بەلدەسۋلەر باستالادى

ەرتەڭ اس­تانادا قازاق كۇرەسىنەن كەزەكتى رەت ەلباسى نۇرسۇلتان نازارباەۆتىڭ جۇلدەسىنە ارنالعان «قازاق­ستان بارىسى» رەسپۋبليكالىق ءتۋرنيرىنىڭ فينالدىق بەلدەسۋلەرى بولادى. وعان قالالىق, اۋداندىق جانە وبلىس­تىق تۋرنيرلەردە كۇش سىناسىپ, ىرىكتەۋ جارىستارىنان سۇرىنبەي وتكەن بالۋاندار قاتىسادى. وسىلايشا, 3 كەزەڭ بويىنشا بيىلعى «قازاقستان بارىسى» تۋرنيرىنە 32 بالۋان جانە «اسكەر بارىسى» ءتۋرنيرىنىڭ جەڭىمپازى – تالعات امىرەنوۆ پەن 2015 جىلعى «قازاقستان بارىسى» بەيبىت ىستىباەۆ جولداما الدى. بيىلعى ءتۋرنيردىڭ ءبىر ەرەكشەلىگى, بالۋاندار كىلەمگە جاڭا كۇرتەشەمەن شىعا­دى. وزگەرتىلگەن كۇرتەشە الدىڭعى قولدانىس­تاعىعا قاراعاندا, تىعىز ءارى ساپالى ماتادان تىگىلگەن. ەندى سپورتشىلار كۇرەسىپ جاتقاندا بەلبەۋىن شەشسە, ەسكەرتۋ جاسالادى. كىلەمدى قولىمەن تىرەپ تۇرسا, قارسىلاسىنا بۇك ۇپايى بەرىلەدى. سونىمەن بىرگە, كۇرتەشەنىڭ جەڭ ىشىنەن ۇستاۋعا رۇقسات بەرىلدى. قازاق كۇرەسى فەدەراتسياسىنىڭ ۆيتسە-پرەزيدەنتى سادىق مۇستافاەۆتىڭ ايتۋىنشا, بالۋاندار كۇرەسكەندە, ادەيى بەلبەۋىن شەشۋى مۇمكىن. ول ۋاقىتتى سوزدىرىپ, دەمالۋ ءۇشىن سولاي ىستەيدى. «بيىلعى تۋرنيردە سپورتشىلار جاڭا ەرەجە بويىنشا كۇرەسەدى. بۇل بالۋانداردىڭ كۇرەسۋىنە ىڭعايلى بولۋى ءۇشىن جاسالدى», دەدى ول. تۋرنيرگە قاتىستى تاعى ءبىر جاڭالىق, بەلدەسۋلەرگە اناليزدىك سىنامالارىنان تىيىم سالىنعان مەلدوني سۋب­ستانتسياسىنىڭ تابىلۋىنا بايلانىستى قازاق كۇرەسىنەن ۇيىمداستىرىلاتىن بارلىق جارىستاردان ۋاقىتشا شەتتەتىلگەن بالۋاندار قاتىسادى. جاقىندا بۇكىل­الەمدىك دوپينگكە قارسى اگەنتتىگىنىڭ (ۆادا) ۇسىنىسى نەگىزىندە دوپينگكە قارسى ۇلتتىق ورتالىعى تارتىپتىك كوميس­سياسىنىڭ شەشىمىنە سايكەس, مەرەكە تۇراشەۆ (اقمولا وبلىسى), الەكساندر كاساچەۆ (الماتى وبلىسى), سامير مامەدوۆ (پاۆلودار وبلىسى) جانە ايبەك نۇعىماروۆ (شىعىس قازاقستان وبلىسى) اناليزدەرىندەگى مەلدونيدىڭ كونتسەنتراتسياسى 1 مكگ/مل-دەن از بولعاندىقتان, ولارعا تۋرنيرگە قاتىسۋعا رۇقسات بەرىلدى. قازاق كۇرەسى فەدەراتسياسىنىڭ پرە­زيدەنتى, «قازاقستان بارىسى» قازاق كۇرەسىن دامىتۋ قورى قامقورشىلار كەڭەسىنىڭ توراعاسى ارمان شوراەۆتىڭ ايتۋىنشا, بيىل جارىس بىلتىرعىعا قاراعاندا تارتىستى دا قىزىقتى وتەدى. «اۆتوكولىكتەردى AllurAuto كومپانياسى قامتاماسىز ەتتى. AllurGroup ديرەكتورلار كەڭەسىنىڭ مۇشەسى دين كيم ەلىمىزدە جاسالاتىن JAC S3 ماركالى ەكى اۆتوكولىك سىيلايدى. ءتۋرنيردىڭ جالپى اقشالاي جۇلدە قورى – 41 400 000 تەڭگە. ءبىرىنشى ورىنعا – 25 000 000 تەڭگە, ەكىنشى ورىنعا – 5 500 000 تەڭگە, ءۇشىنشى ورىنعا 1 800 000 تەڭگە بەرىلەدى. سونىمەن قوسا, بيىل تۋرنير تاريحىندا تۇڭعىش رەت تۋرنير جەڭىمپازى اقشالاي سىيلىقتان باسقا, ەلوردادان پاتەر الادى», دەدى ول. داستان كەنجالين, «ەگەمەن قازاقستان»