالدە ازەربايجان, ارمەنيا, تۇركيا, قىرعىزستان, رەسەي جانە وزبەكستاننان كەلگەن مۋزىكالىق ۇجىمدارمەن قوسا, قازاقستاندىق ەلوردا قوناقتارى دا ءوز ونەرلەرىن ورتاعا سالدى. وسىلايشا اسەم ءان مەن ءتاتتى كۇي ەلوردا اسپانىندا قالىقتادى. باعدارلاما شەڭبەرىندە شەبەرلىك-ساباقتارىن وتكىزۋ, فەستيۆالگە قاتىسۋشى ۇزدىك ونەرپازدار مەن قوناقتاردىڭ گالا-كونتسەرتى, جەڭىمپازداردى ماراپاتتاۋ ءراسىمى سياقتى بىرقاتار ەرەجەلەر قامتىلعان. توقتالا كەتەيىك, قازاقستان حالقى اسسامبلەياسى مۇنداي ەتنو-فولكلور-دجاز فەستيۆالىن تۇڭعىش رەت وتكىزىپ وتىر. ال ەتنوستيل – بۇگىندە حالىقتىق باعىت رەتىندە تانىمالدىعى ارتىپ كەلە جاتقان ستيل. بۇل – ءومىردىڭ بارلىق سالاسىنا, سونىڭ ىشىندە مۋزىكا باعىتىنا دا قاتىستى جايت. زاماناۋي مۋزىكا ەتنو-فولكلوردىڭ ەلەمەنتتەرىمەن تاماشا ۇيلەسىپ, قازىرگى زامانعى قازاقستاندىق مۋزىكا مادەنيەتىنىڭ جەكە باعىتى رەتىندەگى ەرەكشە ەتنوستىق ءستيلدى قۇرايدى. بۇگىندە قازاقستاندا مۋزىكانىڭ كلاسسيكالىق باعىتتارى, سونىڭ ىشىندە دجاز باعىتى قارقىندى تۇردە دامۋدا. دجاز – ەركىن مۋزىكا, يمپروۆيزاتسيا جانە ادام ويىن ءبىلدىرۋدىڭ ۇيلەسىمدى سينتەزى بولىپ تابىلاتىن قازىرگى زامانعى مۋزىكالىق باعىت. وسى ەرەكشەلىگىمەن دە ول ازيا حالىقتارىنا, سونىڭ ىشىندە قازاقستان حالقىنا تۇسىنىكتى ءارى جاندارىنا جاقىن. فەستيۆالدىڭ نەگىزىن ەتنو, فولك ۆارياتسيالارىندا ورىندالعان دجاز كلاسسيكاسى قۇرادى. الماتى, استانا, شىمكەنت, قاراعاندى سياقتى ءىرى قالالاردا دجاز مۋزىكاسىنىڭ ءارتۇرلى كونكۋرستارى مەن فەستيۆالدەرى وتكىزىلەدى. قحا اياسىندا ءبىرىنشى اشىق ەتنو-فولكلور-دجاز فەستيۆالىنىڭ وتكىزىلۋى ەتنومادەني بىرلەستىكتەردىڭ قاتىسۋىمەن مۋزىكالىق ورتانىڭ دامۋىنداعى جاڭا بەلەس بولىپ تابىلادى. راۋشان سۇلەيمەنوۆا