توراعالىققا وراي وتكەن تۇساۋكەسەر

شانحاي ىنتىماقتاستىق ۇيىمىنىڭ حاتشىلىعىندا قازاقستان رەسپۋبليكاسىنىڭ وسى ۇيىمعا توراعالىق ەتۋىنە بايلانىستى تۇساۋكەسەر بولدى. وعان قازاقستان مەن قىتايدىڭ مينيسترلىكتەرى مەن ۆەدومستۆولارىنىڭ وكىلدەرى, شانحاي ىنتىماقتاستىق ۇيىمىنا مۇشە مەملەكەتتەردىڭ بەيجىڭدەگى ەلشىلەرى مەن ديپلومانتتارى, قحر عىلىمي-زەرتتەۋ ورتالىقتارىنىڭ باسشىلارى قاتىستى. كوپشىلىككە ءمالىم, قازاقتان رەس­پۋبليكاسى 2016-2017 جىلدارى شان­حاي ىنتىماقتاستىق ۇيىمىنا توراعا­لىق ەتەدى. وسى ۇيىمنىڭ باس حاتشىسى ر.اليموۆتىڭ ايتۋىنا قاراعاندا, پرەزيدەنت نۇرسۇلتان نازار­باەۆتىڭ باسشى­لىعىمەن قازاقستان تاۋەلسىزدىك العان جىلدار ىشىندە سىرتقى ساياساتتا ستراتەگيالىق ماڭىزدى قادامدار جاساي ءبىلدى. – تاشكەنت سامميتىنەن كەيىن شانحاي ىنتىماقتاستىق ۇيىمىنا توراعا­لىق ەتۋ قازاقستان رەسپۋبليكاسىنىڭ يەلىگىنە ءوتتى. شىنىن ايتقاندا, قازاقستان وسى ۇيىم العاشقى قۇرىل­عان كۇننەن باستاپ ونىڭ دامۋىنا ايتارلىقتاي ۇلەس قوسىپ كەلەدى, – دەدى ر.اليموۆ. – اتالعان ۇيىمعا توراعالىق ەتۋ قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە سايلانۋىمەن تۇسپا-تۇس كەلدى. مۇنىڭ ءوزى قازاقستان­­نىڭ ايماقتىق جانە الەمدىك دەڭگەيدە بەلسەندىلىگى مەن ابىروي-بەدەلىنىڭ جوعارى ەكەندىگىن تاعى ءبىر مارتە ايعاقتاپ بەردى. تۇساۋكەسەر بارىسىندا شانحاي ىنتىماقتاستىق ۇيىمىنىڭ الداعى باسىم باعىتتارى نەگىزگى اڭگىمە وزەگى بولدى. بۇل جايىندا قازاقستان رەسپۋبليكاسىنىڭ قىتايداعى توتەنشە جانە وكىلەتتى ەلشىسى ش.نۇرىشەۆ وي-پىكىرىن ورتاعا سالدى. – قازاقستان پرەزيدەنتى نۇرسۇل­تان نازارباەۆ جاقىندا عانا تاشكەنتتە وتكەن سامميتتە وسى ۇيىمعا مۇشە ەلدەر ايماقتىق قاۋىپسىزدىكتى نىعايتۋ مەن ەكونوميكالىق ىنتىماق­تاستىقتى دامىتۋدى, كولىك-ترانزيتتىك الەۋەتتى كوتەرۋ مەن مادەني-گۋمانيتارلىق بايلانىستاردى تەرەڭدەتۋدى باسىم باعىتتار رەتىندە ۇستانۋدى كوتەرگەن ەدى. سونىمەن بىرگە, ۇيىمعا مۇشە مەم­لەكەتتەردىڭ حالىقارالىق تەررو­ريزمگە قارسى بىرلەسە كۇرەس جۇرگىزۋى وتە ماڭىزدى بولىپ وتىر. ەلباسى ايتقان وسىنداي وزەكتى ماسەلەلەر شانحاي ىنتىماقتاستىق ۇيىمىنىڭ باستى باسىمدىقتارى بولادى, – دەدى قازاقستان ەلشىسى. قازاقستان پرەزيدەنتى ن.نازارباەۆ­تىڭ ۇسىنىسى بويىنشا شانحاي ىنتىماقتاستىق ۇيىمىنىڭ استانا ءسامميتى «ەكسپو-2017» حالىقارالىق كورمەسىنىڭ اشىلۋى قارساڭىندا 2017 جىلى 8-9 ماۋسىم كۇندەرى وتكىزىلمەك. قازىر وسى شاراعا ازىرلىك جۇمىستارى باستالىپ كەتتى. سادىق اكىجانوۆ, «ەگەمەن قازاقستان» – بەيجىڭنەن قىتاي حالىق رەسپۋبليكاسى