اۋىلداستار العىسى

اينۇر بايراموۆانىڭ كىندىك قانى تامعان جەرى – ازەربايجان رەسپۋبليكاسى بولسا, ورتاسىن تانىعان وتانى – قازاق ەلى. جورگەكتە جاتقان ءسابي كەزىندە اتا-اناسى قازاقستانعا قونىس اۋدارىپتى. اكەسى ورمان شارۋاشىلىعىندا, اناسى اۋرۋحانادا مەدبيكە بولىپ ەڭبەك ەتەدى. وسىنداي وتباسىندا دۇنيەگە كەلگەن اينۇر شىعىس قازاقستان وبلىسىنىڭ بەسقاراعاي اۋدانىندا ءوستى. 1997 جىلى اۋدان ورتالىعىنداعى مەكتەپتىڭ تابالدىرىعىن اتتاعان ول توعىزىنشى سىنىپقا دەيىن اۋىلدا وقىدى. ودان كەيىن الماتى قالاسىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ جانىنداعى كوللەدجگە اۋدارماشى-رەفەرەنت ماماندىعى بويىنشا وقۋعا ءتۇستى. كوللەدجدى بىتىرگەن سوڭ ارنايى ورتا ءبىلىم بازاسى نەگىزىندە شاكارىم اتىنداعى سەمەي مەملەكەتتىك ۋنيۆەرسيتەتىندە شەت تىلدەر ماماندىعى بويىنشا ءبىلىم الدى. اعىلشىن جانە قىتاي تىلدەرىن مەڭگەرۋگە تالپىندى. جانىنا جاقىنى – الەم حالىقتارىنىڭ بايلانىس تىلىنە اينالعان اعىلشىن ءتىلى بولىپ شىققان بويجەتكەن جوعارى وقۋ ورنىن بىتىرگەننەن كەيىن دە ءتىلدى تەرەڭدەتە مەڭگەرۋدى توقتاتقان جوق. سوڭعى جىلدارى ەلىمىزدەگى قاناتقاقتى جوبا رەتىندە شىعىس قازاقستان وڭىرىندە كوپتىلدىلدىك باعدارلاماسى ەنگىزىلىپ جاتقانى بەلگىلى. وسىعان وراي اينۇردىڭ العان ءبىلىمى سۇرانىسقا يە ماماندىقتاردىڭ بىرىنە اينالدى. سەبەبى, اۋىلداردا ءۇش تۇعىرلى ءتىل باعدارلاماسىنىڭ ءبىر بۇتاعى سانالاتىن اعىلشىن ءتىلىنىڭ ماماندارى تاپشى, ءتىپتى, جەتىسپەيدى دەۋگە دە بولادى. وسى ولقىلىقتىڭ ورنىن تولتىرۋعا ۇمتىلعان ول 2012 جىلى وقۋ بىتىرگەن سوڭ بەسقاراعاي اۋىلىنداعى ءوزى وقىعان بوراس ورتا مەكتەبىنە مۇعالىم بولىپ ورنالاستى. شاكىرتتەرىن الەمدىك تىلدە سويلەتۋگە كۇش سالعان اعىلشىن ءتىلى ءپانىنىڭ مۇعالىمىن بۇگىندە بارشا اۋىلداستارى قۇرمەت تۇتادى. 24 جاستاعى جاس ۇستازدىڭ مەكتەپتەگى ەڭبەك وتىلىنە – 4 جىل. از ۋاقىتتا العىرلىعىمەن اۋىلداستارىنان العىس الىپ ۇلگەردى. انا تىلىمەن بىرگە مەملەكەتتىك ءتىلدى ءھام اعىلشىن, ورىس تىلدەرىن ەركىن مەڭگەرگەن ازەربايجان ۇلتىنىڭ ارۋى بەسقاراعايلىق جاستارعا ۇلگى. اينۇر – قوعامدىق ومىردە بەل­سەندىلىك تانىتىپ, وبلىستىق, اۋداندىق دەڭگەيدە وتكەن ءىس-شارالاردىڭ بەل ورتاسىنان تابىلدى. جاستار فورۋمىنا, ءتۇرلى كەلەلى باسقوسۋلار مەن كونفەرەنتسيالارعا قاتىسىپ كەلەدى. «جاسوتاندىقتار» قۇرامىندا تىكەلەي ءوزى دە اۋقىمدى شارالار ۇيىم­داستىرادى. ايتالىق, اينۇر روۆ­شانقىزى بۇگىندە بەسقاراعاي اۋدان­دىق دوستىق ءۇيىنىڭ ازەربايجان ەتنو­مادەني بىرلەستىگىنىڭ جەتەكشىسى, اۋدان­دىق «دوستار» ەتنومادەني جاس­تار توبىنىڭ بەلسەندى مۇشەسى رەتىن­دە جاستاردى تاعاتتىلىققا ءتار­بيە­لەيتىن جوبالاردى قولعا الدى. – قازىرگى كەزدە بالالاردىڭ ءتىل ءۇي­رەنۋگە دەگەن قۇشتارلىعى ەرەكشە. بارلىعى دا بىرنەشە ءتىل بىلگىسى كەلەدى. بىراق, قابىلەت-قارىمىنا قاراي وقۋشىلاردىڭ ءتىلدى مەڭگەرۋ دەڭگەيى ءارتۇرلى بولىپ كەلەدى. مەملەكەت باسشىسى نۇرسۇلتان نازارباەۆ ەلىمىزدە ۇشتىلدىلىكتى دامىتۋعا باسىمدىق بەرگەنى بەلگىلى. وسى ورايدا وقۋشىلار اعىلشىن ءتىلىن ءبىرىنشى سىنىپتان باستاپ وقۋعا دەن قويۋدا. بالالار قوسىمشا ساباقتارعا كەلۋ ارقىلى ءتىل مەڭگەرۋگە بەلسەنە قاتىسۋدا, – دەگەن اينۇر وتكەن جىلى ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ العىس حاتىنا يە بولعانىن زور ماقتانىشپەن جەتكىزدى. – كونستيتۋتسيا كۇنىندە بەرىلگەن بۇل ماراپات مەرەيىمدى عانا ءوسىرىپ قويعان جوق, سونىمەن بىرگە, ەرتەڭگى كۇنگە دەگەن سەنىمىمدى دە نىعايتا ءتۇستى, – دەيدى مۇعاليما قىز. دۋمان اناش, «ەگەمەن قازاقستان» شىعىس قازاقستان وبلىسى, بەسقاراعاي اۋدانى