«التىن سۇڭقار» العاندار

ون جىلدان بەرى قاراعاندىدا بۇقارالىق اقپارات قۇرالدارى قىزمەتكەرلەرىن وبلىس اكىمىنىڭ «التىن سۇڭقار» سىيلىعىمەن ماراپاتتاۋ ءراسىمى ءداستۇرلى تۇردە ءوتىپ كەلەدى. جالپى, بۇل يگى شارا كەزىندە قاراعاندى وبلىسىنىڭ اكىمى بولعان, بۇگىندە پارلامەنت ءماجىلىسىنىڭ سپيكەرى نۇرلان نىعماتۋليننىڭ باستاماسىمەن تۋىنداعان بولاتىن. ءوڭىردىڭ ۇزدىك جۋرناليستەرىنە ارنالعان سالتانات جىلداعىداي قاراعاندىداعى كەنشىلەردىڭ مادەنيەت سارايىندا ءوتتى. بۇل كۇنى بايقاۋدىڭ قاتاڭ سۇزگىسىنەن وتكەن جەرگىلىكتى جۋرناليس­تەر مەن رەپورتەرلەر, وپەراتورلار مەن فوتوتىلشىلەر جانە رە­داكتسيالاردىڭ تەحنيكالىق قىزمەتكەرلەرى وبلىستاعى تانى­مال تۇلعالاردىڭ قولىنان «ال­تىن سۇڭقاردىڭ» مۇسىنشەسى مەن 250 مىڭ تەڭگە مولشەرىندەگى سىياقىسىن الىپ, قۋانىشتى ءساتتى باستان كەشتى. ءداستۇر بويىنشا كونكۋرس جۇلدەلەرى 10 اتالىم بويىنشا تابىس ەتىلدى. جەڭىمپازدار قا­تارىندا جەزقازعان قالالىق «سارىارقا» گازەتى رەداكتورىنىڭ ورىنباسارى سارا سماعۇل («ەڭ­بەك ادامى» تاقىرىبىن ۇزدىك جاريالاعانى جانە ناسيحاتتاعانى ءۇشىن»), تەمىرتاۋ قالالىق «ۆەچەر­نيايا گازەتا» باسىلىمىنىڭ ءتىل­شىسى ليديا فرولوۆا («ءوندىرىس تاقىرىبىن ۇزدىك جاريالاۋ»),  «قازاقستان-قاراعاندى» وب­لىستىق تەلەۆيزياسىنىڭ رە­داك­تورى سۆەت­لانا شۋلتس («الەۋمەتتىك تا­قىرىپتى ۇزدىك جاريالاۋ»),  قارقارالى اۋداندىق «قارقارالى» گازەتى رەداكتورىنىڭ ورىنباسارى ايان قىزكين («اۋىل تاقىرىبىن ۇزدىك جاريالاۋ»),  ساران قالالىق «ساران گازەتى» باسىلىمىنىڭ ءتىلشىسى نۇربانۋ بايمۇحامبەتوۆا («بەلسەندى ءومىر­لىك ۇستانىمى ءۇشىن»), «نوۆىي ۆەستنيك» گازەتىنىڭ ءتىلشىسى اناس­تاسيا ماشنينا («جىلدىڭ ۇزدىك شىعارماشىلىق جۇمىسى»),  اقتوعاي اۋداندىق «توقىراۋىن تىنىسى» گازەتىنىڭ كوررەكتورى ءاليا يبراەۆا («مانەر مەن اتقارىمدىلىق ءۇشىن»),  قاراعاندى قالالىق «5 كانال» ارناسىنىڭ ۇيلەستىرۋشىسى جانە ءتىلشىسى الينا اقباەۆا («العاشقى تابىستارى ءۇشىن»), رەسپۋبليكالىق «استانا» تەلەارناسىنىڭ وپەراتورى ماق­سۇت ساراباەۆ («وبەكتيۆ شەبەرى») بولدى. ءبىز ءۇشىن قۋانىشتى جايت, كوپ جىلدار بويى «ەگەمەن قازاقستان» گازەتىنىڭ  قاراعاندى وبلىسىنداعى مەنشىكتى ءتىلشىسى بولىپ قىزمەت ەتكەن, بۇگىنگى كۇندە قۇرمەتتى ەڭبەك دەمالىسىنا شىققان قارىمدى قالامگەر ايقىن نەسىپباي  دا «ماماندىققا ادالدىعى ءۇشىن» اتالىمى بويىنشا جۇلدەگە يە بولدى. ال «التىن سۇڭقار» بايقاۋى­نىڭ «قاراعاندى جۋرناليستيكاسىن دامىتۋعا قوسقان ۇلەسى ءۇشىن»  اتالىمى بويىنشا باس جۇلدەسىنە سەرىك اقسۇڭقار ۇلى لايىق دەپ تانىلدى. اقىنعا جۇلدەنى وبلىس اكىمى نۇرمۇحامبەت ابدىبەكوۆ تابىس ەتتى. ماراپاتتاۋ ءراسىمى كەزىندە ءوڭىر باسشىسى باق وكىلدەرىن ءتول مەرەكەمەن قۇتتىقتادى. «قۇرمەتتى بۇقارالىق اقپارات قۇرالدارىنىڭ وكىلدەرى! سىزدەر بيلىك پەن قوعام اراسىندا دانەكەر بولىپ, ەكى جاققا ءتيىمدى ديالوگ ءۇشىن قولايلى جاعداي تۋدىرىپ جۇرەسىزدەر. ادامداردى بىرىكتىرىپ, كەڭ اۋقىم­داعى اعارتۋ جانە ءتۇسىندىرۋ جۇ­مىستارىن اتقارىپ تا ءبىزدىڭ قوعامنىڭ دامۋىنا سۇبەلى ۇلەس قوسىپ كەلەسىزدەر», دەپ باق وكىل­دەرىنىڭ ەڭبەگىنە جوعارى باعا بەردى وبلىس اكىمى. ۇزدىك جۋرناليستەردى ماراپاتتاۋ كەشىندە وسى سالتاناتقا ارنايى شاقىرىلعان ءانشى ءمادينا سادۋاقاسوۆا مەن جەرگىلىكتى ونەر­پازدار مەرەكەلىك كوڭىل-كۇيدىڭ حو­شىنداعى جۋرناليستەر مەن كەش قوناقتارى الدىندا اسەم ءان­نەن شاشۋ شاشتى. ال كەش ءجۇر­گىزۋشىلەرىنىڭ ءبىرى بەلگىلى تەلە­جۇرگىزۋشى ايگۇل مۇكەي بولدى. قايرات ءابىلدينوۆ, «ەگەمەن قازاقستان» قاراعاندى