جۋرناليستەردىڭ كاسىبي مەرەكەسىنە وراي بيلياردتان جازۋشى, جۋرناليست, عالىم, پروفەسسور اقسەلەۋ سەيدىمبەكتi ەسكە الۋعا ارنالعان ءداستۇرلى رەسپۋبليكالىق تۋرنير ءوتتى. وعان باق سالاسىنىڭ 60-قا جۋىق وكىلى قاتىستى.
ءتۋرنيردىڭ اشىلۋ سالتاناتىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «جۋرناليستيكا ماسەلەلەرىن زەرتتەۋ» ينستيتۋتىنىڭ ديرەكتورى نامازالى وماشەۆ جارىستىڭ ماڭىزى مەن ەرەكشەلىگىن كەڭىنەن ايتىپ بەردى.
«اقسەلەۋ سەيدىمبەك اتىنداعى بيليارد سايىسى وسىمەن التىنشى مارتە ۇيىمداستىرىلىپ وتىر. ءتۋرنيردىڭ وتۋىنە اتالعان ءبىلىم ورداسىنىڭ كاسىپوداق كوميتەتى مۇرىندىق بولىپ, دەمەۋشىلىك كورسەتتى. ودان بولەك, اقسەلەۋ اعامىزدىڭ ءىنىسى اسىلحان سەيدىمبەك اۋلەتى اتىنان ارنايى سىيلىق تاپسىرادى», – دەدى ول.
مۇنان كەيىن ۋنيۆەرسيتەتتىڭ «جۋرناليستيكا جانە ساياساتتانۋ» فاكۋلتەتىنىڭ دەكانى قايرات ساق ءسوز الىپ, جارىسقا قاتىسۋشى اقساقالدار توبى – 24, ورتا بۋىن وكىلدەرى مەن جاستاردان قۇرالعان ويىنشىلار 32 سايىسكەردەن تۇراتىنىن جەتكىزدى.
«بۇل تۋرنير ەڭ العاش 2009 جىلى اقسەلەۋ اعامىزدىڭ باستاماسىمەن باق وكىلدەرى اراسىندا ۇيىمداستىرىلدى. ماقساتى – جۋرناليستيكانىڭ قازانىندا قايناپ جۇرگەن جانە قولىنداعى قالامىن قارۋ ەتكەن قالامگەرلەردىڭ باسىن قوسىپ, كاسىبي مەرەكەنىڭ قارساڭىندا ءبىر سەرگىپ قالۋ. وسى رەتتە, اعامىز ءوزىنىڭ اتىنان تۋرنير جەڭىمپازىنا اقشالاي جۇلدەسىن بەرىپ, ءداستۇرلى شاراعا مۇرىندىق بولدى. ال 2010 جىلدان بەرى ءبىز وسى سايىستى احاڭنىڭ اتىنان وتكىزىپ كەلەمىز. جىل سايىن بيلياردقا قىزىعۋشىلىق تانىتىپ, جارىسقا قاتىسۋعا نيەت بىلدىرگەن ويىنشىلار قاتارى ارتىپ كەلەدى. بۇگىنگى شاراعا «قازاقستان» ۇلتتىق تەلەارناسى» مەن اقسەلەۋ اعا ەڭبەك ەتكەن «ەگەمەن قازاقستان» گازەتى جارىس جەڭىمپازدارىنا ارنايى جۇلدە تاعايىندادى. جالپى, ءبىز كەلەسى جىلى اقسەلەۋ اعامىزدىڭ 75 جىلدىعىنا وراي تۋرنير اۋقىمىن ۇلعايتىپ, دۇبىرلەتىپ وتكىزەمىز بە دەپ وتىرمىز», – دەدى قايرات ساق ءوزىنىڭ سوزىندە.
سونىمەن, جەتى ساعاتقا سوزىلعان سايىستا اقساقالدار توبىنان 1-ورىندى نامازالى وماشەۆ جەڭىپ السا, 60 جاسقا دەيىنگى ويىنشىلار ىشىنەن ۇزدىك شىققان تەلەجۋرناليست ءنۇردىلدا وراز توپ جاردى. ولارعا ءتۋرنيردىڭ باس سىيلىعى – كۋبوكتار مەن باعالى سىيلىقتار تابىس ەتىلدى. تۋرنيردە, سونداي-اق, بۇدان دا باسقا اتالىمدار بويىنشا ۇزدىكتەر انىقتالىپ, ءتيىستى سىي-سياپاتتارعا يە بولدى.
تالعات رايىمبەك,
«ەگەمەن قازاقستان»
